រាជធានីភ្នំពេញ ៖ រាជរដ្ឋាភិបាលចាត់ទុកវិស័យអចលនទ្រព្យនិងសំណង់ ជាសសរស្តម្ភដ៏សំខាន់មួយក្នុងការជំរុញកំណើនសេដ្ឋកិច្ចជាតិ។ នៅឆ្នាំ២០១៦ទាំងមូល ទុនវិនិយោគលើវិស័យនេះបានកើនឡើងជាង៥,៥ពាន់លានដុល្លារ ស្មើនឹងកំណើន៦៧% ខណៈរយៈពេល៥ខែដើមឆ្នាំ២០១៧នេះ មានកំណើនប្រមាណ២០% បើធៀបនឹងរយៈពេលដូចគ្នាកាលពីឆ្នាំមុន ។ ដោយសារសន្ទុះនៃកំណើននេះ វិនិយោគិន ក៏ដូចជាសេដ្ឋវិទូកម្ពុជា មើលឃើញថា វិស័យមួយនេះ មិនមានអ្វីគួរឲ្យព្រួយបារម្ភនោះទេ និងចេះតែបន្ដដំណើរទៅមុខ ដោយគ្មានអ្វីរាំងស្ទះ ។
លោកឧកញ៉ា នួន រិទ្ធី នាយកក្រុមហ៊ុន KFA មានប្រសាសន៍ថា ប៉ុន្មានខែចុងក្រោយនេះ ការសាងសង់ក្នុងវិស័យអចលនវត្ថុកម្ពុជា មានដំណើរការធម្មតា ។ ជាក់ស្តែង នៅប៉ុន្មានខែដើមឆ្នាំនេះ បើយើងប្រៀបធៀបទៅនឹងប៉ុន្មានខែដើមឆ្នាំមុន ទុនវិនិយោគក្នុងវិស័យមួយនេះកើនជាង៤ពាន់លានដុល្លារ ។ ដូចនេះ បើយើងមើលសន្ទុះនៃការសាងសង់ អត់មានគម្រោងណាមួយអាក់ខានទេ។
លោកឧកញ៉ាថ្លែងថា ៖ « សុខភាពនៃវិស័យអចលនវត្ថុកម្ពុជា យើងសង្កេតឃើញថា គ្មានអ្វីគួរឱ្យព្រួយបារម្ភទេ ដោយសារវិនិយោគិននៅតែបន្តចាប់អារម្មណ៍ទៅលើការវិនិយោគនៅប្រទេសកម្ពុជា ជាពិសេស នៅតំបន់សំខាន់ៗ តួយ៉ាង ខេត្តព្រះសីហនុ ថ្មីៗនេះយើងឃើញវិនិយោគិនចិនច្រើនកំពុងបោះទុនអភិវឌ្ឍន៍២ទៅ៣គម្រោងទៀត » ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ យល់ថា កំណើន២០%ដែលវិស័យអចលនទ្រព្យទទួលបានរយៈពេល៥ខែដើមឆ្នាំនេះ វាបង្ហាញពីភាពរឹងមាំ និងវិជ្ជមាននៅក្នុងវិស័យសំណង់ ហើយប្រទេសកម្ពុជាត្រូវការពេលវេលាសម្រាប់ការសាងសង់ យ៉ាងហោចណាស់ប្រហែល៣០ឆ្នាំទៀត ។
លោកបណ្ឌិត ម៉ី កល្យាណ គូសបញ្ជាក់ថា ៖ « សេដ្ឋកិច្ចកម្ពុជាមួយរយៈចុងក្រោយនេះនៅមានដំណើរការធម្មតា គ្មានអ្វីប្រែប្រួលទេ មានន័យថា វាមានកំណើនធម្មតា៧%ក្នុងមួយឆ្នាំ ហើយរាជរដ្ឋាភិបាលដឹងអ្វីដែលត្រូវធ្វើ ដូចជា ទាក់ទងនឹងរឿងហេដ្ឋារចនាសម្ព័ន្ធ ធនធានមនុស្ស អគ្គិសនី ធ្វើយ៉ាងម៉េច ឱ្យខ្មែរមានការប្រកួតប្រជែងល្អជាងមុន ។ ជាទូទៅ សេដ្ឋកិច្ចកម្ពុជា ខ្ញុំយល់ឃើញថា វាចេះតែបន្តធ្វើដំណើរទៅមុខ គ្មានអ្វីមករាំងស្ទះទេ » ។
យោងតាមលោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានឱ្យដឹងកាលពីថ្ងៃទី១៥ មិថុនា ថា៖ « ក្នុងឆ្នាំ២០១៦កន្លងទៅនេះ ទុនវិនិយោគក្នុងវិស័យសំណង់មានទឹកប្រាក់ប្រមាណ៥.៥៨០លានដុល្លារ បើធៀបនឹងឆ្នាំ២០១៥ មានកំណើន៦៧,១៥% ។ ចំណែករយៈពេល៥ខែដើមឆ្នាំ២០១៧ មានទឹកប្រាក់ប្រមាណ៤.៣៦២លានដុល្លារ កើនឡើងប្រមាណ២០% បើធៀបនឹងរយៈពេលដូចគ្នានៃឆ្នាំ២០១៦ ហើយព្យាករថា វិស័យសំណង់នេះនឹងនៅតែរក្សាបានកំណើនល្អបន្តទៀត » ៕
ចែករំលែកព័តមាននេះ