ខេត្តសៀមរាប ៖ កម្លាំងការិយាល័យប្រឆាំងគ្រឿងញៀនសហការណ៍ចូលរួម ពីកម្លាំងប៉ុស្តិ៍នគរបាលមូលដ្ឋានក្នុងក្រុងសៀមរាប បានចុះបង្ក្រាបករណីរក្សាទុក និងជួញដូរដោយខុសច្បាប់នូវសារធាតុញៀន ហើយបានការចូលរួមសហការណ៍ពីកម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តបន្ទាយមានជ័យ ធ្វើបង្ក្រាបបាន៣ទីតាំងផ្សេងគ្នា ឃាត់ខ្លួនបានមេខ្លោង និងបក្សពួកស្រីប្រុស ចំនួន ៦នាក់ រួចនាំយកមកសួរនាំនៅការិយាល័យជំនាញ នៃស្នងការនគរបាលខេត្តសៀមរាប ដើម្បីរៀបចំសំណុំរឿងបញ្ជូនទៅតុលាការខេត្តចាត់ការបន្តទៅតាមផ្លូវច្បាប់ ។
ហេតុការចុះប្រតិបត្តិការបង្ក្រាបករណីជួញដូរគ្រឿងញៀននៅ៣ទីតាំងផ្សេងគ្នា ធ្វើឡើងនៅវេលាម៉ោង០៨និង០០នាទី ថ្ងៃទី១៦ ខែមិថុនា ឆ្នាំ២០១៧ រហូតដល់វេលាម៉ោង១៧និង០០នាទី ថ្ងៃទី១៧ ខែមិថុនា ឆ្នាំ២០១៧ ស្ថិតនៅក្នុងក្រុងសៀមរាប ខេត្តសៀមរាប និងខេត្តបន្ទាយមានជ័យ ។ តាមប្រភពពីសមត្ថកិច្ចនគរបាលខេត្តសៀមរាបបានប្រាប់ថា ក្នុងប្រតិបត្តិការបង្ក្រាបករណីជួញដូរ និងប្រើប្រាស់នោះគឺធ្វើរយៈពេល២ថ្ងៃ នៅទីតាំង៣ផ្សេងគ្នា ៖ ទីតាំងទី០១ បង្ក្រាបបាននៅបន្ទប់ជួល ភូមិវត្តបូព៌ សង្កាត់សាលាកំរើក ក្រុងសៀមរាប ខេត្តសៀមរាប ទីតាំងទី០២ បង្ក្រាបនៅលំនៅដ្ឋាន ភូមិខ្នារ សង្កាត់ជ្រាវ ក្រុងសៀមរាប ខេត្តសៀមរាប និងទីតាំងទី០៣ បង្ក្រាបនៅលំនៅដ្ឋាន ក្រុមទី០៦ ភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ រហូតឈានដល់ធ្វើការ ឃាត់ខ្លួនបានមេខ្លោងនិងបក្សពួកស្រីប្រុស ចំនួន០៦នាក់ ។
បន្ទាប់ពីកម្លាំងជំនាញបានធ្វើការឃាត់ខ្លួនក្នុងនោះ ដកហូតបានវត្ថុតាងរួមមាន ៖ ម្សៅមេតំហ្វេតាមីន ប្រភេទទឹកកក ចំនួន១៤កញ្ចប់ ស្មើនឹងទំងន់១០៨ក្រាម ទាំងសំបក, ទូរស័ព្ទដៃចំនួន០៨គ្រឿង , Ipad ចំនួន២គ្រឿង លុយដុល្លារចំនួន១៥០$, លុយខ្មែរចំនួន៤០ម៉ឺនរៀល, ឧបករណ៍ប្រើប្រាស់ និងសម្ភារវេចខ្ចប់ថ្នាំញៀនមួយចំនួនធំផងដែរ ។ បច្ចុប្បន្នជនសង្ស័យប្រុស ស្រីទាំង៦នាក់ និងវត្ថុតាង ត្រូវបានកម្លាំងជំនាញកំពុងរៀបចំសំណុំរឿងបញ្ចូនទៅសាលាដំបូងខេត្ត ដើម្បីចាត់ការបន្តទៅតាមនីតិវិធីច្បាប់ ៕
ចែករំលែកព័តមាននេះ