រាជធានីភ្នំពេញ ៖ គ្មានអ្នកណាមិនដឹងនោះទេថា ចំណងស្នេហ៍រវាងកីឡាករបាល់ទាត់ដ៏ល្បីរបស់កម្ពុជា គឺចាន់ វឌ្ឍនាកា និងកីឡាការិនីហែលទឹករូបស្រស់ហែមថុន វិទិនី ត្រូវបានគេដឹងយ៉ាងទូលំទូលាយ ដោយសារតែអ្នកទាំងពីរបានទាំងឡើងសម្ភាសន៍នៅលើកញ្ចក់ទូរទស្សន៍ទៀតផង ។ ប៉ុន្តែមិនបានប៉ុន្មានផងចំណងស្នេហ៍ដ៏ស្អិតរមួត របស់ពួកគេបែរជាប្រេះឆាដោយម្នាក់ៗលើកពីហេតុផលថាមិនចុះសម្រុងគ្នា ។
ទោះបីយ៉ាងណា ចំណងស្នេហ៍របស់អ្នកទាំងពីរនៅតែត្រូវមនុស្សមួយចំនួនរំពឹងថានឹងអាចវិលជុំគ្នាវិញដោយសារតែភាពផ្អែមល្ហែមរបស់ពួកគេមានលក្ខណៈស៊ីជម្រៅ ជាពិសេសភាគីខាងប្រុសមិនទាន់បង្ហាញមុខសង្សារថ្មីឱ្យគេឃើញនោះ ។
ទើបតែមួយរយៈចុងក្រោយនេះប៉ុណ្ណោះដែលក្ដីរំពឹងពីលទ្ធភាពត្រឡប់ក្រោយរបស់អ្នកទាំងពីរត្រូវបានព្យាករឡើងវិញថាមិនអាចកើតឡើងនោះទេ ក្នុងពេលភាគីខាងស្រីបានបង្ហាញបុរសថ្មីជាសង្សាររបស់ខ្លួនគឺកីឡាករសំអឿន ពិដោរស្ថិតក្នុងក្រុមជម្រើសជាតិដូចចាន់ វឌ្ឍនាកា ជាសង្សារចាស់ដែរ ។ មិនតែប៉ុណ្ណោះអ្នកទាំងពីរកាន់តែបង្អួតពីភាពផ្អែមល្ហែមស្អិតរមួតដូចស្ករតាំងម៉ែបេះមិនដាច់ពីគ្នា ដែលមិនខុសពីបញ្ឈឺចិត្តអតីតប្រុសស្នេហ៍ក្រោយពេលបែកបាក់ទៀតផង។
បើទោះជាមិនមានប្រតិកម្មណាមួយពីចាន់ វឌ្ឍនាកា ក៏អ្នកតាមដានភាគច្រើនយល់ថា នោះជាចេតនាដែលកញ្ញា ហែមថុន វិទិនី មានបំណងចង់បញ្ឈឺចិត្តអតីតសង្សារក្រោយពេលស្នេហាបែកបាក់នោះដែរ ។ នៅលើហ្វេសប៊ុក គេឃើញកីឡាការិនីរូបនេះសម្ញែងមិនលាក់បាំងនោះទេពីអារម្មណ៍យល់ចិត្តថ្លើមគ្នាជាមួយសំអឿន ពិដោរ មិនខុសពីពេលដែលនាង និងចាន់ វឌ្ឍនាកា ធ្លាប់សម្ញែងស្នេហាជាមួយគ្នា ។ មនុស្សជាច្រើនយល់ថា អ្វីដែលនាងបង្ហោះឡើងគឺជាការបង្ហាញឱ្យដឹងថានាងបានក្លាយជានារីដែលមានសុភមង្គលក្នុងជីវិតបន្ទាប់ពីរកបានស្នេហាថ្មី ដើម្បីសម្ញែងឱ្យមនុស្សដែលបានដឹងពីស្នេហារបស់នាងជាមួយអតីតសង្សារចាស់ បានដឹងច្បាស់ពីស្នេហាថ្មីរបស់ខ្លួន ។ ស្របគ្នាដែលកាលនោះស្នេហារបស់នាងត្រូវបានគេចាប់អារម្មណ៍មិនខុសគ្នាពីស្នេហារបស់កីឡាករ វ៉ន វីវ៉ា និងកីឡាការិនីតេក្វាន់ដូ ស៊ន ដាវីន ផង ទើបអ្នកណាក៏យល់ស្របថា ការបង្អួតពីស្នេហាថ្មីរបស់នាងគឺមិនខុសពីមានចេតនាបញ្ឈឺដល់អតីតសង្សារទេ ។ មនុស្សភាគច្រើនយល់ឃើញបែបនេះ ដោយសារតែគូស្នេហ៍ថ្មីរបស់នាងជាកីឡាករបាល់ទាត់ល្បីឈ្មោះក្នុងក្រុមជម្រើសជាតិដោយនាងមិនជ្រើសយកអ្នកមានអាជីពខុសពីនេះ ។
ស្នេហាថ្មីរបស់កញ្ញា ហែមថុន វិទិនី កាន់តែត្រូវមហាជនភាគច្រើនផ្ដោតការចាប់អារម្មណ៍ បន្ទាប់ពីនាងបង្អួតខ្លាំងឡើងពីភាពផ្អែមល្ហែមជាសាធារណៈ។ នៅលើហ្វេសប៊ុកនាងបានបង្ហោះពាក្យជាច្រើនដោយនៅក្នុងនោះមានពាក្យមួយឃ្លាអមដោយរូបថតបែបរ៉ូម៉ង់ទិកផងថា «មនុស្សពីរនាក់ខាំគ្នាដូចឆ្កែ និងឆ្មាតាំងពីរអាយុ១៦ឆ្នាំ កុំថាឡើយឃើញមុខឃើញតែស្បែកជើងក៏ឈ្លោះគ្នាដែរ មិនសមយើងអាចក្លាយជាមិនឈ្លោះមិនបែក» ។ នៅមានរូបថត និងពាក្យពេចន៍ឆ្លងឆ្លើយពោរពេញដោយភាពផ្អែមល្ហែមជាច្រើនទៀតដោយមិនទាន់រាប់បញ្ចូលភាសាអូនបងដែលគេបានឮនៅពេលអ្នកទាំងពីរបង្ហាញខ្លួនទៅណាមកណាជាមួយគ្នាផង ។ ការបើកចំហស្នេហាថ្មីរបស់នាង ធ្វើឱ្យអ្នកគាំទ្រភាគច្រើនអបអរសាទរ តែក៏មានការលើកឡើងថា នោះជាភាពផ្អែមល្ហែមដែលនឹងធ្វើឱ្យកីឡាករចាន់ វឌ្ឍនាកា ប៉ះពាល់អារម្មណ៍ផងដែរ បើទោះជាគេមិនមានប្រតិកម្មណាមួយក្រោយហែមថុន វិទិនី មានស្នេហាថ្មី ហើយប្រើហ្វេសប៊ុកបង្ហាញសកម្មភាពនាងនាពេលចុងក្រោយ។
រំលឹកពីស្នេហារបស់នាងជាមួយ ចាន់ វឌ្ឍនាកា គេសុទ្ធតែដឹងថា អ្នកទាំងពីរផ្អែមល្ហែមខ្លាំងណាស់ ដោយសូម្បីតែពេលបង្ហោះសារ និងការបង្ហោះរូបថតផ្សេងៗក៏ពួកគេសម្ញែងពីភាពស្និទ្ធស្នាលមិនធម្មតានោះដែរ ។ មជ្ឈដ្ឋានភាគច្រើនបានបង្ហាញការសាទរចំពោះភាគីទាំងពីរតែក៏មានអ្នកខកចិត្តច្រើនដែរ នៅពេលដឹងថាអ្នកទាំងពីរសម្រេចចិត្តបែកគ្នា ។ ប៉ុន្តែពួកគេក៏បានបង្ហាញការចាប់អារម្មណ៍ផងដែរនៅពេលដឹងថា កីឡាការិនីរូបនេះងាកទៅស្រឡាញ់បុរសថ្មីមកជំនួសបេះដូងចាស់ ហើយបុរសម្នាក់នោះជាកីឡាករបាល់ទាត់ដូចមុន ក្នុងពេលដែលគេដឹងថា