ខេត្តមណ្ឌលគិរី ៖ ដើម្បីឆ្លើយតបនឹងតម្រូវការផ្ទះសំណាក់ សណ្ឋាគារ និងភោជនីយដ្ឋានកំពុងតែកើនឡើង វិនិយោគិនឯកជនក្នុងខេត្តមណ្ឌលគិរីគ្រោងនឹងវិនិយោគលើផ្នែកទាំងនេះបន្ថែមទៀត។ ជាមួយគ្នានេះ វិនិយោគិនទាំងនោះ
ខេត្តមណ្ឌលគិរី ៖ ដើម្បីឆ្លើយតបនឹងតម្រូវការផ្ទះសំណាក់ សណ្ឋាគារ និងភោជនីយដ្ឋានកំពុងតែកើនឡើង វិនិយោគិនឯកជនក្នុងខេត្តមណ្ឌលគិរីគ្រោងនឹងវិនិយោគលើផ្នែកទាំងនេះបន្ថែមទៀត។ ជាមួយគ្នានេះ វិនិយោគិនទាំងនោះបានសំណូមពរដល់ថ្នាក់ខេត្ត ជួយស្វែងរកតំបន់ទេសចរណ៍ធម្មជាតិបន្ថែម ឬស្ថាបនាហេដ្ឋារចនាសម្ព័ន្ធផ្លូវថ្នល់ទៅកាន់តំបន់ទេសចរណ៍ដែលមានស្រាប់ ដើម្បីឲ្យភ្ញៀវបានទៅលេង និងស្នាក់នៅច្រើនថ្ងៃ ។
លោក ស្វាយ សំអ៊ាង អភិបាលខេត្ត មានប្រសាសន៍ថា ការវិវត្តលើវិស័យទេសចរណ៍ក្នុងខេត្តបានកើនឡើងពីមួយឆ្នាំទៅមួយឆ្នាំ ។ ជាក់ស្ដែង ពេលនេះ ការអភិវឌ្ឍលើផ្ទះសំណាក់ និងសណ្ឋាគារនៅក្នុងខេត្តបានរីកចម្រើនជាបន្តបន្ទាប់ ក្នុងនោះទាំងសណ្ឋាគារ និងផ្ទះសំណាក់មានជាង៨០០បន្ទប់ ប៉ុន្តែនៅពេលមានបុណ្យទានឈប់សម្រាកម្ដងៗ បន្ទប់សណ្ឋាគារ និងផ្ទះសំណាក់មិនអាចទទួលភ្ញៀវគ្រប់ទេ ។ ដូចនេះ ត្រូវការវិនិយោគបន្ថែមទៀតពីវិនិយោគិននានាក្នុងប្រទេសកម្ពុជា ។
លោកបន្តថា ការវិនិយោគលើផ្ទះសំណាក់ និងសណ្ឋាគារក្នុងខេត្តនេះ កំពុងតែមានសក្ដានុពលខ្លាំងនាពេលបច្ចុប្បន្ន ហើយខាងរដ្ឋបាលខេត្តក៏បានសម្របសម្រួលរាល់ឯកសារ និងការបំពេញបែបបទវិនិយោគនានាដើម្បីឱ្យការវិនិយោគកាន់តែឆាប់រហ័ស ។ ម្យ៉ាងទៀត ប្រព័ន្ធហេដ្ឋារចនាសម្ព័ន្ធក្នុងខេត្តបច្ចុប្បន្ន ក៏បានល្អប្រសើរមួយចំនួនធំ ដែលងាយស្រួលសម្រាប់ភ្ញៀវទេសចរធ្វើដំណើរមកកាន់ខេត្តមណ្ឌលគិរី ខណៈប្រព័ន្ធអគ្គិសនីរបស់ខេត្ត ក៏មានគ្រប់គ្រាន់សម្រាប់បម្រើឱ្យការវិនិយោគពីសំណាក់វិនិយោគិននានាផងដែរ ។
