រាជធានីភ្នំពេញ ៖ ទោះបីលទ្ធផលផ្លូវការនៃការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៤មិនទាន់ប្រកាសជាផ្លូវការក្តី គណបក្សនយោបាយក្នុងរដ្ឋសភាបាននិងកំពុងតែរកវិធីសាស្ត្រដើម្បីប្រកួតដណ្តើមសន្លឹកឆ្នោត
រាជធានីភ្នំពេញ ៖ ទោះបីលទ្ធផលផ្លូវការនៃការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៤មិនទាន់ប្រកាសជាផ្លូវការក្តី គណបក្សនយោបាយក្នុងរដ្ឋសភាបាននិងកំពុងតែរកវិធីសាស្ត្រដើម្បីប្រកួតដណ្តើមសន្លឹកឆ្នោតគ្នាតាមបែបលិទ្ធិប្រជាធិបតេយ្យសេរីពហុបក្សនូវការបោះឆ្នោតជ្រើសរើសអ្នកតំណាងរាស្ត្រឆ្នាំ២០១៨ ។
លោកកឹម សុខាប្រធានគណបក្សសង្គ្រោះជាតិបានលើកឡើងថា លោកចង់ប្រកួតជាមួយគណបក្សកាន់អំណាចតាមគោលនយោបាយ ជៀងវាងការគំរាមកំហែងដោយប្រការណាមួយ ដើម្បីបំភ័យដល់ពលរដ្ឋដែលជាម្ចាស់ឆ្នោត ។ ប៉ុន្តែមន្ត្រីជាន់ខ្ពស់គណបក្សកាន់អំណាចថា បើចង់ឲ្យមានសុខដុមរមនាក្នុងសង្គម លុះត្រាតែគណបក្សនោះប្រើពាក្យឃោសនាតែពីកម្មវិធីនយោបាយរបស់បក្សខ្លួន គុណសម្បត្តិរបស់ខ្លួនទៅបានហើយ កុំប៉ះពាល់ដល់បក្សនយោបាយដទៃ និងត្រូវគោរព អនុវត្តឲ្យបានត្រឹមត្រូវតាមច្បាប់ស្តីពីការបោះឆ្នោត គោលការណ៍ បទបញ្ជា នីតិវិធី ក្រមសីលធ៌ម ដែលកំណត់ដោយ គ.ជ.ប ។
មេបក្សគណបក្សសង្គ្រោះជាតិ អំពាវនាវឲ្យគណបក្សនយោបាយទាំងអស់ប្រកួតប្រជែងគ្នាលើគោលនយោបាយ ចៀសវាងការគំរាមកំហែង ការជេរប្រទេច និងការឈ្លោះទាស់ទែងគ្នាដែលនាំទៅរកការប្រេះឆាជាតិ។ លោកថា នៅក្រោយការបោះឆ្នោត ទោះបីជាគណបក្សណាឈ្នះក្លាយជាបក្សកាន់អំណាច ឬចាញ់ក្លាយជាបក្សប្រឆាំងក៏ដោយ គឺត្រូវសហការគ្នាបម្រើប្រទេសជាតិ ។
ជាមួយគ្នានេះអ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកសាររបស់មេបក្សប្រឆាំងថាជាសំណូមពរដ៏ល្អ ហើយគណបក្សប្រជាជនកម្ពុជា ស្វាគមន៍ចំពោះគំនិតនេះ តែលោកក៏ស្នើឲ្យគណបក្សប្រឆាំង អនុវត្តតាមសំណូមពររបស់ខ្លួននេះដែរ ។
លោកបញ្ជាក់ថា ការលាបពណ៌ ការជេរប្រមាថ ការមួលបង្កាច់បង្ខូចកេរ្តិ៍ផ្សេងៗ គឺយើងមិនត្រូវការនោះទេ។ អ៊ីចឹងបើលោក កឹម សុខា មានមតិបែបនេះ គឺស្របទៅតាមសំណូមពររបស់គណបក្សប្រជាជនហើយ ហើយយើងយល់ថា បើសិនគណបក្សនយោបាយប្រកួតប្រជែងនីមួយៗប្រកាន់ជំហរដូច្នេះ នឹងមិនមានបញ្ហាស្មុគស្មាញក្នុងសង្គមជាតិដូចមុនទេ ៕
ចែករំលែកព័តមាននេះ