«Daily Mail»បានចុះផ្សាយកាលពីពេល ថ្មីៗកន្លងមកដោយយោងតាមវីដេអូឃ្លីបរបស់ចិនថា កូនកំលោះបានចាប់ទាញកូនក្រមុំចុះពីរថយន្ត ដោយសារខឹងកូនក្រមុំទាមទារថ្លៃបណ្ណាការច្រើនពេក ។ ប៉ុន្តែព័ត៌មានផ្សេងទៀតថា កូនកំលោះប្រហែលជាខឹងអ្នកបើករថយន្ត ។
ហេតុការណ៍នោះកើតឡើងកាលពីថ្ងៃទី១៧ មករា ២០១៧ ដោយកូនកំលោះ-កូនក្រមុំត្រកូល«លី»បានរៀបការនៅខណ្ឌ«អាន់យេ»ក្រុងជឺយ៉ាង ខេត្តស៊ីឈួន នាភាគខាងលិចឆៀងខាងត្បូង ប្រទេសចិន ។ វីដេអូឃ្លីបនោះ ទើបតែបង្ហោះកាលពីថ្ងៃទី៩ មិថុនា ។
ក្នុងដំណាក់កាលដំបូងលេចឮថា កូនកំលោះខឹងកូនក្រមុំទាមទារថ្លៃបណ្ណាការច្រើនពេក ទើបចាប់ទាញនាងចេញពីរថយន្ត ហើយឱ្យនាងសងប្រាក់បណ្ណាការចំនួន៣០០.០០០យាន់ ឬ៤.០០០ដុល្លារវិញ ។ ចំណែកប្រភពផ្សេងទៀតថា កូនក្រមុំសុំឱ្យកូនកំលោះសងប្រាក់៨៨០០យាន់ ឬ១.២៥០ដុល្លារ ទើបព្រមចុះពីរថយន្ត ។
ក្រោយពីព័ត៌មាននោះបែកខ្ចះខ្ចាយមក មហាជនសម្តែងការមិនពេញចិត្ត ដោយរិះគន់ថាកូនក្រមុំមានចិត្តលោភលន់ ។ ចំណែកនាងសៀវលីជាមិត្តស្រីរបស់កូនក្រមុំបកស្រាយថា កូនក្រមុំមិនត្រូវការប្រាក់ពីកូនកំលោះទេ រួមទាំងបញ្ជាក់ថាទាំងកូនកំលោះ និងកូនក្រមុំខឹងអ្នកបើកបររថយន្ត ។ នាងបញ្ជាក់ទៀតថា កូនកំលោះខឹងអ្នកបើកបររថយន្ត ព្រោះបើកចោលរូបគេដែលរវល់ផ្លាស់សម្លៀកបំពាក់ ។
កូនកំលោះ-ក្រមុំបានដើរចេញពីរថយន្តនោះតែពិធីរៀបអាពាហ៍ពិពាហ៍នៅតែដំណើរការធម្មតា៕
ចែករំលែកព័តមាននេះ