រាជធានីភ្នំពេញ ៖ ដោយសារតែតម្លៃជ្រូកក្នុងស្រុកធ្លាក់ថ្លៃ និងគ្មានទីផ្សារ ព្រោះតែជ្រូកនាំចូលពីប្រទេសវៀតណាមរាប់រយក្បាលស្ទើររាល់ថ្ងៃ ធ្វើឲ្យកសិករ ក៏ដូចជាក្រុមហ៊ុន និងសហគមន៍ចិញ្ចឹមជ្រូកបោះបង់ចោលការចិញ្ចឹមជាបន្តបន្ទាប់ ដោយសារខាតបង់ និងមិនអាចទប់ទល់ការចំណាយប្រចាំថ្ងៃបាន ដែលគិតត្រឹមរយៈពេល៦ខែនេះ តាមតួលេខត្រួសៗពីសមាគមចិញ្ចឹមជ្រូកកម្ពុជា កម្ពុជាខាតបង់ប្រាក់ប្រមាណជាង១៥០លានដុល្លារ ។ ក្រៅពីអ្នកចិញ្ចឹមខាតបង់ហើយ ក៏ប៉ះពាល់ដល់ក្រុមហ៊ុនផលិតចំណីសត្វ និងក្រុមហ៊ុនលក់ថ្នាំថែមទៀត ។
លោក ជេត ភិរម្យ អនុប្រធានសមាគមអ្នកចិញ្ចឹមជ្រូកកម្ពុជា ឲ្យដឹងថា បន្ទាប់ពីមានការនាំចូលជ្រូកពីប្រទេសវៀតណាមយ៉ាងគំហុក ធ្វើឲ្យតម្លៃជ្រូកកម្ពុជាធ្លាក់ថ្លៃខ្លាំង ហើយគិតត្រួសៗឃើញថា កម្ពុជាទាំងមូលបានខាតបង់ទឹកប្រាក់ប្រមាណជាង១៥០លានដុល្លារអាមេរិក ក្នុងរយៈពេល៦ខែចុងក្រោយនេះ ។ លោកនិយាយថា ៖ « ការខាតបង់នេះមានដូចជាម្ចាស់កសិដ្ឋានត្រូវបង្ខំចិត្តលក់ជ្រូកទាំងតម្លៃទាប ព្រោះបើទុកនៅកាន់តែខាតច្រើន ដោយសារតែត្រូវស៊ីចំណីប្រចាំថ្ងៃ ។ មួយវិញទៀត ជ្រូកកាន់តែចាស់ កាន់តែប្រឈមនឹងជំងឺ ដូចនេះបើទុកនៅ ខាតចំណីផង ហើយអាចធ្វើឱ្យជ្រូកនោះងាប់ទៀត » ។
លោកបន្តថា នៅថ្ងៃអនាគត បើសិនជាមិនទប់ស្កាត់ការនាំចូលពីក្រៅប្រទេសទេ វានឹងធ្វើឱ្យការខាតបង់កាន់តែច្រើនឡើងៗ ហើយកសិករ និងម្ចាស់កសិដ្ឋានតូចៗអាចដួលរលំជាបន្តបន្ទាប់ទៀត។ បើសិនជាមានការទប់ស្កាត់ វានឹងធ្វើឱ្យវិស័យចិញ្ចឹមជ្រូកនៅកម្ពុជាល្អប្រសើរឡើងខ្លះ ប៉ុន្តែបើនៅតែបន្តឱ្យនាំចូលពីខាងក្រៅទៀតនោះ ការចិញ្ចឹមជ្រូកនឹងកាន់តែខាតបង់ជាមិនខាន ។
លោកបន្ថែមថា តាមពិត ថ្លៃដើមសម្រាប់ចិញ្ចឹមជ្រូកនៅវៀតណាម និងកម្ពុជា វាគ្មានភាពខុសគ្នាខ្លាំងណាស់ណាទេ តែបន្ទាប់ពីប្រទេសចិនមិនអនុញ្ញាតឱ្យជ្រូកវៀតណាមនាំចូល ធ្វើឱ្យជ្រូកនៅវៀតណាមគរចោល ។ ដូចនេះ ដើម្បីកុំឱ្យកាន់តែខាតច្រើន ឬទុកយូរធ្វើឱ្យជ្រូកងាប់ចោលនោះ ឈ្មួញវៀតណាម ឬម្ចាស់កសិដ្ឋានត្រូវបង្ខំចិត្តលក់មកឲ្យកម្ពុជាក្នុងតម្លៃមួយទាបសមរម្យ ដើម្បីបានប្រាក់ថ្លៃដើមខ្លះៗត្រឡប់ទៅវិញ ។
លោកមានប្រសាសន៍ថា ៖ « បើសិនជាមានការទប់ស្កាត់មួយចំនួន កុំបណ្ដែតបណ្ដោយច្រើនពេក សមាគមអ្នកចិញ្ចឹមជ្រូកកម្ពុជាអាចនឹងធានាបាននូវការផ្គត់ផ្គង់លើទីផ្សារ ខណៈតាមបណ្ដាខេត្តមួយចំនួននៅក្នុងប្រទេសធានារួចស្រេចហើយថា នឹងផ្គត់ផ្គង់បានដោយមិនបាច់នាំចូល » ។
ដើម្បីជាដំណោះស្រាយ គឺមានតែរាជរដ្ឋាភិបាល និងក្រសួងកសិកម្ម រុក្ខាប្រមាញ់ និងនេសាទ ជួយដោះស្រាយ និងគិតគូរពីបញ្ហាប្រឈមទាំងអស់នេះ ជាពិសេស រឹតបន្តឹងច្បាប់ និងពង្រឹងសមត្ថកិច្ចតាមច្រករបៀងដែលតែងតែអនុញ្ញាតឲ្យឈ្មួញនាំចូល ។
ពាក់ព័ន្ធនឹងបញ្ហាជ្រូកនេះ មិនមែនតែអ្នកចិញ្ចឹមទេដែលកំពុងព្រួយបារម្ភនោះ ប្រជាពលរដ្ឋជាអ្នកបរិភោគ ក៏កំពុងព្រួយបារម្ភដូចគ្នា ពីសុវត្ថិភាពសាច់ជ្រូកនាំចូលពីប្រទេសវៀតណាម ជាពិសេស ជ្រូកមានជំងឺអាចបង្កការប៉ះពាល់ដល់សុខភាពអ្នកបរិភោគ ។ សមាគមអ្នកចិញ្ចឹមជ្រូកកម្ពុជា ក៏កំពុងរកវិធីធ្វើយ៉ាងណា ឱ្យពលរដ្ឋខ្មែរសម្គាល់ថា សាច់ជ្រូកណាជារបស់ខ្មែរ ដើម្បីឱ្យអ្នកបរិភោគមានទំនុកចិត្តកាន់តែខ្ពស់ ៕
ចែករំលែកព័តមាននេះ