រាជធានីភ្នំពេញ ៖ កាលពីថ្ងៃសៅរ៍ចុងសប្តាហ៍មុន រាជរដ្ឋាភិបាលបានសម្រេចទូលថ្វាយព្រះមហាក្សត្រធ្វើការផ្លាស់ប្តូរ អភិបាលរាជ ធានី-ខេត្តចំនួន៤ គឺរាជធានីភ្នំពេញ ខេត្តកំពង់ចាម ខេត្តត្បូងឃ្មុំ និងខេត្តកោះកុង ។ ជាការកត់សម្គាល់ពេញ១ថ្ងៃសៅរ៍ទី១៧ មិថុនា តាមបណ្តាញសង្គម និងតាមប្រភពព័ត៌មាននានាធ្វើការចាប់អារម្មណ៍ជុំវិញការផ្លាស់ប្តូរនេះ ។
យោងតាមព្រះរាជក្រឹត្យរួមគ្នាមួយព្រះករុណា ព្រះបាទសម្តេចព្រះ បរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដែលឡាយព្រះហស្ថលេខាថ្ងៃទី១៧ ខែមិថុនា ឆ្នាំ២០១៧ លោក ប៉ា សុជាតិវង្ស អភិបាលនៃគណៈអភិបាលរាជធានីភ្នំពេញ លោក ប្រាជ្ញ ចន្ទ អភិបាលខេត្តត្បូងឃ្មុំ លោក លន់ លឹមថៃ អភិបាលខេត្តកំពង់ចាម និងលោក ប៊ុន លើត អភិបាលខេត្តកោះកុង ត្រូវបានត្រាស់បង្គាប់តែងតាំងជាទីប្រឹក្សារាជរដ្ឋាភិបាលដែលមានឋានៈស្មើរដ្ឋមន្ត្រី គឺជាការដំឡើងឋានៈសម្រាប់ការប្តូរតំណែងនេះ។
ក្នុងព្រះរាជក្រឹត្យដោយឡែកៗពីគ្នាចំនួន៤ ព្រះករុណាក៏បានឡាយព្រះហស្ថលេខាលើ ព្រះរាជក្រឹត្យតែងតាំងអភិបាលរងរាជធានីភ្នំពេញ លោក ឃួង ស្រេង ជាអភិបាលនៃគណៈអភិបាលរាជធានីភ្នំពេញ ជំនួសលោក ប៉ា សុជាតិវង្ស ។ ចំណែកឯ លោក គួច ចំរើន អគ្គនាយករង នៃអគ្គនាយកដ្ឋានរដ្ឋបាលក្រសួងមហាផ្ទៃ ត្រូវបានព្រះមហាក្សត្រត្រាស់បង្គាប់តែងតាំងជាអភិបាលនៃគណៈអភិបាលខេត្តកំពង់ចាម ជំនួសលោក លន់ លឹមថៃ និង លោក លី ឡេង ត្រូវបានព្រះមហាក្សត្រត្រាស់បង្គាប់តែងតាំងជាអភិបាលនៃគណៈអភិបាលខេត្តត្បូងឃ្មុំ ។ ការតែងតាំងមួយដែលគួរឲ្យកត់សម្គាល់ គឺព្រះមហាក្សត្រក៏បានត្រាស់បង្គាប់តែងតាំង លោកស្រី មិថុនា ភូថង ជាអភិបាលនៃគណៈអភិបាលខេត្តកោះកុងជំនួសលោក ប៊ុន លើត ។
លោកជំទាវ មិថុនា ភូថង អាចចាត់ទុកជាស្ត្រីដំបូងគេក្នុងប្រវត្តិសាស្ត្រ ក្រោយការបោះឆ្នោតជាតិលើកទីមួយនាឆ្នាំ១៩៩៣ ដែលត្រូវបានតែងតាំងសម្រាប់តំណែងជាអភិបាលខេត្ត។ លោកជំទាវក៏ត្រូវបានដំឡើងឋានន្តរស័ក្តិពីវរមន្ត្រី ថ្នាក់លេខ៤ មកឋានន្តរស័ក្តិឧត្តមមន្ត្រី ថ្នាក់លេខ៦ នៃក្របខ័ណ្ឌមន្ត្រីរដ្ឋបាលជាន់ខ្ពស់ក្រសួងមហាផ្ទៃ ។ នេះបើយោងតាមព្រះរាជក្រឹត្យចុះថ្ងៃទី១៧ មិថុនា ឆ្នាំ២០១៧ ដែលបានចេញព្រមៗគ្នាជាមួយនឹងការតែងតាំងនេះ ។
