រាជធានីភ្នំពេញ ៖ បើទោះបីជារងការដិះដៀលយ៉ាងណាក៏ដោយ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានបញ្ជាក់ថា រដ្ឋាភិបាលត្រូវបង្ខំចិត្តចេញ ស.ជ.ណ ចុះថ្ងៃទី ១២ ខែតុលា ឆ្នាំ២០១៦ ដើម្បីឲ្យនាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋានអន្តោរប្រវេសន៍ ចាត់វិធានការបង្ការទុកជាមុន ទប់ស្កាត់មិនឲ្យលោក សម រង្ស៊ី អតីតមេបក្សប្រឆាំងនៅកម្ពុជាវិលចូលប្រទេសវិញ គឺក្នុងចេតនាល្អតែប៉ុណ្ណោះ។ សម្តេចតេជោនាយករដ្ឋមន្ត្រីបានថ្លែងយ៉ាងដូច្នេះនៅក្នុងពិធីថែ្លងនៅក្នុងពិធីចែកសញ្ញាបត្រដល់និស្សិតសកលវិទ្យាល័យបញ្ញាសាស្ត្រកម្ពុជា នៅវិទ្យាស្ថានជាតិអប់រំព្រឹកនេះ។
សម្តេចតេជោ ហ៊ុន សែនបានបន្ថែមថា ការពិត ស.ជ.ណ មុនមានគោលបំណងការពារអាយុជីវិតគាត់។ សម្តេចបានសង្កត់ធ្ងន់ថា ដោយឃើញការលើកឡើងរបស់បុគ្គល សម រង្ស៊ី ស្នើឲ្យលុបបំរាមនេះ ទើបសម្តេចទាក់ទងទៅឧបនាយករដ្ឋមន្ត្រី ប៊ិន ឈិន រដ្ឋមន្ត្រីស្តីទីនៃទីស្តីការគណរដ្ឋមន្ត្រីឲ្យលុបចោល ស.ជ.ណ ចុះថ្ងៃទី ១២ ខែតុលា ឆ្នាំ២០១៦វិញ។
សម្តេចបានបន្តទៀតថា ការលុបចោល ស.ជ.ណ ដើម្បីបើកផ្លូវឲ្យអ្នកក្លាហានចូល តែគួរឲ្យសោកស្តាយបែរជាលោកសម រង្ស៊ី ប្រកាសយប់ថ្ងៃពុធថា មិនត្រឡប់មកប្រទេសកម្ពុជាទៅវិញ។
លោក សម រង្ស៊ី ព្រឹកនេះផងដែរបានសរសេរក្នុងហ្វេសប៊ុករបស់គាត់ដោយចោទប្រកាន់សម្តេចតេជោថា តាំងតែពីឆ្នាំ១៩៩៧ សម្តេចចាត់ទុកមេបក្សប្រឆាំងដែលកំពុងតែគេចខ្លួននៅក្រៅប្រទេស «ជាមនុស្សទី១ នៅលើបញ្ជីខ្មៅ» របស់សម្តេចដែលត្រូវកំចាត់ចោលទៅវិញ៕
ចែករំលែកព័តមាននេះ