លោក ម៉ុក យ៉ារាំង អ្នកចាត់ការទូទៅនៃផ្ទះសំណាក់និងរមណីយដ្ឋាន ក្រុងសែនមនោរម្យឱ្យដឹងថា លោកមានគម្រោងពង្រីកបន្ទប់បន្ថែមទៀតសម្រាប់ទទួលភ្ញៀវ ពេលពួកគាត់មកលេងខេត្តមណ្ឌលគិរីនៅរដូវបុណ្យទាន និងថ្ងៃឈប់សម្រាក ព្រោះនៅពេលថ្ងៃឈប់សម្រាកម្ដងៗ ផ្ទះសំណាក់ និងសណ្ឋាគារក្នុងខេត្តនេះមិនអាចទទួលភ្ញៀវគ្រប់គ្រាន់ទេ ។ ទន្ទឹមនឹងនេះ លោកក៏សំណូមពរឱ្យថ្នាក់ខេត្តជួយរកកន្លែងរមយណីយដ្ឋានល្អៗក្នុងខេត្តបន្ថែមទៀត ដើម្បីឱ្យភ្ញៀវមកហើយបានទស្សនាច្រើនថ្ងៃ។ ជាក់ស្ដែង រមណីយដ្ឋានដែលមានទេសភាព ស្អាតៗក្នុងខេត្តមានច្រើន នៅខ្វះតែផ្លូវសម្រាប់ចូលទៅតំបន់នោះប៉ុណ្ណោះ ។ ដូចនេះ បើសិនជាថ្នាក់ខេត្តជួយធ្វើផ្លូវឱ្យទៅដល់តំបន់រមណីយដ្ឋានទាំងនោះ ភ្ញៀវដែលមកដល់ខេត្តនេះហើយ នឹងបន្តស្នាក់នៅយូរថ្ងៃ ។
អ្នកស្រី ប៉ុន ពិសី ម្ចាស់ផ្ទះសំណាក់វិមានពេជ្រ ក៏បានឱ្យដឹងដែរថា ផ្ទះសំណាក់អ្នកស្រីទើបតែបើកទេ ប៉ុន្តែនៅរដូវបុណ្យ តែងមានភ្ញៀវមកស្នាក់នៅជាហូរហែ រកកន្លែងឲ្យភ្ញៀវស្នាក់នៅមិនបានទេ ពេលខ្លះភ្ញៀវត្រូវស្នាក់នៅបន្ទប់មួយពី៦ទៅ៨នាក់ ខណៈជាធម្មតា បន្ទប់មួយសម្រាប់តែភ្ញៀវយ៉ាងច្រើន៤នាក់ប៉ុណ្ណោះ ។
អ្នកស្រីបន្តថា ដោយសារតែភ្ញៀវច្រើន និងស្នាក់នៅលើសចំនួន ដូចនេះចាំបាច់ត្រូវដំឡើងថ្លៃខុសពីថ្ងៃធម្មតា ព្រោះបើភ្ញៀវស្នាក់នៅច្រើន ការចំណាយលើសេវាក៏ច្រើនដែរ ដូចជា ការប្រើប្រាស់ទឹក និងភ្លើងជាដើម ។ អ្នកស្រីនិយាយថា ៖ « ខ្ញុំក៏មានគម្រោងបន្ថែមបន្ទប់ទៀតដែរ ដើម្បីទទួលភ្ញៀវពេលមកលេងមណ្ឌលគិរីនៅរដូវបុណ្យទាន តែក៏សូមឱ្យថ្នាក់ដឹកនាំខេត្ត ជួយរកតំបន់រមណីយដ្ឋានបន្ថែមទៀតសម្រាប់ភ្ញៀវទស្សនាបានច្រើនថ្ងៃ ព្រោះអីនៅក្នុងខេត្តមណ្ឌលគិរីមានតំបន់ទេសចរណ៍ធម្មជាតិច្រើនណាស់ដែលភ្ញៀវមិនធ្លាប់ទៅដល់ ក៏ព្រោះតែ មិនទាន់មានផ្លូវស្អាតល្អ ។ ដូចនេះ បើសិនជាមានផ្លូវល្អអាចឲ្យរថយន្ត និងម៉ូតូទៅដល់នោះកំណើនភ្ញៀវទេសចរមកលេងខេត្តនេះ នឹងកាន់តែច្រើនទៀត » ។
ជាការឆ្លើយតប លោកអភិបាលខេត្ត ស្វាយ សំអ៊ាង ឱ្យដឹងថា ថ្នាក់ខេត្តក៏ចង់កសាងហេដ្ឋារចនាសម្ព័ន្ធបន្ថែមដែរ ដើម្បីឱ្យភ្ញៀវបានស្គាល់ពីតំបន់រមណីយដ្ឋានថ្មីៗជាច្រើនក្នុងខេត្តនេះ ប៉ុន្តែដោយសារតែថវិកាសម្រាប់អភិវឌ្ឍន៍ខេត្តមានកំណត់ ដូចនេះ ខេត្តត្រូវធ្វើបន្តិចម្ដងៗ ប៉ុន្តែទោះជាយ៉ាងណា នឹងធ្វើឱ្យលឿនដើម្បីឱ្យភ្ញៀវទេសចរបានស្គាល់រមណីយដ្ឋានធម្មជាតិប្លែកៗផ្សេងទៀត ៕
ចែករំលែកព័តមាននេះ