រាជធានីភ្នំពេញ ៖ មន្ត្រីក្រសួងការពារជាតិនៅថ្ងៃទី១៩ ខែមិថុនា ឆ្នាំ២០១៧ បានថ្លែងថា ដើម្បីអបអរសាទរខួបអនុស្សាវរីយ៏លើកទី៥០ថ្ងៃបង្កើតទំនាក់ទំនងការទូតកម្ពុជា-វៀតណាម ២៤ មិថុនា ១៩៦៧- ២៤ មិថុនា ២០១៧ និងអនុវត្តតាមពិធីសារកិច្ចសហប្រតិបត្តិការរវាងក្រសួងការពារជាតិនៃប្រទេសទាំង២ កម្ពុជា-វៀតណាមប្រចាំឆ្នាំ២០១៧ នេះអគ្គនាយកដ្ឋានយោធសេវាក្រសួងការពារជាតិបានដាក់ចេញនូវផែនការណែនាំស្តីពីការរៀបចំបំផុសចលនាផ្នែកនិពន្ធអក្សរសិល្ប៏សិល្បៈក្នុងនោះមានការនិពន្ធរឿងខ្លី ចំរៀង គំនូរ រូបថត និងភាពយន្តឯកសារ នៅទូទាំងកងខេមរភូមិន្ទ ។
លោកនាយឧត្តមសេនីយ៏ មាស សាវ៉ន អគ្គនាយកអគ្គនាយកដ្ឋានយោធសេវាក្រសួងការពារជាតិបានបញ្ជាក់ក្នុងការណែនាំឲ្យដឹងថា ក្រោមប្រធានបទ «ចំណងយុទ្ធសាមគ្គីភាពប្រទេសទាំង៣កម្ពុជា-វៀតណាម-ឡាវ» រាល់ខ្លឹមសារស្នាដៃបទនិពន្ធទាំងអស់ត្រូវលើកកោតសរសើរនូវយុទ្ធសាមគ្គីភាពរវាង ប្រទេសទាំង៣ក្នុងការរួមគ្នាប្រឆាំងនឹងបរទេសឈ្លានពានក៏ដូចបុព្វហេតុកសាង និងការពារមាតុភូមិ ។
លោកបានបន្តទៀតថា ប្រភេទនៃការបំផុសចលនាមានស្នាដៃ៥ប្រភេទគឺ ផ្នែកអក្សរសិល្ប៍ជាស្នាដៃនិពន្ធរឿងខ្លី ដែលជារឿងពិតរបស់បុគ្គល ឬអង្គភាពដោយមិនចំលងស្នារដៃអ្នកដទៃ ។ ផ្នែកចម្រៀងជាបទថ្មីមានបទភ្លេង និងបទចំរៀងគ្រប់គ្រាន់សរសេរច្បាស់លាស់ ។ ផ្នែកគំនូរ ជាគំនូរផ្សព្វផ្សាយ ច្នៃប្រឌឹតថ្មីមិនចំលងតាមគំនិតអ្នកដទៃ ឬស្នាដៃគំនូររបស់អ្នកផ្សេងៗ ។ ផ្នែករូបថត រាល់ស្នាដៃនិពន្ធគឺរូបភាពបែបព័ត៌មាន ឬរូបភាពសិល្បៈជាស្នាដៃថ្មី ស្មោះត្រង់ ច្បាស់លាស់ ត្រូវតាមខ្លឹមសារដោយមិនចំលងតាមស្នាដៃអ្នកដទៃ ។ ផ្នែកភាពយន្តឯកសារ មានខ្លឹមសារសមស្របជាមួយប្រធានបទអាចតាក់តែងម្នាក់ ឬក៏ជាក្រុមដោយគ្មានពាក់ព័ន្ធនឹងកម្មសិទ្ធិបញ្ញារបស់អ្នកដទៃឡើយ ។
លោក មាស សាវ៉ន បានបញ្ជាក់ថែមទៀតថា ចំពោះមុខសញ្ញាចូលរួមគឺយោធិននៃ ខ.ភ.ម និងអតីតយុទ្ធជនទាំងអស់មិនថាជាអ្នកនិពន្ធជំនាញ ឬមិនជំនាញឡើយ ។ សមាជិកគណៈកម្មាការបំផុសចលនា ឬអនុគណៈកម្មាការបច្ចេកទេសត្រូវបានអនុញ្ញាត្តឲ្យចូលរួមផងដែរ ។ ហើយចំពោះសមាជិកណាដែលមានស្នាដៃបទនិពន្ធ គឺមិនបានអនុញ្ញាតឲ្យចូលរួមធ្វើការពិនិត្យ និងវាយតំលៃស្នាដៃខ្លួនឯងឡើយ ៕
ចែករំលែកព័តមាននេះ