បុករះឥតប្រណី ប៊ិះក្ស័យមនុស្សទាំងហ្វូង…
រាជធានីភ្នំពេញ ៖ រថយន្តហាយឡែនឌ័រមួយគ្រឿង បើកបរដោយបុរសម្នាក់ ហើយខណៈពេលឈប់ស្ងៀមដាក់មនុស្ស ដែលជិះក្នុងនោះចុះអស់ក៏បើកចេញហើយមិនដឹងយ៉ាងម៉េចទេ
រាជធានីភ្នំពេញ ៖ រថយន្តហាយឡែនឌ័រមួយគ្រឿង បើកបរដោយបុរសម្នាក់ ហើយខណៈពេលឈប់ស្ងៀមដាក់មនុស្ស ដែលជិះក្នុងនោះចុះអស់ក៏បើកចេញហើយមិនដឹងយ៉ាងម៉េចទេ ស្រាប់តែជ្រុលទៅបុករះធុងទឹកកក ជណ្ដើរផ្ទះប្រជាពលរដ្ឋ បុកមនុស្សបណ្ដាលឲ្យរងរបួស និងបុករថយន្ត ព្រមទាំងរបងបុរីជាបន្តបន្ទាប់ ទើបឈប់ស្ងៀម ដែលសង្ស័យចេះបើកស្ទើរភ្លើង និងច្រឡំហ្គែស្មានថាហ្វ្រាំងទើបកើតរឿងបែបនេះ ហើយបានបង្កឲ្យមានការភ្ញាក់ផ្អើល កាលពីវេលាម៉ោង៥ និង៣០នាទីល្ងាច ថ្ងៃទី១៩ ខែមិថុនា ឆ្នាំ២០១៧ នៅក្នុងបុរី ប៊ុន ហួរ ស្ថិតនៅក្នុងភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានបានឲ្យដឹងថា នៅមុនពេលកើតហេតុ រថយន្តបង្កខាងលើនោះបានបើកបរចូលទៅឈប់នៅក្នុងបុរី ប៊ុន ហួរ ហើយបានដាក់មនុស្សដែលជិះនៅក្នុងនោះចុះ ហើយក្នុងនោះក៏មានស្ត្រីរងគ្រោះម្នាក់ផងដែរ ប៉ុន្តែពុំដឹងថា ជារថយន្តឈ្នួលដឹកអ្នកដំណើរ ឬក៏ជារថយន្តដឹកបងប្អូននោះឡើយ។ លុះក្រោយពេលដាក់មនុស្សចុះអស់រថយន្ត បានបើកថយក្រោយក្នុងបំណងចាកចេញពីទីនោះ ប៉ុន្តែដោយសារតែផ្លូវចង្អៀត ទើសរបងរោងចក្រមិនអាចបើកថយក្រោយបានបុរសដែលជាអ្នកបើកបរ ក៏បានបើកទៅមុខវិញ។ ពេលនោះស្រាប់តែជ្រុលទៅបុកជណ្ដើរផ្ទះ និងធុងទឹកកកប្រជាពលរដ្ឋ ដែលនៅក្បែរនោះ បណ្ដាលឲ្យរងការខូចខាត បន្ទាប់មកទៀតរថយន្តខាងលើមិនបានឈប់ស្ងៀមឡើយ បានជ្រុលទៅបុកស្ត្រី ដែលទើបចុះលើរថយន្តនេះបណ្ដាលឲ្យរងរបួសធ្ងន់។
ប្រភពដដែលបានបន្តទៀតថា បន្ទាប់មករថយន្តបង្កនៅតែលឿនទៅមុខទៀត និងបានបន្តទៅបុករះរថយន្ត១គ្រឿងម៉ាកBMW ដែលម្ចាស់គេចតនៅមុខផ្ទះ បណ្ដាលឲ្យរថយន្តBMWនោះ រងការខូចខាតផ្នែកខាងក្រោយ។ ប៉ុន្តែទោះជាបុករះជាបន្តបន្ទាប់បែបនេះក្ដី ក៏រថយន្តខាងលើនោះមិនបានឈប់ស្ងៀមដែរ គឺនៅតែលឿនទៅមុខទៀតដដែល ហើយបានចម្ងាយប្រមាណ១០០ម៉ែត្រ ក៏បានបុករថយន្ត១គ្រឿងទៀត ម៉ាកតូយ៉ូតាកាមរីស្វិតដែលម្ចាស់ចតមុខផ្ទះដែរ រួចហើយបានជ្រុលទៅបុករបងបុរី ប៊ុន ហួរ នៅខាងមុខ ពេញទំហឹងទៀត។ ប៉ុណ្ណឹងហើយរថយន្តនេះ នៅមិនព្រមឈប់ទៀតអ្នកបើកបរបាន បើកថយក្រោយវិញ និងបានបុករថយន្តកាមរីគូថស្វិតនោះសារជាថ្មីទៀត ទើបឈប់ស្ងៀមបណ្ដាលឲ្យរថយន្តបង្ក នោះរងការខូចខាតទាំងផ្នែកខាងមុខ និងខាងក្រោយយ៉ាងដំណំ ប៉ុន្តែសំណាងល្អមិនបានបណ្ដាលឲ្យអ្នក បើកបររងគ្រោះថ្នាក់ឡើយ។
ក្រោយពេលកើតហេតុ អ្នកបើកបររថយន្តបង្កខាងលើ បានធ្វើការសម្រុះសម្រួលជាមួយជនរងគ្រោះ និងបានចេញសំណងថ្លៃជួសជុលរថយន្ត BMW និងរថយន្តកាមរីស្វិត ព្រមទាំងធុងទឹកកកប្រជាពលរដ្ឋ ដែលខ្លួនបើកបុករះជាបន្តបន្ទាប់នោះជាការបញ្ចប់រឿងនៅនឹងកន្លែងកើតហេតុតែម្ដង ហើយឧប្បត្តិហេតុនេះ ត្រូវបានគេសង្ស័យថា អ្នកបើកបររថយន្តនោះចេះស្ទើរភ្លើង និងច្រឡំហ្គែស្មានថាជាហ្វ្រាំង ធ្វើឲ្យបាត់បង់ម្ចាស់ការក្នុងការបើកបរទើបជួបរឿងស៊យបុករះឥតប្រណីបែបនេះ៕
ចែករំលែកព័តមាននេះ