ជំងឺឆ្កួតជ្រូកជាជំងឺមួយដែលអាចបង្កឱ្យមានការប៉ះពាល់ដល់សុខភាពផ្លូវចិត្ដ និងបញ្ញាស្មារតី ។ ជំងឺឆ្កួតជ្រូក គឺជាស្ថានភាពទូទៅ បណ្តាលមកពីការប្រកាច់ដែលកើតមានឡើងវិញ ដដែលៗ ។ ជំងឺនេះស្រដៀងគ្នាទៅនឹង
ជំងឺឆ្កួតជ្រូកជាជំងឺមួយដែលអាចបង្កឱ្យមានការប៉ះពាល់ដល់សុខភាពផ្លូវចិត្ដ និងបញ្ញាស្មារតី ។ ជំងឺឆ្កួតជ្រូក គឺជាស្ថានភាពទូទៅ បណ្តាលមកពីការប្រកាច់ដែលកើតមានឡើងវិញ ដដែលៗ ។ ជំងឺនេះស្រដៀងគ្នាទៅនឹងខ្យល់គរដែរ ហើយនៅពេលជំងឺរើឡើង ម្តងៗអាចនឹងស្តែងឲ្យដឹងតាមរយៈសញ្ញាមួយចំនួនដូចជា៖
-ប្រឹងខ្លួនឡើងរឹង និងមានអាការប្រកាច់ កន្ត្រាក់ៗ ។
-ដួល ភ្លាមៗ ពេលខ្លះជនរងគ្រោះនឹងស្រែកបញ្ចេញសំឡេង ប្លែកៗ ។
-សាច់ដុំប្រឹង បន្ទាប់មកនឹងស្បើយទៅវិញ ហើយចាប់ផ្តើម កន្ត្រាក់ៗ អាចកើតមានអាការខៀវជាំរួមជាមួយផងដែរ ។
-អាចឃើញមានទឹកមាត់ហៀរប្រឡាក់ពេញមាត់ បើអណ្តាត ឬផ្នែកណាមួយត្រូវបានខាំនឹងឃើញមានឈាមលាយជាមួយនឹងទឹកមាត់ចេញមកផង ។
-ក្រោយពីអាការប្រកាច់កន្លងផុតទៅ ដែលជាធម្មតាមានរយៈពេល៥នាទី ជនរងគ្រោះនឹងដឹងខ្លួនឡើងវិញ តែអាចនឹងស្រឡាំងកាំង ច្របូកច្របល់ ប្រហែលជាមួយម៉ោង ហើយជនរងគ្រោះអាចត្រូវការសម្រាក ។ បើសិនជាលោកអ្នកស្ថិតក្នុងហេតុការណ៍នេះចូរកុំតក់ស្លុត ត្រូវជួយសង្គ្រោះដល់ជនរងគ្រោះដោយលោកអ្នកត្រូវតែអនុវត្តតាមវិធីខាងក្រោមនេះដូចជា៖
-មើលថែយ៉ាងស្ងៀមស្ងាត់ មិនត្រូវឲ្យមានអ្នកណាមករំខាន់ ។
-យករបស់ ផ្សេងៗដែលនៅជិតជនរងគ្រោះចេញ ដើម្បីការពារកុំឲ្យមានគ្រោះថ្នាក់បន្ថែមទៀតនៅពេលដែលជនរងគ្រោះប្រកាច់ ឬត្រូវយកជនរងគ្រោះចេញពីកន្លែងមនុស្សច្រើន បើអាចទៅរួចគួរយកខ្នើយ ឬក្រណាត់មកដាក់ទ្រាប់ក្បាល ។
-បន្ធូរសម្លៀកបំពាក់ដែលចង្អៀតចេញ ដោយប្រយុងប្រយ័ត្ន ព្រោះជនរងគ្រោះដែលនៅដឹងខ្លួននៅឡើយអាចបម្រះ ។
-នៅពេលដែលមានបញ្ហានេះកើតឡើងចូរកុំឲ្យនណាម្នាក់ដាក់អ្វីចូលទៅក្នុងមាត់ជនរងគ្រោះ ឬភេសជ្ជៈឲ្យជនរងគ្រោះផឹកខណៈពេលកំពុងប្រកាច់ ។
-ខណៈពេលកំពុងមានអាការប្រកាច់ អ្នកគួរតែនៅជាមួយជនរងគ្រោះ រហូតទាល់តែអ្នកប្រាកដក្នុងចិត្តថា ជនរងគ្រោះដឹងខ្លួន ហើយអាចត្រលប់ទៅផ្ទះវិញបាន ។ មិនមែនអ្នករាល់គ្នាដែលមានការប្រកាច់សុទ្ធតែកើតមានជំងឺឆ្កួតជ្រូកទេ ។ ពេលខ្លះការប្រកាច់អាចកើតឡើងដោយសារតែការរបួស, ជំងឺ ឬបញ្ហា ផ្សេងៗដទៃទៀត ។ នៅក្នុងករណីទាំងនេះការប្រកាច់នឹងឈប់ នៅពេលដែលបញ្ហាទាំងនោះមានភាពប្រសើរ ឬបាត់ទៅវិញ ៕
ចែករំលែកព័តមាននេះ