ខេត្តស្ទឹងត្រែង ៖ អ្នកទេសចរដែលទៅកម្សាន្តនៅរមណីយដ្ឋានធម្មជាតិ «ទឹកធ្លាក់ព្រះនិមិ្មត» ត្រូវប្រុងប្រយ័ត្នពេលងូតទឹកលេងកម្សាន្ត ព្រោះរដូវវស្សា ទឹកភ្លៀងធ្លាក់ច្រើនបណ្តាលឱ្យជន់ជោរ ហូរបោកបក់ខ្លាំង ។
ខេត្តស្ទឹងត្រែង ៖ អ្នកទេសចរដែលទៅកម្សាន្តនៅរមណីយដ្ឋានធម្មជាតិ «ទឹកធ្លាក់ព្រះនិមិ្មត» ត្រូវប្រុងប្រយ័ត្នពេលងូតទឹកលេងកម្សាន្ត ព្រោះរដូវវស្សា ទឹកភ្លៀងធ្លាក់ច្រើនបណ្តាលឱ្យជន់ជោរ ហូរបោកបក់ខ្លាំង ។
នារដូវវស្សានេះនៅរមណីយដ្ឋានទឹកធ្លាក់ព្រះនិមិ្មត ទឹកឡើងបោកបក់យ៉ាងខ្លាំង ធ្វើឱ្យភ្ញៀវទេសចរបានត្រឹមតែអង្គុយគយគន់មើលទេសភាពប៉ុណ្ណោះ ដើម្បីចៀសវាងគ្រោះថ្នាក់ដោយប្រការណាមួយ ។
រមណីយដ្ឋានទឹកធ្លាក់ព្រះនិម្មិត ឬហៅថា«ទឹកជ្រោះសុភ័ក្រមិត្ត»ស្ថិតក្នុងឃុំកំពង់ស្រឡៅ២ ស្រុកឆែប ខេត្តព្រះវិហារ ជាប់ឃុំព្រះរំកិល ស្រុកថាឡាបរិវ៉ាត់ ខេត្តស្ទឹងត្រែង ភ្ញៀវទេសចរចាប់អារម្មណ៍ទៅកម្សាន្តគ្រប់រដូវកាល ទាំងរដូវក្តៅទាំងរដូវភ្លៀងធ្លាក់ ។
អ្នកទេសចរអាចធ្វើដំណើរពីក្រុងស្ទឹងត្រែង តាមផ្លូវជាតិលេខ៩ ឆ្លងស្ពានមេគង្គបន្តដំណើរ ប្រមាណ៤០គីឡូម៉ែត្រ នឹងឃើញស្លាកសញ្ញា នៅចំណុចផ្លូវបំបែកមួយដាក់ថា «រមណីយដ្ឋានទឹកធ្លាក់ព្រះនិមិ្មត» ហើយធ្វើដំណើរប្រមាណ ជាង២០គីឡូម៉ែត្រតាមផ្លូវឡំ មានស្លាកមួយទៀតដាក់ថា «ទឹកធ្លាក់ព្រះនិមិត្ត» ។ អ្នកដំណើរទាំងអស់បត់តាមគំនូសសញ្ញាដែលបានបង្ហាញ ធ្វើដំណើរប្រហែល១០គីឡូម៉ែត្រ គឺភ្ញៀវទាំងអស់នឹងបានឃើញទឹកធ្លាក់ធម្មជាតិព្រះនិមិ្មតដ៏អស្ចារ្យ គយគន់មើលទេសភាពលំហែកាយ សប្បាយដក់ជាប់ក្នុងអារម្មណ៍ជានិច្ច ។
ទៅលេងកម្សាន្តនៅរមណីយដ្ឋានធម្មជាតិទឹកធ្លាក់ព្រះនិមិ្មត អ្នកទេសចរគួរធ្វើដំណើរតាមផ្លូវចាក់កៅស៊ូ ទៅឃុំព្រះរំកិល គយគន់វិហារមួយទើបសង់ឡើងមានព្រះពុទ្ធរូបមួយធំ នៅលើកំពូលភ្នំតូចមួយ ។ រួចអាចបន្តដំណើរទៅទស្សនាអន្លង់ផ្សោតឈើទាល ស្ថិតនៅឃុំព្រះរំកិល ដែលមានសត្វផ្សោតផុសចុះឡើងគួរឱ្យចង់ទស្សនា ។
អ្នកលក់ដូរនៅរមណីយដ្ឋានទឹកធ្លាក់ព្រះនិមិ្មតបានឱ្យដឹងកាលពីពេល ថ្មីៗកន្លងមកថា គ្រប់រដូវទាំងអស់ គឺភ្ញៀវទេសចរទៅគយគន់ទេសភាព និងពិសាអាហារ តែភ្ញៀវមានច្រើននៅរដូវចូលឆ្នាំថ្មីប្រពៃណីជាតិខ្មែរ រដូវចូលឆ្នាំចិន និងរដូវបុណ្យភ្ជុំបិណ្ឌ ។ ដោយឡែកនារដូវវស្សា មិនសូវមានភ្ញៀវទៅទស្សនាកម្សាន្តច្រើនទេ មានច្រើនតែនៅក្នុងថ្ងៃសៅរ៍ ឬថ្ងៃអាទិត្យប៉ុណ្ណោះ ដែលជាថ្ងៃឈប់សម្រាក ។
លោកអ៊ន់ ប៉ោសឿន ប្រធានមន្ទីរទេសចរណ៍ខេត្តស្ទឹងត្រែងឱ្យដឹងថា មានតំបន់អភិរក្សសត្វផ្សោត ស្ថិតក្នុងឃុំព្រះរំកិល ស្រុកថាឡាបរិវ៉ាត់។ អន្លង់ផ្សោតឈើទាល ឃុំព្រះរំកិលទាក់ទាញភ្ញៀវទេសចរទៅទស្សនាច្រើនគ្រប់រដូវកាល ។
ផែនការបន្តចាប់ពីឆ្នាំ២០១៦មក មន្ទីរទេសចរណ៍ខេត្តស្ទឹងត្រែង សហការជាមួយសហគមន៍អេកូទេសចរណ៍ ធ្វើយ៉ាងណាឱ្យមានភាពទាក់ទាញភ្ញៀវចូលទស្សនាតំបន់អភិរក្សសត្វផ្សោតអន្លង់ឈើទាល ឃុំព្រះរំកិល ស្រុកថាឡាបរិវ៉ាត់ ខេត្តស្ទឹងត្រែងកាន់តែច្រើនឡើង ។ ផ្សារភ្ជាប់ទស្សនាសត្វផ្សោតដងទន្លេមេគង្គ ជាមួយរមណីយដ្ឋានទឹកធ្លាក់តាមរយៈការអភិវឌ្ឍផ្លូវទៅរមណីយដ្ឋាននានា ៕
ចែករំលែកព័តមាននេះ