ខេត្តបាត់ដំបង ៖ យ៉ាងហោចណាស់មនុស្ស២នាក់បានស្លា.ប់ និងម្នាក់ទៀតរងរបួសធ្ងន់ដោយសាររថយន្ត២គ្រឿងបុកគ្នាទាំងកំរោលកាលពីវេលាម៉ោង១២យប់ ថ្ងៃទី១៧ ខែមិថុនា ឆ្នាំ២០១៧
ខេត្តបាត់ដំបង ៖ យ៉ាងហោចណាស់មនុស្ស២នាក់បានស្លាប់ និងម្នាក់ទៀតរងរបួសធ្ងន់ដោយសាររថយន្ត២គ្រឿងបុកគ្នាទាំងកំរោលកាលពីវេលាម៉ោង១២យប់ ថ្ងៃទី១៧ ខែមិថុនា ឆ្នាំ២០១៧ នៅលើផ្លូវជាតិលេខ៥ ត្រង់ចំណុចភូមិហៃសាន ឃុំជ្រៃ ស្រុកថ្មគោល ដែលគេសង្ស័យថា អ្នកបើកបរងងុយដេកមួយភាំង ខណៈកំពុងធ្វើដំណើរបញ្ច្រាសទិសគ្នាពីកើតទៅលិច ។
លោក ម៉ែន បូរី នាយផ្នែកដំណោះស្រាយនៃការិយាល័យចរាចរណ៏ខេត្តបានឲ្យដឹងថា ហេតុការណ៍គ្រោះថ្នាក់ចរាចរណ៏នេះបង្កឡើងដោយរថយន្តម៉ាកកាមរីពណ៏ខ្មៅ ពាក់ស្លាកលេខ បាត់ដំបង 2A-5810 ដែលបើកបរដោយឈ្មោះ អឹម រី អាយុ៣៦ឆ្នាំ នៅខេត្តពោធិ៍សាត់បានរ៉េចង្កូតទៅបុករថយន្តដឹកអ្នកដំណើររបស់ក្រុមហ៊ុន«ហ្គោលវីអាយភី» ដែលកំពុងធ្វើដំណើរបញ្ច្រាសទិសគ្នាពីកើតទៅលិច ។ លោក ម៉ែន បូរី បាននិយាយទៀតថា ឧប្បតិហេតុនេះបានបង្កឲ្យមនុស្ស២នាក់បានស្លាប់ និងម្នាក់ទៀតរងរបួសធ្ងន់ ។
លោកនាយផ្នែកដំណោះស្រាយនៃការិយាល័យចរាចរណ៏ខេត្តបានបញ្ជាក់ថា បើពិនិត្យលើស្លាកស្នាមនៅចំណុចកើតហេតុគឺភាគីរថយន្តកាមរីបានជ្រុលចង្កូតទៅខាងឆ្វេងដៃរបស់ខ្លួនទៅបុករថយន្តដឹកអ្នកដំណើរតែម្ដងដែលទំនងអ្នកបើកបរដេកលក់មួយភាំង ។ លោកបានបញ្ជាក់បន្ថែមថា ជនរងគ្រោះដែលស្លាប់នៅលើរថយន្តក្រុងគឺដោយសារតែជនរងគ្រោះជិតដល់ផ្ទះហើយដើរមកឈរក្បែរទ្វារថយន្តខាងមុខក្បែរតៃកុងទើបត្រូវរថយន្តកាមរីបុកចំពីមុខបណ្ដាលឲ្យស្លាប់បែបនេះ ។ ក្រោយពីវាស់វែង មន្ត្រីជំនាញបាននាំយករថយន្តទាំង២គ្រឿងទៅកាន់ការិយាល័យចរាចរណ៏ខេត្តដើម្បីដោះស្រាយតាមនីតិវិធី ៕
ចែករំលែកព័តមាននេះ