រាជធានីភ្នំពេញ ៖ អ្នកនាំពាក្យរដ្ឋសភា បានឲ្យដឹងថា គណៈកម្មាធិការអាចិន្រៃយ៍រដ្ឋសភាសបានកំណត់ ថ្ងៃទី២០ ខែមិថុនា ឆ្នាំ២០១៧ ដើម្បីពិនិត្យសំណើរសុំបញ្ជូលក្នុងរបៀបវារៈនៃសម័យប្រជុំ រដ្ឋសភាលើកទី៨ នីតិកាលទី៥ នូវសេចក្តីស្នើច្បាប់ ស្តីពីការបោះឆ្នោតជ្រើសតាំងសមាជិកព្រឹទ្ធសភា ។
លោក ឡេង ប៉េងឡុង អ្នកនាំពាក្យរដ្ឋសភា បានឲ្យដឹងក្រោយកិច្ចប្រជុំគណៈកម្មាធិការអចិន្ត្រៃយ៍រដ្ឋសភា នាព្រឹកថ្ងៃទី១៥ ខែមិថុនា ឆ្នាំ២០១៧ នៅវិមានរដ្ឋសភា ក្រោមការដឹកនាំដោយសម្តេច ហេង សំរិន ប្រធានរដ្ឋសភា ថា សមាជិកគណៈកម្មាធិការអចិន្ត្រៃយ៍ បានលើកដៃសម្រេចយក ថ្ងៃទី២០ ខែមិថុនា ដើម្បីពិភាក្សាលើសេចក្តីស្នើច្បាប់ ស្តីពីការបោះឆ្នោតជ្រើសតាំងសមាជិកព្រឹទ្ធសភា ។ ក្នុងកិច្ចប្រជុំមានការចូលរួមពីសមាជិកអចិន្ត្រៃយ៍ មកពីគណបក្សសង្គ្រោះជាតិ ចំនួនពីររូប គឺលោក យ៉ែម បុញ្ញាឬទ្ធិ និងលោក ហូរ វ៉ាន់ ផងដែរ ។
សូមជម្រាបថា កិច្ចប្រជុំអចិន្ត្រៃយ៍នៅព្រឹកថ្ងៃនេះ មិនមានការជជែកសួរដេញដោលគ្នាយូរនោះទេ ព្រោះថាបើតាមការសង្កេត កិច្ចប្រជុំបានប្រើប្រាស់ពេលវេលា តែប៉ុន្មានជា៥នាទីប៉ុណ្ណោះ ក៏ចេញវិញ ។
ការបើកសម័យប្រជុំពេញអង្គរដ្ឋសភា ក៏នឹងមានការពិភាក្សាលើសំណើរសុំអនុម័តសេចក្តីព្រាងច្បាប់ស្តីពី ឧបាស្រ័យពាណិជ្ជកម្ម ផងដែរ ។
ចំពោះបេក្ខភាពសមាជិកព្រឹទ្ធសភា លោក ឡេង ប៉េងឡុង មិនបានបញ្ជាក់មានឈ្មោះណាមួយនោះទេ ពិសេសនោះកាលបរិច្ឆេទថ្ងៃជ្រើសរើស ។ លើបញ្ហានេះអាស្រ័យលើរាជរដ្ឋាភិបាល និងការកំណត់តាមច្បាប់ ដែលមានជាធរមាន ៕
ចែករំលែកព័តមាននេះ