កីឡាបាល់ទាត់ និងហែលទឹកមិនសូវបានទាក់ទងគ្នា ។ ពួកគេក៏មានការងឿងឆ្ងល់ដែលហែមថុន វិទិនី បែកពីកីឡាករបាល់ទាត់ម្នាក់ ហើយមកភ្ជាប់ស្នេហ៍កីឡាករបាល់ទាត់ម្នាក់ទៀត តែនាងបានប្រាប់អ្នកគាំទ្រនាងថា ហេតុផលនៃការស្រឡាញ់គ្នាគឺដោយសារតែកីឡាករ សំអឿន ពិដោរ ចេះឱ្យតម្លៃនាង និងក្រុមគ្រួសារនាង។
កីឡាករ សំអឿន ពិដោរ បានប្រកាសថា លោកមានគម្រោងភ្ជាប់ពាក្យជាមួយហែមថុន វិទិនី ក្នុងពេលឆាប់ៗ ។ ប៉ុន្តែគេមិនទាន់ដឹងថា អ្នកទាំងពីរនឹងឈានដល់ចំណុចមួយនោះនៅថ្ងៃណាមួយនោះទេ ដោយសារតែពួកគេបានត្រឹមតែអះអាងថានឹងកើតឡើងឆាប់។ ការប្រកាសពីគម្រោងភ្ជាប់ពាក្យរបស់អ្នកទាំងពីរបង្ហាញឱ្យឃើញថា ស្នេហាដែលបានកើតឡើងមានភាពរឹងមាំដាច់ឆ្ងាយជាងកាលដែលនាងលង់ស្រឡាញ់កីឡាករ ចាន់ វឌ្ឍនាកា ដែលប្រើពេលច្រើនឆ្នាំមកហើយ តែមិនមានគម្រោងភ្ជាប់ពាក្យ ហើយចុងក្រោយក៏បែកគ្នា ។
ហែមថុន វិទិនី មានជំនឿចិត្តយ៉ាងមុតមាំលើស្នេហាទី២របស់នាង ទើបនាងហ៊ានប្រកាសដោយឥតលាក់លៀមពីស្នេហាជាមួយកីឡាករ សំអឿន ពិដោរ ដែលនាងបញ្ជាក់គឺជាបុរសចេះឱ្យតម្លៃដែលអាចឱ្យនាងផ្ញើខ្លួនបាន ។ ស្នេហាមួយនេះកាន់តែមានការចាប់អារម្មណ៍ក្នុងវិស័យកីឡា តែក៏មានអ្នកប៉ាន់ស្មានថាពិបាកជឿជាក់ពីលទ្ធផលផងដែរដោយសារតែអ្នកទាំងពីរនៅក្មេងវ័យដូចគ្នា គឺពិបាកទុកចិត្ត ។ កីឡាករចាន់ វឌ្ឍនាកា មិនឃើញប្រតិកម្មជុំវិញមិត្តរួមក្រុមមានស្នេហាជាមួយហែមថុន វិទិនីនោះទេ ប៉ុន្តែមានការអះអាងថា កីឡាកររូបនេះទំនងជាមានអារម្មណ៍មិនល្អនោះទេ ក្នុងពេលដែលលោកត្រូវគេដឹងថា អាចកញ្ឆក់បានបេះដូងរបស់នាងទៅហើយបែរជាឱ្យរបូតទៅវិញ ដោយបណ្ដោយឱ្យមិត្តរួមក្រុមដណ្ដើមនាងយកទៅបាត់ ។ អ្នកតាមដានបានអះអាងថា ប្រសិនបើហែមថុន វិទិនី បង្អួតគូស្នេហ៍ថ្មីបែបនេះ គឺប្រហែលមិនយូរនោះទេ កីឡាករចាន់ វឌ្ឍនាកា ពិតជាបង្ហាញគូស្នេហ៍ថ្មីមិនខុសគ្នា ដើម្បីកុំឱ្យមានការរិះគន់ថា លោកល្បីឈ្មោះប៉ុនហ្នឹងហើយនៅតែបណ្ដោយឱ្យអតីតសង្សាររកបានមនុស្សជាទីស្រឡាញ់មុន ៕
ចែករំលែកព័តមាននេះ