ខេត្តព្រៃវែង ៖ សាខាកាំកុងត្រូលខេត្តព្រៃវែង សហការណ៍ជាមួយមន្ទីរពាណិជ្ជកម្មខេត្ត រៀបចំសិក្ខាសាលាស្តីអំពី សុវត្ថិភាពម្ហូបអាហារ និងផលប៉ះពាល់សុខភាព ដែលកម្មវិធីនេះបានធ្វើឡើងនៅព្រឹក ថ្ងៃទី១៩ ខែមិថុនា ឆ្នាំ២០១៧ នៅសាកលវិទ្យាល័យ ជា ស៊ីម កំចាយមារសាខាខេត្តព្រៃវែង ដែលមានការអញ្ជើញចូលរួមពីសំណាក់ឯកឧត្តមអភិបាលរងនៃគណៈអភិបាលខេត្តព្រៃវែង មន្ត្រីពាក់ព័ន្ធនានា និស្សិត និងបងបង្អូនអាជីវករជុំវិញខេត្ត សរុបប្រមាណជាង ៣០០នាក់ ។
នៅក្នុងឱកាសនោះដែលលោក ឌឹម ថេង អគ្គនាយករងនៃអគ្គនាយកដ្ឋានកាំកុងត្រូបានមានប្រសាសន៍ថា ការរៀបចំសិក្ខាសាលានេះឡើង គឺក្នុងគោលបំណងផ្តល់ព័ត៌មានដល់សិក្ខាកាម ពិសេសបងប្អូនអាជីវករ សិស្សនិស្សិតឱ្យបានជ្រាបអំពីសុវត្ថិភាពម្ហូបអាហារ និងផលប៉ះពាល់ទៅលើសុខភាពអ្នកប្រើប្រាស់ ។ យើងដឹងហើយថា បច្ចុប្បន្នសុវត្ថិភាពម្ហូបអាហារគឺជាបញ្ហាចម្បងក្នុងចំណោមបញ្ហាសំខាន់ៗនៅក្នុងប្រទេសកម្ពុជាយើងនេះ ដោយសារតែកន្លងមកយើងធ្លាប់ជួបប្រទះបញ្ហាពុលអាហារ ដោយសារតែអ្នកផលិតគាត់មិនបានយល់ដឹងបានច្បាស់អំពីបញ្ហាដែលអាចបង្កឱ្យមានគ្រោះថ្នាក់ ហើយក្នុងនោះសមត្ថកិច្ចទាំងអស់បានធ្វើការយ៉ាងសកម្មក្នុងការដោះស្រាយបញ្ហាទាំងអស់នេះ តួយ៉ាងដូចនៅថ្ងៃនេះ សិក្ខាមួយនេះ នឹងពន្យល់ អ្នកដែលមកចូលរួមឱ្យបានយល់ច្បាស់ពីបញ្ហាទាំងអស់នេះ និងធានាបានក្នុងការទប់ស្កាត់នូបញ្ហាដែលបណ្តាលមកពីការប្រើប្រាស់ម្ហូបអាហារគ្មានសុវត្ថិភាពនេះ ។ លោកបានបញ្ជាក់ផងដែរថា បញ្ហាសុវត្ថិភាពម្ហូបអាហារនេះបណ្តាលមកពីកត្តាជាច្រើន ក្នុងនោះរួមមានការប្រើប្រាស់សារធាតុគីមីមិនសមស្រប ការប្រើប្រាស់ថ្នាំកសិកម្មមិនត្រឹមត្រូវតាមវិធានកសិកម្ម ក៏ដូចជាការចម្លងមេរោគតាមចង្វាក់ផលិតកម្ម ដែលចាប់ផ្តើមតាំងពីការដាំដុះ រហូតដល់ពេលបរិភោគ ។
ជាមួយគ្នានេះ និស្សិតដែលបានមកចូលរួមក្នុងវគ្គសិក្ខាសាលា ក៏បានបង្ហាញនូវចំណាប់អារម្មណ៍រីករាយថា សិក្ខាសាលាមួយនេះ វាពិតជាជួយផ្តល់នូវគំនិត និងចំណេះដឹងថ្មីៗដល់សិស្សនិស្សិត ជាពិសេសក្រុមអាជីវករ និងសហគ្រាសផ្សេងៗ ដែលគាត់បានមកចូលរួម ដែលធ្វើឱ្យពួកគាត់យល់ច្បាស់អំពីការប្រើប្រាស់ផលិតផល ជាពិសេសគឺការពិនិត្យទៅលើទំនិញគុណភាពទំនិញ និងការបរិច្ឆេទរបស់វា ។ ចុងក្រោយពួកគាត់ក៏បានសំណូមពរដល់លោកប្រធានសាខាកាំកុងត្រូលខេត្ត ក៏ដូចជាស្ថាបនពាក់ព័ន្ធទាំងអស់ មេត្តាបន្តការចុះផ្សព្វផ្សាយបន្តទៀតទៅដល់សាលារៀន សហគមន៍នានាដែលនៅទីជនបទ ដើម្បីឱ្យពួកគាត់បានយល់ច្បាស់អំពីបញ្ហាសុវត្ថិភាពម្ហូបអាហារ និងផលប៉ះពាល់សុខភាព ព្រោះថាបច្ចុប្បន្ន ប្រជាពលរដ្ឋមួយចំនួននៅមិនទាន់យល់ច្បាស់អំពីបញ្ហាទាំងអស់នេះនៅឡើយទេ ៕
ចែករំលែកព័តមាននេះ