ការចម្អិនសាច់លើភ្លើងដោយផ្ទាល់មានការទាក់ទងទៅនឹងជំងឺមហារីក ។ នេះបើតាមការស្រាវជ្រាវមួយបានបង្ហាញ ។ ការចម្អិនអាហារដោយប្រើសីតុណ្ហភាពខ្ពស់ដូចជាការអាំងសាច់ និងបំពង នាំឱ្យមានការបង្កើតសារធាតុគីមីបង្កជំងឺមហារីកនៅក្នុងសាច់ ។
សារធាតុបង្កគ្រោះថ្នាក់នេះអាចធ្វើឲ្យ DNA របស់មនុស្សមានការប្រែប្រួលដែលអាចបង្កើនហានិភ័យនៃជំងឺមហារីក ។ នេះបើតាមការសិក្សាដែលបានចេញផ្សាយកាលពីពេលកន្លងមក។ ក្រុមអ្នកជំនាញបានទទូចថាការស្រាវជ្រាវនេះមិនមែនមានន័យថាយើងទាំងអស់គ្នាគួរតែបញ្ឈប់ការទទួលទានសាច់អាំងនោះទេ ។ ទោះជាយ៉ាងណាក្តី ពួកគេបានព្រមានយើងអំពីបរិមាណសាច់អាំងដែលយើងគួរបរិភោគ ។
នៅពេលដែលអ្នកអាំងសាច់ វានឹងផ្ទុកសារធាតុ២ប្រភេទដែលមានឈ្មោះថា heterocyclic aromatic amines ហៅកាត់ថា HAA និង polycyclic aromatic hydrocarbons ហៅកាត់ថា PAH ។ នេះបើតាមវិទ្យាស្ថានជំងឺមហារីកជាតិ ។
ក្រុមអ្នកវិទ្យាសាស្ត្រជប៉ុនបានពិនិត្យពីផលប៉ះពាល់នៃសារធាតុគីមីទាំង២ នេះចំពោះសត្វកណ្តុរ ហើយលទ្ធផលដ៏គួរឲ្យភ្ញាក់ផ្អើលនេះត្រូវបានចេញផ្សាយក្នុងអំឡុងឆ្នាំ ១៩៨០ ។ សត្វកណ្តុរដែលត្រូវបានគេដាក់ចំណីដែលមានសារធាតុ HAA មានការកកើតដុំសាច់ក្នុងសរីរាង្គ ផ្សេងៗគ្នា ។ ពេលដែលគេដាក់ចំណីមានសារធាតុ PAH សត្វកណ្តុរទាំងនោះកើតជំងឺមហារីក រួមទាំងជំងឺមហារីកគ្រាប់ឈាម និងកើតដុំសាច់នៅតាមផ្លូវរំលាយអាហារ និងសួត ។
ទោះជាយ៉ាងណាក្តី សត្វទាំងនេះត្រូវបានផ្តល់ចំណីអាហារដែលមានសារធាតុគីមីទាំងនេះក្នុងកម្រិតមួយខ្ពស់ដែលជាធម្មតា មនុស្សមិនបរិភោគទេនៅក្នុងរបបអាហាររបស់ពួកគេ ៕
ចែករំលែកព័តមាននេះ