រាជធានីភ្នំពេញ ៖ លោក ថោង ខុន រដ្ឋមន្ត្រីក្រសួងទេសចរណ៍បានស្នើដល់ស្ថាប័នមីក្រូហិរញ្ញវត្ថុទាំងអស់បន្តចុះផ្សព្វផ្សាយដល់ផ្ទះប្រជាពលរដ្ឋទាក់ទងការឃោសនារបស់គណបក្សប្រឆាំងដែលសន្យាថា នឹងលុបបំណុលពលរដ្ឋដែលបានខ្ចីពីធនាគារ និងស្ថាប័នមីក្រូហិរញ្ញវត្ថុឯកជន ។ ការស្នើបែបនេះធ្វើឡើងបន្ទាប់ពីមន្ត្រីបក្សប្រឆាំងនៅតាមមូលដ្ឋានថ្នាក់ក្រោមនៅតែបន្តយកប្រធានបទជាច្រើនដើម្បីបោកប្រាស់ប្រជាពលរដ្ឋក្នុងនោះប្រធានបទ «ធានាសងលុយជំពាក់ ឬលុបបំណុលជាមួយស្ថាប័នមីក្រូហិញវត្ថុ» ដែលជាការឃោសនាមិនស្មោះត្រង់ និងទុច្ចរិត បោកប្រាស់ប្រជាពលរដ្ឋ និងមើលងាយប្រជាពលរដ្ឋយ៉ាងធ្ងន់ធ្ងរបំផុត ។
លោករដ្ឋមន្ត្រី ថោង ខុន ដែលជាមន្ត្រីជាន់ខ្ពស់គណបក្សប្រជាជនកម្ពុជាតែងតែឧស្សាហ៍ចុះទៅកាន់មូលដ្ឋានរបស់លោកនៅក្នុងស្រុកបារាយណ៍ ខេត្តកំពង់ធំ នាថ្ងៃចុងសប្តាហ៍ ខណៈនោះលោកបានសង្កេតឃើញថា មន្ត្រីបក្សប្រឆាំងនៅតែបន្តប្រើការឃោសនាបែបអកុសលខាងលើនោះដដែល ។ ផ្តើមពីនោះលោកក៏បានបង្ហាញពីចំណាប់អារម្មណ៍នៅលើ Facebook ផ្លូវការរបស់លោកថា «ស្ថាប័នមីក្រូហិរញ្ញវត្ថុ គួរតែត្រូវចេញមុខបកស្រាយពន្យល់ប្រជាពលរដ្ឋក្នុងយុទ្ធនាការឃោសនាបោះឆ្នោតព្រោះច្រើនលើករួចមកហើយ បក្សប្រឆាំងតែងយកប្រធានបទជាច្រើនដើម្បី បោកប្រាស់ប្រជាពលរដ្ឋក្នុងនោះប្រធានបទ «ធានាសងលុយជំពាក់ ឬលុបបំណុល ជាមួយស្ថាប័នមីក្រូហិញវត្ថុ» គីជាប្រធានបទដែលមានចរិតមើលងាយរាស្ត្រ បោកប្រាសរាស្ត្រដ៏ពិស ពុលបំផុត ។
លោករដ្ឋមន្ត្រីបានបន្ថែមទៀតថា «ករណីនេះខ្ញុំយល់ឃើញថា គួរតែស្ថាប័នមីក្រូហិរញ្ញវត្តុឡើងបកស្រាយខ្លួនឯងផ្ទាល់ជាមួយប្រជារាស្ត្រតែម្តង តើអាចលុបបំណុលបាននៅពេលគណបក្សណា មួយ ឈ្នះឆ្នាតដូចពួកគេបោកប្រាស់បានឬអត់? ដើម្បីបញ្ចប់បញ្ហា» ៕
ចែករំលែកព័តមាននេះ