ទីក្រុងហាណូយ ៖ តម្លៃអំបិលក្នុងស្រុកបានកើនឡើងយ៉ាងខ្លាំង ចាប់តាំងពីដើមខែមីនាមក ខណៈដែលកសិករធ្វើអំបិលបង្ហាញពីភាពមិនសប្បាយចិត្ត ក្នុងអំឡុងពេលអំបិលឡើងថ្លៃនេះ បែរជាអស់អំបិលលក់ ។
តម្លៃអំបិលបច្ចុប្បន្នបានកើនឡើង១០០% ចាប់ពីអំឡុងពេលប្រមូលផលដើមឆ្នាំនេះ ក្នុងនោះអំបិលខ្មៅលក់ក្នុងតម្លៃចន្លោះពី០,០៣ទៅ០,០៤ដុល្លារក្នុង១គីឡូក្រាម ហើយអំបិលធម្មតាលក់ក្នុងតម្លៃចន្លោះពី០,០៥ទៅ០,០៦ដុល្លារក្នុង១គីឡូក្រាម បើធៀបនឹងរយៈពេលដូចគ្នាកាលពីឆ្នាំមុន មានតម្លៃចន្លោះពី០,០២ទៅ០,០៣ដុល្លារ និង០,០១ទៅ០,០៥ដុល្លាររៀងគ្នា ។
អនុប្រធានសមាគមអំបិលខេត្ត Bac Lieu រាយការណ៍ថា អំបិលក្នុងស្ដុក និងនៅតាមស្រែត្រូវបានប្រមូលលក់អស់ហើយ ។ យ៉ាងណាក៏ដោយលោកនិយាយថា ថ្វីដ្បិតតែតម្រូវការ និងតម្លៃខ្ពស់ ប៉ុន្ដែកសិករមិនទទួលបានប្រាក់ចំណេញប៉ុន្មាននោះទេ ដោយសារសកម្មភាពផលិតមានតិចតួច ។
តាមកសិករធ្វើស្រែអំបិលម្នាក់និយាយថា តម្លៃទាបកាលពីប្រមូលផលឆ្នាំមុន ធ្វើឲ្យកសិករបាក់ទឹកចិត្តក្នុងការផលិត ។
យោងតាមលោក Duong Chi Thanh អនុប្រធាននាយកដ្ឋានកសិកម្ម និងអភិវឌ្ឍន៍ជនបទ បានឲ្យដឹងថា ហេតុផលមួយដែលធ្វើឲ្យការផ្គត់ផ្គង់ឆ្នាំនេះធ្លាក់ចុះ ដោយសារតែចំនួនអំបិលក្នុងស្ដុកកាលពីប្រមូលផលឆ្នាំមុននៅសល់ច្រើន ធ្វើឲ្យអ្នកផលិតអំបិលប្ដូរពីការធ្វើអំបិល មកចិញ្ចឹមត្រីវិញ ។
លក្ខខណ្ឌអាកាសធាតុមិនអំណោយផល ដូចជា រដូវវស្សាយូរពេក, ការផ្គត់ផ្គង់ធ្លាក់ចុះ ដោយសារតែពេលវេលាប្រមូលផលខ្លីពេក និងការកម្រិតតំបន់ឆ្នេរសម្រាប់ធ្វើស្រែអំបិលត្រឹម៥០% បើធៀបនឹងឆ្នាំមុន ក៏ជាហេតុផលនាំឲ្យទីផ្សារតម្រូវការ និងតម្លៃអំបិលនៅលើទីផ្សារកើនឡើងដែរ ។
យោងតាមការព្យាករនៅក្នុងខេត្ត Bac Lieu តែមួយ ក្នុងឆ្នាំ២០១៦-២០១៧ ការប្រមូលផលអំបិលបានតែចំនួន១.៧០០ហិកតា ដែលកាលពីមុនមានចំនួន២.៣០០ហិកតា ។ ការប្រមូលទិន្នផលកាលពីឆ្នាំ២០១៥ និង២០១៦ បានធ្លាក់ចុះ៣០% ហើយទិន្នផលដែលប្រមូលកាលពីពេលថ្មីៗនេះបានជាង១៦.៥០០តោនប៉ុណ្ណោះ ៕
ចែករំលែកព័តមាននេះ