រាជធានីភ្នំពេញ ៖ ដើម្បីប្រកួតប្រជែងជាមួយយីហោកាហ្វេដែលនាំចូលពីបរទេស សហគ្រិនកម្ពុជាមួយចំនួនបានចាប់ផ្ដើមច្នៃបង្កើតឈ្មោះយីហោហាងកាហ្វេក្នុងស្រុក ស្របពេលពលរដ្ឋកម្ពុជា ពិសេសយុវវ័យ និងអ្នកធ្វើការ និយមទទួលទានកាហ្វេមានយីហោត្រឹមត្រូវ និងល្បីៗ ។
លោក ដួង តារា ស្ថាបនិកហាងកាហ្វេ មីស្ទ័រប្រ៊ូយ៍ (MisterBrew) ជាយីហោបង្កើតក្នុងស្រុកបានឱ្យដឹងថា ដោយមើលឃើញពីការនិយមទទួលទានកាហ្វេរបស់ពលរដ្ឋកម្ពុជា មានកំណើនឡើងជាប្រចាំ ហើយហាងកាហ្វេភាគច្រើនជាហាងដែលទិញម៉ាកយីហោពីបរទេស ដើម្បីធ្វើអាជីវកម្ម ទើបលោកសម្រេចបង្កើតយីហោកាហ្វេក្នុងស្រុកថ្មីមួយ ដើម្បីផ្ដល់ជូនពលរដ្ឋកម្ពុជា ដែលជាអ្នកនិយមទទួលទានកាហ្វេ ។
លោកនិយាយថា ៖ « នៅក្នុងទស្សនវិស័យរបស់ខ្ញុំ ដែលបង្កើតហាងកាហ្វេនេះឡើង គឺចង់ក្លាយជាម៉ាកកាហ្វេលេខ១នៅក្នុងស្រុក ដោយយើងនឹងបន្តបើកហាងតូចៗជាច្រើននៅក្នុងប្រទេសកម្ពុជា និងមានទស្សនវិស័យផ្ដល់ជូនកាហ្វេមានគុណភាពល្អ និងសេវាកម្មរហ័ស ជាពិសេស គឺតម្លៃទាបជាងកាហ្វេយីហោបរទេស ដែលទិញសិទ្ធិធ្វើអាជីវកម្មក្នុងស្រុកខ្មែរ ពីព្រោះការបង្កើតយីហោខ្លួនឯងចំណាយទុនតិចជាងការទិញយីហោពីបរទេសមកធ្វើអាជីវកម្ម»។ លោកបន្ថែមថា ការបង្កើតយីហោក្នុងស្រុក មិនចំណាយដើមទុនច្រើន ដូចទិញសិទ្ធិអាជីវកម្មពីក្រៅនោះទេ ។ ដូចនេះ តម្លៃកាហ្វេក្នុងស្រុកនឹងទាបជាងកាហ្វេដែលនាំចូល តែចំពោះគុណភាព និងរសជាតិវិញ មិនចាញ់កាហ្វេទិញសិទ្ធិមកធ្វើអាជីវកម្មនោះទេ ។
លោកទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម បានអំពាវនាវឲ្យសហគ្រិនកម្ពុជា បង្កើតយីហោកាហ្វេក្នុងស្រុកដើម្បីលក់ជូនប្រជាពលរដ្ឋខ្លួនវិញ ជាជាងទិញយីហោពីបរទេសមកធ្វើអាជីវកម្ម ដែលមានតម្លៃថ្លៃ និងចំណាយច្រើន ។
នៅក្នុងពិព័រណ៍កាហ្វេកន្លងមក លោកមានប្រសាសន៍ថា ៖ « ការបង្កើតយីហោហាងកាហ្វេក្នុងស្រុកមួយ វាមិនចំណាយទុនច្រើនទេ បើទោះបីជាកាហ្វេចល័តតាមផ្លូវក៏ដោយ តែនៅពេលដែល កាហ្វេនោះមានរសជាតិឆ្ងាញ់ មានអ្នកគាំទ្រច្រើន យើងអាចបោះទុនបង្កើតជាហាងទំនើបបានដូចគ្នា »។
លោកបន្តថា កម្ពុជាក៏មានគ្រាប់កាហ្វេដែលល្បីដល់បរទេសដែរ គឺកាហ្វេមណ្ឌលគិរី ។ ដូច្នេះហើយសហគ្រិនមិនចាំបាច់នាំគ្រាប់កាហ្វេពីបរទេសមកធ្វើទេ គឺគ្រាន់តែសិក្សាពីរបៀបឆុងដើម្បីឱ្យមានរសជាតិឆ្ងាញ់ដូចកាហ្វេយីហោនាំចូលទៅបានហើយ ដូចជាឡាតេ ឬកាពូស៊ីណូ ជាដើម ៕
ចែករំលែកព័តមាននេះ