រាជធានីភ្នំពេញ ៖ តារាចម្រៀងលី អីុវ៉ាធីណា បានប្រតិកម្មចំពោះសារព័ត៌មានមួយ ផ្សព្វផ្សាយពាក្យពេចន៍ដែលនាងសរសេរបង្ហោះតាមហ្វេសប៊ុកថា «ផ្កាស្លាគ្មានតម្លៃសម្រាប់នាងទេ » ។ បន្ទាប់ពីចេញផ្សាយមក មនុស្សមួយចំនួនបានរិះគន់ខ្លាំងពីអ្វីដែលអីុ វ៉ាធីណាបានសរសេរក្នុងនោះខ្លះចាត់ទុកពាក្យសម្តីរបស់នាងមិនសក្តិសមក្នុងនាមនាងជាកូនខ្មែរទេ ។
មហាជនរិះគន់លី អីុវ៉ាធីណា ដោយសារតែនាងសរសេរថា «ដូចគ្មានអីសំខាន់ផង ហើយក៏មិនអស្ទារ្យអីដែរ វាគ្រាន់តែបញ្ជាក់ថាអ្នកជាប្តីខ្ញុំ, ខ្ញុំជាប្រពន្ធស្របច្បាប់តែប៉ុណ្ណឹង តែអ្វីដែលសំខាន់តើផ្កាស្លាហ្នឹងបានផ្តល់សុភមង្គលឱ្យយើងឬអត់? អ្នកខ្លះបានមកដោយទឹកភ្នែក បានមកដោយប្តីវ៉ៃ ប្តីមានស្រី ។ អៅិចឹងចង់សួរថា តើផ្កាស្លា ហ្នឹងមានន័យឬសំខាន់អត់ស្រីៗ។ ផ្កាស្លាគ្មានតម្លៃសម្រាប់ខ្ញុំសូម្បីបន្តិច » ។
ពាក្យទាំងនោះត្រូវសារព័ត៌មានចុះផ្សាយ ហើយមានការចែកចាយតាមហ្វេសប៊ុកដែលនាំឲ្យមហាជនរិះគន់ខ្លាំង ដ្បិត«ផ្កាស្លា» មានតម្លៃបំផុតតាមគន្លងប្រពៃណីខ្មែរ ។
នាងលី អីុវ៉ាធីណា ចាត់ទុកការចុះផ្សាយនោះគឺជាការរំលោភសិទ្ធិរបស់នាង ក្រោមហេតុផលមិនសួរនាំ ហើយអ្វីដែលនាងសរសេរនោះគឺជារឿងផ្ទាល់ខ្លួនរបស់នាងប៉ុណ្ណោះ ។
លី អីុវ៉ាធីណា បានសរសេរសារឆ្លើយតបបង្ហោះតាមហ្វេសប៊ុកកាលពីថ្ងៃទី២១ មិថុនា ២០១៧ថា «បងៗអ្នកកាសែត ខ្ញុំសរសេររឿងផ្ទាល់ខ្លួនខ្ញុំទេហេតុអីយកទៅចុះមិនបានសុំខ្ញុំបន្តិចអីុចឹង ។ ចុះខ្ញុំធ្វើបុណ្យម៉េចមិនចុះ ឬចែកអំណោយអីហ្នឹងម៉េចមិនចុះផង ។ រឿងផ្ទាល់ខ្លួនខ្ញុំសោះ» ។
ពាក្យពេចន៍ដែលអីុ វ៉ាធីណាបកស្រាយនេះត្រូវគេចាត់ទុកថា នាងមិនទទួលខុសត្រូវអ្វីដែលខ្លួនបានសរសេរ ។ នាងជាបុគ្គលសាធារណៈ គឺជាតារាចម្រៀង ហេតុនេះរាល់សកម្មភាព រូបភាព និងការសរសេរអ្វីបង្ហោះតាមហ្វេសប៊ុកត្រូវតែប្រុងប្រយ័ត្ន ៕
ចែករំលែកព័តមាននេះ