សារព័ត៌មានបរទេសកាលពីពេលថ្មីៗកន្លងមកផ្សាយថា លោកតា Suratman ត្រូវចោរប្លន់កាលពីពេលថ្មីៗកន្លងមក ខណៈពេលគាត់រុញរទេះលក់ចេកនៅក្រុងមួយរបស់ខេត្តចាំប៊ី (Jambi)លើកោះស៊ូម៉ាត្រា ។ រថយន្តមួយគ្រឿងចតក្បែរ និងហៅឱ្យលោកតាឡើងជិះរថយន្តពិភាក្សារឿងទិញ-លក់ចេក ។ នៅពេលលោកតាឡើងលើរថយន្ត បុរស២នាក់បង្ខំឱ្យគាត់ប្រគល់ប្រាក់ទាំងអស់ដល់ពួកគេ រួចហើយក៏រុញគាត់ចេញវិញ ។
លោកថុមមី រ៉េហ្សា អ្នកនៅកន្លែងកើតហេតុបានឮសម្រែកឱ្យជួយ ហើយបន្ទាប់មកឃើញលោកតាSuratmanឈរយំ ។
លោកថុមមី រ៉េហ្សា បានបង្ហោះតាមហ្វេសប៊ុករៀបរាប់រឿងដែលកើតឡើងកាលពីថ្ងៃទី៦ មិថុនា ២០១៧ បញ្ជាក់ថាលោកតាSuratmanមានបំណងយកប្រាក់ដែលលក់បានទៅទិញសម្ភារប្រើប្រាស់ក្នុងផ្ទះ ប៉ុន្តែត្រូវចោរប្លន់អស់ ដូច្នេះសូមសប្បុរសជនជួយឧបត្ថម្ភដល់គាត់ផង ។
លោករ៉េហ្សា សហការជាមួយមិត្តភក្តិប្រមែប្រមូលប្រាក់ជួយគាត់ដោយមានអ្នកស្រុក បរិច្ចាគសរុប៣៧លានរូពី(ប្រាក់ឥណ្ឌូណេស៊ី)ឬប្រហែល៣០០០ដុល្លារ ។ ក្រោយមកអាជ្ញាធរមូលដ្ឋានបរិច្ចាគប្រាក់៥លានរូពី ឬប្រហែល៤០០ដុល្លារ រួមទាំងទិញចេកដែលនៅសល់របស់គាត់ ៕
ចែករំលែកព័តមាននេះ