លោកជំទាវ មិថុនា ភូថង ជាចៅស្រីពៅរបស់លោក សាយ ភូថង ដែលជាអ្នកតស៊ូប្រឆាំងនឹងរបបខ្មែរក្រហមនៅភាគខាងលិច និងជាអតីតមន្ត្រីជាន់ខ្ពស់របស់គណបក្សប្រជាជនកម្ពុជា ។ ក្នុងវ័យ៣៨ឆ្នាំ លោកជំទាវ មិថុនា ភូថង គឺជាស្ត្រីទីពីរដែលត្រូវកាន់តំណែងខ្ពស់ជាអភិបាលខេត្ត ដែលស្ត្រីដំបូងនោះ គឺលោកជំទាវ ឡាក់ អូន អតីតអភិបាលខេត្តរតនគិរីក្នុងសម័យរដ្ឋកម្ពុជា ដែលបច្ចុប្បន្នលោកជំទាវ ឡាក់ អូនគឺជាសមាជិកព្រឹទ្ធសភាមកពីគណបក្សប្រជាជនកម្ពុជា ។
ថ្លែងប្រាប់សារព័ត៌មានកោះសន្តិភាពកាលពីថ្ងៃអាទិត្យលោកជំទាវ មិថុនា ភូថង បានបង្ហាញនូវក្តីរំភើបរីករាយ ដែលបានទទួលការជឿទុកចិត្តពីព្រះមហាក្សត្រក៏ដូចជាប្រមុខរាជរដ្ឋាភិបាលដែលបានប្រគល់ភារកិច្ចនិងតួនាទីកំពូលក្នុងខេត្តដល់លោកជំទាវ ។
លោកជំទាវបានមានប្រសាសន៍ថា៖ «ខ្ញុំផ្ទាល់ពិតជាមានចិត្តរំភើប និងមានមោទនភាពសម្រាប់ខ្លួនខ្ញុំដែលទទួលបាននូវទំនុកចិត្តពីរាជរដ្ឋាភិបាល និងព្រះមហាក្សត្រដែលបានត្រាស់បង្គាប់តែងតាំងសម្រាប់មុខតំណែងមួយនេះ» ។
លោកជំទាវបានបន្តទៀតថា៖ «សម្រាប់ទស្សនះគំនិតរបស់នាងខ្ញុំគឺថា រាល់គ្រប់ភារកិច្ចសុទ្ធតែមានឧបសគ្គ តែនាងខ្ញុំនឹងព្យាយាមឲ្យអស់លទ្ធភាពក្នុងការបំពេញការងារនិងអនុវត្តតាមច្បាប់នៃព្រះរាជាណាចក្រកម្ពុជា ជាពិសេសច្បាប់នៃការគ្រប់គ្រងរដ្ឋបាលនីមួយៗ»។លោកជំទាវ មិថុនា ភូថង បានបញ្ចប់ការសិក្សាអនុបណ្ឌិតជំនាញខាងច្បាប់រដ្ឋបាលសាធារណៈពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នៅឆ្នាំ២០១២ ។ ដោយមានការជំរុញពីថ្នាក់ដឹកនាំក្នុងខេត្ត លោកជំទាវបានក្លាយជាសមាជិកក្រុមប្រឹក្សាខេត្តនាឆ្នាំ២០០៩ ហើយត្រូវបានតែងតាំងជាអភិបាលរងខេត្តកោះកុងនៅខែឧសភា ឆ្នាំ២០១៦ ។
លោកជំទាវបានបញ្ជាក់ថា ៖ «អ្វីដែលសំខាន់សម្រាប់ខ្ញុំគឺពង្រឹងការអនុវត្តច្បាប់ ដើម្បីអនុវត្តឲ្យបានល្អនូវអ្វីដែលរាជរដ្ឋាភិបាលបានដាក់ចេញ ជាពិសេសគឺអនុវត្តតាមបទបញ្ជារបស់សម្តេចនាយករដ្ឋមន្ត្រីដែលថា ការងារមួយដំណើរការទៅបានល្អ គឺត្រូវមានការចូលរួមពីមន្ត្រីមានសមត្ថភាព ។ នាងខ្ញុំចង់បញ្ជាក់ថា គឺការពង្រឹងនូវការងារដែលរាជរដ្ឋាភិបាលបានទម្លាក់ឱ្យមូលដ្ឋាននិងខិតខំឲ្យគាត់មានទំនុកចិត្តតាមដោយការពង្រឹងធនធានមនុស្សនៅវិស័យរដ្ឋបាល និងឯកជន » ។
