ខេត្តបន្ទាយមានជ័យ ៖ ពីមួយឆ្នាំទៅមួយឆ្នាំ ទំហំពាណិជ្ជកម្មទ្វេភាគីរវាងកម្ពុជា-ថៃ ខុសគ្នារាប់ពាន់លានដុល្លារ ដោយសារតែកម្ពុជានាំចូលច្រើនជាងនាំចេញ ។ មួយវិញទៀត កម្ពុជាក៏ពុំទាន់មានផលិតផលអ្វីដែល
ខេត្តបន្ទាយមានជ័យ ៖ ពីមួយឆ្នាំទៅមួយឆ្នាំ ទំហំពាណិជ្ជកម្មទ្វេភាគីរវាងកម្ពុជា-ថៃ ខុសគ្នារាប់ពាន់លានដុល្លារ ដោយសារតែកម្ពុជានាំចូលច្រើនជាងនាំចេញ ។ មួយវិញទៀត កម្ពុជាក៏ពុំទាន់មានផលិតផលអ្វីដែលជាតម្រូវការចាំបាច់ ក្រៅពីសម្លៀកបំពាក់ ត្រី សាច់ បន្លែ និងកសិផលមួយចំនួនឡើយ ។ ចំណែកការនាំចូលពីប្រទេសថៃវិញ គឺផ្គត់ផ្គង់ស្ទើរតែគ្រប់វិស័យ បូករួមទាំងឧស្សាហកម្មធុនធ្ងន់ផងដែរ។ កត្ដាទាំងនេះហើយធ្វើឲ្យឱនភាពពាណិជ្ជកម្មទ្វេភាគីរវាងប្រទេសទាំងពីរមិនសមមាត្រ និងខុសគ្នាដាច់ ។
បើតាមលោក សៀន ស៊ីណាត ប្រធានសាខាកាំកុងត្រូលខេត្តបន្ទាយមានជ័យបានឲ្យដឹងថា រាល់ថ្ងៃ ទំនិញកម្ពុជាដែលនាំចូលទៅថៃតាមច្រកទ្វារអន្តរជាតិប៉ោយប៉ែត រួមមាន សម្លៀកបំពាក់ដែលផលិតក្នុងស្រុក ត្រី បន្លែ និងកសិកផលមួយចំនួនទៀត ។ ចំណែកទំនិញថៃនាំចូលរួមមាន គ្រឿងអេឡិចត្រូនិក, គ្រឿងសំណង់ ដែក ស៊ីម៉ងត៍ និងសម្ភារផ្គត់ផ្គង់វិស័យសំណង់ផ្សេងទៀត, គ្រឿងអគ្គិសនី គ្រឿងឧបភោគបរិភោគ បន្លែ ផ្លែឈើ និងផលិតផលថែរក្សាសម្ផស្សជាច្រើនទៀត និយាយជារួមគឺនាំចូលស្ទើរគ្រប់វិស័យ ។
ទន្ទឹមនឹងនេះ គេសង្កេតឃើញថា ជារឿយៗ នៅពេលកម្ពុជានាំទំនិញចូលទៅប្រទេសថៃ គឺត្រូវបានភាគីថៃរឹតបណ្ដឹងមិនថា សម្លៀកបំពាក់ទេ សូម្បីតែកសិកផលនានាក៏ត្រូវឆ្លងកាត់ការត្រួតពិនិត្យល្អិតល្អន់ដែរ។ ចំណែកភាគីថៃនាំចូលវិញ គឺដំណើរការយ៉ាងរលូន និងគ្មានឧបសគ្គអ្វីឡើយ ។
ក្រុមអាជីវករកម្ពុជាដែលនាំទំនិញចូលទៅលក់នៅតាមជាយដែនបានលើកឡើងថា ៖ « វាដូចជាអយុត្តិធម៌ពេកហើយសម្រាប់ប្រជាពលរដ្ឋខ្មែរដែលនាំទំនិញចូលទៅលក់នៅប្រទេសថៃតាមជាយដែនត្រូវភាគីថៃធ្វើបាបតាមតែអំពើចិត្ត តែភាគីថៃនាំចូលដោយសេរី គ្មានកើតទុក្ខបុកម្នេញអ្វីឡើយ » ។
លោក វួច អូន ប្រធានគណៈកម្មាធិការច្រកទ្វារអន្តរជាតិប៉ោយប៉ែតបានបញ្ជាក់ថា ទំនិញដែលកម្ពុជានាំចេញ គឺមានតិចតួចណាស់ក្រៅពីទំនិញក្រុមហ៊ុននាំចេញ តែទំនិញថៃនាំមកកម្ពុជាវិញ មានទំនិញចម្រុះច្រើនរាល់ថ្ងៃ ។ យ៉ាងណាក៏ដោយ លោកសុំឲ្យស្ថាប័នមន្ត្រីជំនាញមានកាំកុងត្រូល គួរតែយកចិត្តទុកត្រួតពិនិត្យបន្ថែមទៀតរាល់ទំនិញនាំចូលនានា ពិសេសគ្រឿងឧបភោគបរិយោគ ដើម្បីការពារសុខភាពប្រជាពលរដ្ឋ ។
តាមរបាយការណ៍ពាណិជ្ជកម្មពីស្ថានឯកអគ្គរាជទូតថៃប្រចាំកម្ពុជា បានបង្ហាញថា ទំហំពាណិជ្ជកម្មកម្ពុជា-ថៃក្នុងឆ្នាំ២០១៦មានចំនួនប្រមាណ៥,៦ប៊ីលានដុល្លារ ហើយនៅឆ្នាំ២០១៧នេះ ប្រទេសទាំងពីរសង្ឃឹមថា ទំហំពាណិជ្ជកម្មនឹងកើនទឹកប្រាក់ដល់៥,៨ប៊ីលានដុល្លារ ។ ទន្ទឹមនឹងនេះ នៅឆ្នាំ២០២០ឬ៣ឆ្នាំខាងមុខ ថ្នាក់ដឹកនាំនៃប្រទេសទាំងពីរបានប្ដេជ្ញាធ្វើយ៉ាងណា នឹងជំរុញទំហំពាណិជ្ជកម្មនៃប្រទេសទាំងពីរឱ្យកើនឡើង៣ដង ៕
ចែករំលែកព័តមាននេះ