បងអើយ ! អូនខ្ចីម៉ូតូតែមួយភ្លែតទេ មានអីទៅបាត់រហូត(មានវីដេអូ)
រាជធានីភ្នំពេញ ៖ យុវជនវ័យ១៧ម្នាក់មានទំនាក់ទំនងស្នេហាជាមួយនឹងនារីវ័យ២០ឆ្នាំម្នាក់ហើយបានយកគ្នាធ្វើជាសង្សារ
រាជធានីភ្នំពេញ ៖ យុវជនវ័យ១៧ម្នាក់មានទំនាក់ទំនងស្នេហាជាមួយនឹងនារីវ័យ២០ឆ្នាំម្នាក់ហើយបានយកគ្នាធ្វើជាសង្សារ លុះមួយរយៈក្រោយមកស្រាប់តែនាងជាសង្សារបណ្ដូលចិត្តដែលគេស្រឡាញ់បាត់មុខមិនបាននោះបែរជាក្បត់ចិត្ត ក្បត់ទាំងស្នេហ៍ ដោយបានប្រើល្បិចលួងលោមខ្ចីម៉ូតូជិះដោយប្រើពាក្យសម្ដីយ៉ាងផ្អែមល្ហែមថា «បងអើយ! អូនខ្ចីម៉ូតូតែមួយភ្លែតទេ ជិះទៅដឹកមិត្តភក្ដិទៅសមាគមន៏» ប៉ុន្តែមិនបានប្រាប់ថា ទៅសមាគមន៏អីនៅឯណានោះឡើយ ។ ដោយសារតែស្រឡាញ់នាងដល់ផ្អឹងពេកម្យ៉ាងបើមិន ឲ្យខ្ចីខ្លាចនាងខឹងលែងស្រឡាញ់ផងនោះភ្លេចគិតវែងឆ្ងាយ និងគ្មានការសង្ស័យថា ត្រូវនាងបោកក៏បានឲ្យខ្ចី បន្ទាប់មកនារីរូបនោះក៏បានយកម៉ូតូជិះទៅបាត់ហើយរយៈពេល១ខែក្រោយមកគឺនៅថ្ងៃទី១៧ ខែមិថុនា ឆ្នាំ២០១៧ ទើបធ្វើដំណើរទៅប្ដឹងនគរបាលប៉ុស្ដិ៍ចោមចៅឲ្យជួយអន្តរាគមន៏ ។
យុវជនដែលជួបស្នហ៍បោកប្រាស់បោកទាំងទ្រព្យសម្បត្តិទៀតនោះឈ្មោះ បូ សុផារ៉ាន់ អាយុ១៧ឆ្នាំ មុខរបរជាអ្នកលក់ទឹកសុទ្ធ ស្នាក់នៅក្នុងភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ និងមានស្រុកកំណើតនៅក្នុងភូមិបរព្រៃ ឃុំបរព្រៃ ស្រុកស៊ីធរកណ្តាល ខេត្តព្រៃវែង ដែលបានបាត់ម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០០៨ ពណ៌ខ្មៅពាក់ស្លាកលេខ ភ្នំពេញ1AE- 0017 ។ ដោយឡែកនារីដែលជាសង្សារជើងល្អឈ្មោះ ស្លាក់ គុណ អាយុជាង២០ឆ្នាំ ស្នាក់នៅក្នុងសង្កាត់ទួលសង្កែ ខណ្ឌឬស្សីកែវ ។
នគរបាលបាននិយាយថា យុវជនរងគ្រោះ និងនារីម្នាក់នោះបានទាក់ទងស្នេហាជាមួយគ្នាមួយរយៈពេលមកហើយដោយបានស្រឡាញ់គ្នាខ្លាំងណាស់ និងប្រើពាក្យពេចន៍អូនបងជាមួយគ្នាយ៉ាងផ្អែមដូចទឹកឃ្មុំខែចេត្រ ប៉ុន្តែមិនបានដឹងថា តើពួកគេទាំងពីរនាក់ឈានដល់ការក្រេបទឹកឃ្មុំជាមួយគ្នាឬអត់នោះឡើយ ព្រោះនៅក្នុងខណៈនោះយុវជនខាងលើហាក់មានការលាក់លៀមច្រើនមិនសូវជានិយាយបើកចំហរឲ្យដឹងច្បាស់នោះឡើយ ។ ទោះបីជាបែបណាយុវជននោះនៅតែរង់ចាំសង្សារយកម៉ូតូទៅឲ្យរហូតមិនបានប្ដឹងនគរបាលភ្លាៗនោះទេ ប៉ុន្តែក្រោយពេលចាំបាត់ៗរយៈពេល១ខែហើយនៅតែមិនឃើញទៀតនោះ ទើបសម្រេចចិត្តឲ្យឪពុកជូនទៅកាន់ប៉ុស្ដិ៍នគរបាលចោមចៅដាក់ពាក្យបណ្ដឹង ហើយយុវជននោះក៏បានលាក់លៀមជាមួយឪពុកខ្លួនដែរដោយនៅពេលបែកការណ៍បានប្រាប់ឪពុកថា ទើបបាត់ម៉ូតូ៤ថ្ងៃប៉ុណ្ណោះ ៕
ចែករំលែកព័តមាននេះ