រាជធានីភ្នំពេញ ៖ ក្នុងរយៈពេល៥ខែដើមឆ្នាំ២០១៧នេះ បរិមាណកុងតឺន័រឆ្លងកាត់កំពង់ផែស្វយ័តក្រុងព្រះសីហនុ មានចំនួនសរុបប្រមាណ១៧៣ពាន់TEU ក្នុងនោះកុងតឺន័រនាំចូលមាន៨៧.៦១២TEU និងនាំចេញ
រាជធានីភ្នំពេញ ៖ ក្នុងរយៈពេល៥ខែដើមឆ្នាំ២០១៧នេះ បរិមាណកុងតឺន័រឆ្លងកាត់កំពង់ផែស្វយ័តក្រុងព្រះសីហនុ មានចំនួនសរុបប្រមាណ១៧៣ពាន់TEU ក្នុងនោះកុងតឺន័រនាំចូលមាន៨៧.៦១២TEU និងនាំចេញ៨៥.៣៨៨TEU ពោលកើនឡើងប្រមាណ៩,២% បើធៀបនឹងរយៈពេលដូចគ្នាឆ្នាំ២០១៦។ នេះបើតាមប្រធានការិយាល័យស្ថិតិនៃកំពង់ផែស្វយ័តក្រុងព្រះសីហនុ ។
លោក អ៊ុក តុមេធី ប្រធានការិយាល័យស្ថិតិនៃកំពង់ផែស្វយ័តក្រុងព្រះសីហនុ បានឱ្យដឹងតាមទូរស័ព្ទថា ៥ខែកន្លងទៅនេះ បើតាមការកត់សម្គាល់សម្រាប់មុខទំនិញដែលកម្ពុជានាំចេញភាគច្រើន គឺសម្លៀកបំពាក់ និងអង្ករ ។ ដោយឡែក ផលិតផលនាំចូលមកវិញ គឺវត្ថុធាតុដើមបម្រើក្នុងវិស័យវាយនភ័ណ្ឌ និងសម្ភារប្រើប្រាស់សម្រាប់ការសាងសង់ ។
ទន្ទឹមនឹងនេះ ការបង្កើនសមត្ថភាពលើកដាក់កុងតឺន័ររបស់ផែបច្ចុប្បន្ន លោក អ៊ុក តុមេធី ថា ផែអាចធានា ប៉ុន្តែរយៈពេល៤ឬ៥ឆ្នាំទៅមុខទៀត បើផែនៅតែរក្សាបានកំណើនដូចពេលនេះ តម្រូវឲ្យបង្កើតផែថ្មីមួយទៀត ។
លោក លូ គឹមឈន់ ប្រធានអគ្គនាយកកំពង់ផែស្វយ័តក្រុងព្រះសីហនុ មានប្រសាសន៍ថា ៖ « ចំនួនកុងតឺន័រឆ្លងកាត់កំពង់ផែរយៈពេល៥ខែដើមឆ្នាំ២០១៧ កើនឡើងជាង៩% ខ្ញុំគិតថា នេះជាកម្រិតកំណើនមួយដ៏ខ្ពស់ ហើយយើងសង្ឃឹមថា ទៅមុខទៀតនឹងកើនឡើងកាន់តែល្អប្រសើរ ។ នៅដើមឆ្នាំ២០១៧ ចំនួនគ្រឿងចក្រយើងបានកើនឡើង២ដងនៃសមត្ថភាព ដែលធ្វើឱ្យអតិថិជនដែលចង់នាំកុងតឺន័រឆ្លងកាត់ផែនោះ គាត់មានទំនុកចិត្ត » ។
បើតាមលោកប្រធានអគ្គនាយកកំពង់ផែថា ផែកំពង់សោមដើរតួនាទីសំខាន់ក្នុងការលើកដាក់កុងតឺន័រ ហើយចំនួនកុងតឺន័រជាកត្តាកំណត់នៃការធ្វើអាជីវកម្ម ។ បើកំណើនជាមធ្យម១០%ក្នុងមួយឆ្នាំ ដូចនេះ ផែត្រូវការពង្រីកបន្ថែមជាង១០០ម៉ែត្រទៀតដើម្បីមានសមត្ថភាពពេញលេញទាំងការទាក់ទាញ និងប្រកួតប្រជែងនាពេលខាងមុខ ។
លោក លូ គឹមឈន់ បញ្ជាក់ថា ៖ « យើងមានគម្រោងធ្វើផែថ្មីមួយទៀត ដោយត្រូវការចំណាយប្រាក់ប្រមាណ២០០លានដុល្លារ ។ ផែនេះធ្វើក្នុងជម្រៅទឹក១៤,៥ម៉ែត្រ មានន័យថា ៩៣%នៃកប៉ាល់នៅក្នុងតំបន់អាចចូលចតផែបាន ខណៈសព្វថ្ងៃនេះ មានតែ១៨%នៃកប៉ាល់ក្នុងតំបន់អាស៊ីប៉ាស៊ីហ្វិកចូលចត ។ យើងប៉ាន់ស្មានថា នៅឆ្នាំ២០២២ គឺ៩៣%នៃកប៉ាល់ក្នុងតំបន់ និងកប៉ាល់ធំៗអាចចូលចតបាន នឹងធ្វើឱ្យថ្លៃដឹកជញ្ជូននៅតាមសមុទ្រធ្លាក់ចុះ ។ ពេលនោះ ផែកំពង់សោមទទួលបានភាពប្រកួតប្រជែងកាន់តែល្អ សេដ្ឋកិច្ចជាតិយើងក៏មានការប្រកួតប្រជែងល្អប្រសើរផងដែរ » ៕
ចែករំលែកព័តមាននេះ