លោកជំទាវបានបង្ហាញជំនឿមុតមាំថា នឹងមានស្ត្រីដែលមានសមត្ថភាពច្រើនរូបទៀត នឹងទទួលបានទំនុកចិត្ត និងការតែងតាំងសម្រាប់តួនាទីជាអភិបាលខេត្ត ។អ្វីដែលគួរឲ្យចាប់អារម្មណ៍មួយទៀតនោះ គឺការតែងតាំងអភិបាលនៃគណៈអភិបាលរាជធានីភ្នំពេញថ្មីថា តើអភិបាលក្រុងថ្មី លោក ឃួង ស្រេង ដែលនឹងឡើងកាន់តំណែងនាពេលខ្លីខាងមុខនេះ នឹងធ្វើឲ្យទីក្រុងមួយនេះល្អប្រសើរជាងមុន ឬក៏យ៉ាប់យឿនជាងមុន ព្រោះទីក្រុងគជ់មួយនេះត្រូវបានរិះគន់ពាក់ព័ន្ធនឹងជំនន់ទឹកភ្លៀង ជាពិសេសតើលោកអាចដោះស្រាយបញ្ហាចម្បងដែលការយកចិញ្ចើមផ្លូវមួយចំនួនធំនៅរាជធានីភ្នំពេញសម្រាប់ធ្វើការលក់ដូរ ជាចំណតរថយន្ត និងយានយន្តសម្រាប់ភោជនីយដ្ឋាន និងអគារពាណិជ្ជកម្មផ្សេង ក៏ដូចជាបញ្ហានៃការកកស្ទះចរាចរណ៍តាមដងវិថី និងមហាវិថីនានាក្នុងរាជធានីភ្នំពេញ រាប់ទាំងបញ្ហាសំរាម ការយកថ្លៃសំរាមស្រេចតែចិត្តក្រុមហ៊ុន ទុកឱ្យក្រុមហ៊ុនឈ្មោះស៊ីនទ្រីធ្វើព្យុះធ្វើភ្លៀង គឺជាបញ្ហាចម្បងផងដែរ ។
លោក ឃួង ស្រេង មិនអាចទំនាក់ទំនងបានទេ កាលពីថ្ងៃម្សិលមិញនេះ ។ ទោះបីជាមានការតែងតាំងត្រូវបានបង្ហាញជាសាធារណេៈក៏ដោយ តែពិធីផ្ទេរនិងដំឡើងតំណែងជាផ្លូវការនៅមិនទាន់បានរៀបចំជាផ្លូវការនៅឡើយទេ ។
លោកស្រី ធីតា ឃឹះ នាយិកាប្រតិបត្តិនៃអង្គការសីលការ បានមានប្រសាសន៍ថា លោកជំទាវចូលរួមអបអរសារទរ សម្រាប់ការតែងតាំងឲ្យមានស្ត្រីនៅក្នុងជួរថ្នាក់ដឹកនាំខេត្ត-រាជធានី ហើយលោកស្រីសង្ឃឹមថា នឹងមានស្ត្រីមានសមត្ថភាពច្រើនរូបទៀត នឹងត្រូវបានតែងតាំងសម្រាប់មុខតំណែងជាអភិបាលរាជធានី-ខេត្ត ព្រោះចាប់តាំងពីឆ្នាំ១៩៩៣ដល់បច្ចុប្បន្ននេះ លោកជំទាវ មិថុនា ភូថង គឺជាស្ត្រីទីមួយដែលត្រូវបានតែងតាំងជាអភិបាលនៃគណៈអភិបាលខេត្តកោះកុង ។
លោកស្រី ធីតា ឃឹះ បានបញ្ជាក់ថា៖ «ខ្ញុំសង្ឃឹមថានឹងមានស្ត្រីជាច្រើនរូបទៀត នឹងត្រូវបានតែងតាំងជាអភិបាលខេត្ត-រាជធានី មិនមែនមានត្រឹមតែគាត់ម្នាក់នោះទេ ។ ជាពិសេសខ្ញុំសង្ឃឹមថានឹងមានការគាំទ្រគាត់ពីបណ្តាថ្នាក់ដឹកនាំ និងមន្ត្រីនៅខេត្តនោះក្នុងកិច្ចសហប្រតិបត្តិការល្អជាមួយគាត់ ធ្វើយ៉ាងណាកុំឲ្យស្ត្រីអភិបាលខេត្តទី១ ត្រូវបរាជ័យការងារ មិនមែនដោយសារគ្មានសមត្ថភាពនោះទេ តែគឺការបាក់ទឹកចិត្តដោយសារតែគ្មានកិច្ចសហប្រតិបត្តិការល្អពីបណ្តាអភិបាលរងបុរស ឬថ្នាក់ដឹកនាំផ្សេងៗទៀត ដែលប្រមុខរាជរដ្ឋាភិបាលបានបង្ហាញពីភាពលើកស្ទួយដល់ស្ត្រី ។
លោកស្រីបានបន្តទៀតថា ពីដើមក៏មានថ្នាក់ដឹកនាំស្ត្រីក្នុងតួនាទីជាអភិបាលខេត្តមួយចំនួនផងដែរ ។ សម្រាប់តួនាទីជាអភិបាល
រងខេត្តជាស្ត្រី គឺមានគ្រប់ខេត្ត-ក្រុងដែលសបញ្ជាក់ឲ្យឃើញថា «ពួកគាត់ជាអភិបាលរងមានសមត្ថភាព មានឱកាសធ្វើការបានល្អ»៕
ចែករំលែកព័តមាននេះ