មន្ត្រីកាំកុងត្រូលខេត្ត ចុះត្រួតពិនិត្យសារធាតុគីមីក្នុងទំនិញគ្មានអនាម័យ
ខេត្តសៀមរាប ៖ មន្ត្រីកាំកុងត្រូលសាខាខេត្តសៀមរាប ដឹកនាំដោយលោក ង៉ែត ចេក ជាប្រធាន បានអញ្ជើញចុះត្រួតពិនិត្យ សារធាតុគីមី និងទំនិញគ្មានអនាម័យលើមុខម្ហូបចំណី
ខេត្តសៀមរាប ៖ មន្ត្រីកាំកុងត្រូលសាខាខេត្តសៀមរាប ដឹកនាំដោយលោក ង៉ែត ចេក ជាប្រធាន បានអញ្ជើញចុះត្រួតពិនិត្យ សារធាតុគីមី និងទំនិញគ្មានអនាម័យលើមុខម្ហូបចំណី បន្លែ ត្រី សាច់ ដែលបានផ្ទុកនៅក្នុងម្ហូបចំណី និងគ្រឿងកំប៉ុងគ្រប់ប្រភេទ ដោយពុំមានកាលបរិច្ឆេទច្បាស់លាស់ ក្នុងគោលបំណង ដើម្បីឱ្យប្រជាពលរដ្ឋមុននឹងទិញយកទៅប្រើប្រាស់ ឬក៏បរិភោគ សូមមេត្តាពិនិត្យមើលឱ្យបានច្បាស់។ ក្នុងប្រតិបត្តិការចុះត្រួតពិនិត្យទំនិញគ្មានគុណភាពនោះបានធ្វើឡើងនៅព្រឹកថ្ងៃទី១៣ ខែមិថុនា ឆ្នាំ២០១៧ ស្ថិតនៅក្នុងផ្សារសាមគ្គី ក្នុងភូមិបន្ទាយចាស់ សង្កាត់ស្លរក្រាម ក្រុង/ ខេត្តសៀមរាប។
លោក ង៉ែត ចេក ប្រធានមន្ត្រីកាំកុងត្រូលសាខាខេត្តសៀមរាប បានមានប្រសាសន៍ថា ដើម្បីធានាបាននូវសុវត្ថិភាព ចំណីម្ហូបអាហារ ជូនប្រជាពលរដ្ឋកន្លងមក មន្ត្រីជំនាញរបស់លោក តែងតែបានចុះទៅត្រួតពិនិត្យ រកសារធាតុគីមី ដែលត្រូវហាមឃាត់ដាក់នៅក្នុងបន្លែត្រីសាច់ និងចំណីអាហារផ្សេងៗនៅតាមបណ្តាផ្សារនានា ក៏ដូចជាStar Mart និងMini Mart នៅទូទាំងខេត្តសៀមរាប ជាច្រើនលើកច្រើនសារមកហើយ។ ដើម្បីឆាប់បានដឹងពីលទ្ធផលថាតើចំណីអាហារណាមានសារធាតុគីមី ហាមឃាត់ត្រូវដកហូត និងចំណីអាហារណាមានគុណភាពល្អដែលអាចឱ្យប្រជាពលរដ្ឋ ទិញយកទៅបរិភោគបាន គឺអនុញ្ញាតឱ្យដាក់លក់បន្ត។ លោកបានបញ្ជាក់ថា ជាក់ស្តែងនៅថ្ងៃនេះ លោកបានឱ្យមន្ត្រីជំនាញធ្វើការពិសោធន៍ដោយផ្ទាល់នៅផ្សារសាមគ្គីតែម្តង។
ហើយជាលទ្ធផលឃើញថា បន្លែត្រីសាច់ និងចំណីអាហារផ្សេងៗដែលបានយកមកធ្វើការពិសោធន៍ គឺមិនមានការដាក់សារធាតុគីមីហាមឃាត់នោះទេ។ លោក ង៉ែត ចេក បានគូសបញ្ជាក់ទៀតថា ការត្រួតពិនិត្យគុណភាពទំនិញនៅតាមផ្សារ នៅតែជារឿងសំខាន់បំផុតមិនអាចបណ្តែតបណ្តោយបាននោះឡើយ ដើម្បីទប់ស្កាត់ទំនិញគ្មានគុណភាព ការពារសុខភាព របស់ប្រជាពលរដ្ឋ។ ការត្រួតពិនិត្យគុណភាពទំនិញនៅតាមទីផ្សារ និងកន្លែងលក់ដូរនានាគឺជារឿងល្អប្រសើរ គឺរឹតតែសំខាន់ថែមទៀតផងដែរ។
ក្រៅពីការពិនិត្យរកសាធាតុគីមីនៅក្នុងបន្លែ ត្រី សាច់ និងចំណីអាហារផ្សេងៗនៅតាមបណ្តាផ្សារនានានៅទូទាំងខេត្តសៀមរាបកន្លងមក មន្ត្រីជំនាញក៏បានកំពុងតែរឹតបន្តឹងនៃការត្រួតពិនិត្យការនាំចូល បន្លែ ត្រី សាច់ ពីប្រទេសជិតខាងនៅតាមច្រកព្រំដែននានាផងដែរ ដោយយល់ឃើញថា តើផលិតផលដែលនាំចូលមកនេះមានលិខិតអនុញ្ញាតត្រឹមត្រូវ និងមានគុណភាពល្អ ឬអត់។ ចំណែកក្រុមអាជីវកនៅផ្សារសាមគ្គីខេត្តសៀមរាប បានសម្តែងការសប្បាយចិត្ត និងគាំទ្រចំពោះសកម្មភាពរបស់មន្ត្រីកាំកុងត្រូលជំនាញក្នុងការចុះត្រួតពិនិត្យគុណភាពចំណីអាហារទាំងអស់នេះ ដោយពុំមានបញ្ហាអ្វីឡើយ៕
ចែករំលែកព័តមាននេះ