ខេត្តកោះកុង ៖ នារីម្នាក់បម្រើការងារក្នុងហាងខារ៉ាអូខេមួយឈ្មោះ អេចស្តារ ( 8star) ស្ថិតនៅក្នុងក្រុងខេមរៈភូមិន្ទ ទីរួមខេត្តកោះកុង កាលពីរសៀលថ្ងៃទី18 ខែមិថុនា ឆ្នាំ2017 បានទូរស័ព្ទរៀបរាប់ប្រាប់ភ្នាក់ងារកោះសន្តិភាពពីទង្វើរំលោភសិទ្ធិ និងការគាបសង្កត់មកលើរូបនាងពីសំណាក់មេការ និងថៅកែហាងខារ៉ាអូខេខាងលើ ដែលជាមន្ត្រីកងរាជអាវុធហត្ថខេត្តទៀតផង។
នារីរងគ្រោះបានចេញមុខរៀបរាប់ថា រូបនាងត្រូវមេការ និងថៅកែជេរប្រមាថ តិះដៀល និងបណ្តេញបញ្ឈប់ពីការងារនៅវេលាម៉ោង2 រំលងអធ្រាត្រឈានចូលថ្ងៃទី18 មិថុនា ដោយសារតែរូបនាងស្រវឹងជោកជាំខ្លាំងពេកទៅលែងរួច ហើយរត់ចោលភ្ញៀវដែលនៅផឹកបន្ត។ នាងបញ្ជាក់ច្បាស់ថា នាងឈ្មោះ អិន ផល្លា អាយុ29ឆ្នាំ ជាអ្នកខេត្តកំពត បានសុំចូលបម្រើការងារក្នុងហាងខារ៉ាអូខេ អេចស្តារ ( 8star) រយៈពេលជាងមួយឆ្នាំ និងស៊ីប្រាក់ខែក្នុងនាមជានារីកំដរភ្ញៀវ ។
តែអំឡុងពេលមួយខែចុងក្រោយ នាងសុំអត់យកប្រាក់ខែវិញ គឺគ្រាន់តែអង្គុយយកធីបប៉ុណ្ណោះ ដើម្បីចង់បានសិទ្ធិថា នាងចង់ឈប់សំរាកស្មើណាក៏បាន ។ ប៉ុន្តែនៅព្រលប់ថ្ងៃទី17 មិថុនា ក៏មានភ្ញៀវចូលផឹកស៊ី និងច្រៀងកម្សាន្តនៅបន្ទប់លេខ 8A ហើយរូបនាងត្រូវមេការហៅឱ្យអង្គុយកំដរភ្ញៀវរហូតដល់ម៉ោង11យប់ទើបចេញ។ បន្ទាប់មកក៏មានភ្ញៀវចូលផឹក និងច្រៀងកម្សាន្តនៅបន្ទប់លេខ8B ទៀត រូបនាងក៏ត្រូវមេការហៅចូលអង្គុយកំដរភ្ញៀវថ្មីនេះទៀត រហូតដល់ម៉ោង2 រំលងអធ្រាត្រ ។ ដោយដឹងថា ខ្លួនស្ថិតក្នុងស្ថានភាពស្រវឹងខ្លាំងហើយ នាងក៏ដើរចេញមកក្រៅបន្ទប់ ហើយប្រាប់មេការឈ្មោះ រ៉ា ថា «បងមេការ ខ្ញុំសុំចេញទៅផ្ទះហើយ ព្រោះខ្ញុំស្រវឹងខ្លាំងណាស់ ខ្ញុំលែងចង់បានលុយធីបហើយបង»។ លឺដូច្នេះមេការស៊ីម2 ក៏ស្តីបន្ទោសដោយប្រើពាក្យអសុរស និងតិះដៀលយ៉ាងខ្លាំង បន្ទាប់មកមេការស៊ីម2 ក៏ទៅរាយការប្រាប់ថៅកែឈ្មោះ ឈន ឌីណា ដែលជាមន្ត្រីកងរាជអាវុធហត្ថខេត្តនោះមកដល់ក៏ជេរប្រមាថខ្លាំងៗ ហើយព្រមានថា «បើនាងឯងរត់ចោលភ្ញៀវយប់នេះ ចាប់ពីស្អែកទៅក៏មិនបាច់មកជាន់ទីនេះទៀតដែរ» ។ មិនតែប៉ុណ្ណោះលោកថៅកែរូបនេះបានបញ្ជាទៅមេការខាងគិតលុយ មិនឱ្យបើកលុយធីបដែលនាងខំអង្គុយកំដរភ្ញៀវបន្ទប់ទី1 (8A) រាប់ម៉ោងឱ្យនាងទៀតផង ។
នាងបានរៀបរាប់ទៀតថា ថៅកែហាងខារ៉ាអូខេមួយនេះ បានប្រើអំណាចគាបសង្កត់ កិបកេងកម្លាំងពលកម្ម ញើសឈាម និងសិទ្ធិសេរីភាព ។ នារីទាំងអស់ដូចៗគ្នាដែលជាស្រីកំដរភ្ញៀវ តែគ្មានអ្នកណាហ៊ានតវ៉ា ព្រោះគ្នាសុទ្ធតែមានជីវភាពយ៉ាប់យ៉ឺន ខ្លាចថៅកែដេញចេញអត់ការងារធ្វើ ម៉្លោះហើយចេះតែស៊ូទ្រាំទាំងវេទនា និងឈឺចាប់អញ្ចឹងទៅ។
ទោះបីជាមានការលើកឡើងបែបនេះក៏ដោយ កោះសន្តិភាពបានទំនាក់ទំនងទូរស័ព្ទទៅលោក ឈន ឌីណា មន្ត្រីកងរាជអាវុធហត្ថដែលជាថៅកែហាងខារ៉ាអូខេខាងលើនេះដែរ តែគ្មានអ្នកលើកទូរស័ព្ទឡើយ៕
ចែករំលែកព័តមាននេះ