រាជធានីភ្នំពេញ ៖ អង្គភាពប្រឆាំងអំពើពុករលួយ (ACU) កាលពីល្ងាចថ្ងៃទី១៨ ខែមិថុនា ឆ្នាំ២០១៧ បានបញ្ជូនជនជាប់សង្ស័យម្នាក់ ពាក់ពន្ធពីបទ ឆបោក តាមរូបភាពយកឈ្មោះថ្នាក់ដឹកនាំទីស្តីការគណ:រដ្ឋមន្ត្រីប្រើ ។ ជនសង្ស័យរូបនោះឈ្មោះ ស មឿនតារា ភេទប្រុស អាយុ៣៦ឆ្នាំ ទីលំនៅផ្ទះលេខ១៥៦ ផ្លូវលេខ១៥៦ សង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ បម្រើការនៅក្រុមហ៊ុន ហ្គ្រីតផាត់ន័រ អ៊ីនធីធីង ខូអិលធីឌី បានត្រូវលោក លី សុផាណា ព្រះរាជអាជ្ញារងអមសាលាដំបូងរាជធានីភ្នំពេញ ចោទប្រកាន់ពីបទ ឆបោក មានស្ថានទម្ងន់ទោស ។
ដើមចមដែលនាំឲ្យមានការចោទប្រកាន់ និងឈានដល់ការឃុំខ្លួនជនសង្ស័យខាងលើនេះ បានកើតឡើងក្នុងអំឡុងដើមខែមិថុនា ឆ្នាំ២០១៧ ក្នុងខណៈពេលដែលឈ្មោះ ស មឿនតារា ដែលមានស្រុកកំណើតនៅខេត្តក្រចេះ បានយកឈ្មោះថ្នាក់ដឹកនាំទីស្តីការគណៈរដ្ឋមន្ត្រី ថ្នាក់ដឹកនាំសាលាខេត្តក្រចេះ និងថ្នាក់ដឹកនាំអង្គភាពប្រឆាំងអំពើពុករលួយ ទៅអះអាងប្រាប់ប្រជាពលរដ្ឋមួយចំនួន ដែលមានរឿងក្តីក្ដាំនៅតុលាការខេត្តក្រចេះថា ខ្លួនមានឥទ្ធិពលធ្វើអន្តរាគមន៍ និងអាចឆែកមើលសំណុំរឿងនៅតុលាការខេត្តក្រចេះបាន ។ ដោយមានប្រជាពលរដ្ឋមួយចំនួនមានការជឿជាក់ឈ្មោះ ស មឿនតារា បានទាមទារលុយកាក់មួយចំនួនធ្វើជាសាហ៊ុយឡើងចុះ និងចាយវាយ នៅពេលដែលចុះមកធ្វើអន្តរាគមន៍សំណុំរឿងនៅតុលាការខេត្តក្រចេះ ។
ក្រោយពីតំណាងអយ្យការបានធ្វើការចោទប្រកាន់ជាផ្លូវការណ៍ហើយ សំណុំរៀងនេះបានចាត់បញ្ជូនទៅខាងចៅក្រមស៊ើបសួរ លុះរសៀលថ្ងៃទី១៩ ខែមិថុនា នេះ ជនសង្ស័យត្រូវបានចៅក្រមសម្រេចឃុំខ្លួនដាក់ពន្ធនាគារព្រៃស ជាបណ្តោះអាសន្ន រង់ចាំសវនាការផ្តន្ទាទោសតាមផ្លូវច្បាប់ ៕
ចែករំលែកព័តមាននេះ