រាជធានីភ្នំពេញ ៖ ក្រុមបាល់ទាត់ជម្រើសជាតិកម្ពុជាដែលមានរហស្សនាមថាក្រុមគោព្រៃកម្ពុជាដែលចង់បំបែកកំណត់ត្រាលេងចាញ់ក្រុមជម្រើសជាតិឥណ្ឌូណេស៊ីក្នុងជំនួបមិត្តភាពអន្តរជាតិកម្ដៅសាច់ដុំនៅ
រាជធានីភ្នំពេញ ៖ ក្រុមបាល់ទាត់ជម្រើសជាតិកម្ពុជាដែលមានរហស្សនាមថាក្រុមគោព្រៃកម្ពុជាដែលចង់បំបែកកំណត់ត្រាលេងចាញ់ក្រុមជម្រើសជាតិឥណ្ឌូណេស៊ីក្នុងជំនួបមិត្តភាពអន្តរជាតិកម្ដៅសាច់ដុំនៅពហុកីឡដ្ឋានជាតិអូឡាំពិកកាលពីល្ងាចថ្ងៃទី៨ មិថុនានោះ ទីបំផុតបានត្រឹមតែខកចិត្តក្រោមក្រសែភ្នែកអ្នកគាំទ្រប្រមាណជាង៥ម៉ឺននាក់ដោយបន្តចាញ់ក្រុមមួយនេះ២-០យ៉ាងអាម៉ាស់ដដែលមុនបន្តជួបក្រុមជម្រើសជាតិអាហ្វហ្គានីស្ថាន ក្នុងវគ្គជម្រុះពានរង្វាន់ជើងឯកប្រចាំទ្វីបអាស៊ី ACQ (Asian Cup Qualification) 2019 នៅល្ងាចថ្ងៃទី១៣ មិថុនា សប្ដាហ៍ក្រោយនេះ ។
ការប្រកួតនៅតង់ទី១ ក្រុមទាំងពីរមានឱកាសនាំបាល់ទៅលេងមុខទីគូប្រកួតរៀងៗខ្លួន ជាពិសេសក្រុមកម្ពុជាថែមទាំងមានឱកាសទាត់បាល់ចេញពីជ្រុងនិងបាល់ពិន័យហ្វ្រីឃីគ២-៣ដងដែរតែគ្មានសំណាងសោះ ។ លុះដល់នាទីទី២៦ ក្រុមភ្ញៀវឥណ្ឌូណេស៊ីរកបាន១គ្រាប់នាំមុខមុនដែលធ្វើបានសម្រេចដោយកីឡាករIrfan Haarys Bachdim ហើយលទ្ធផលនេះបានរក្សារហូតដល់ចប់តង់ទី១។
ចូលដល់តង់ទី២ គ្រូបង្វឹកក្រុមគោព្រៃកម្ពុជាបានព្យាយាមបន្ថែមកម្លាំងនៅតំបន់ប្រយុទ្ធដែរប៉ុន្តែមិនអាចរកគ្រាប់បាល់បំប៉ោងសំណាញ់ទីគូប្រកួតបានដដែល ផ្ទុយទៅវិញបែរជាបណ្ដោយឱ្យកីឡាករ Gian Zola Nasrulloh Nugrahaរបស់ក្រុមឥណ្ឌូណេស៊ី ទាត់បាល់បញ្ចូលទីបន្ថែម១គ្រាប់ទៀតនៅចុងតង់ទី២គឺនៅនាទីទី៩០+៦ ។
១គ្រាប់ចុងក្រោយរបស់ក្រុមឥណ្ឌូណេស៊ីនេះត្រូវបានអ្នកគាំទ្រក៏ដូចជាអ្នកលេងភ្នាល់មួយចំនួនសម្ដែងការខឹងសម្បារហូតចោទប្រកាន់ថា ជាការរៀបចំឱ្យក្រុមឥណ្ឌូណេស៊ីស៊ីដាច់គ្រាប់តដើម្បីទទួលបានលាភសក្ការៈអ្វីមួយពីការប្រកួតនេះប៉ុណ្ណោះ ។ ទោះបីយ៉ាងណា អ្នកគាំទ្រខ្លះបានជំទាស់ចំពោះការចោទប្រកាន់នេះដោយពួកគេនិយាយថាជាការចៃដន្យប៉ុណ្ណោះដោយសារខ្សែការពាររបស់ក្រុមគោព្រៃកម្ពុជាខ្សោយធ្វើឱ្យមានចន្លោះប្រហោងច្រើនក្នុងតំបន់គ្រោះថ្នាក់ទើបផ្ដល់ឱកាសឱ្យគូប្រកួតស៊ុតបាល់បញ្ចូលទីនៅនាទីចុងក្រោយដោយស្រួលបែបនេះ ។
គួររំលឹកថា បើយោងតាមប្រវត្តិជួបគ្នាចំនួន៥លើកចុងក្រោយរវាងក្រុមទាំង២ឃើញថា ក្រុមគោព្រៃកម្ពុជាមិនដែលឈ្នះទាល់តែសោះសូម្បីឱកាសស្មើក៏គ្មានផង ។ ក្រោយចប់ការប្រកួតមិត្តភាពអន្តរជាតិនេះទៅ ក្រុមគោព្រៃកម្ពុជា ត្រូវបន្តបើកទ្វារទទួលក្រុមជម្រើសជាតិអាហ្វហ្គានីស្ថាន នៅថ្ងៃទី១៣ ខែមិថុនា ក្នុងជំនួបវគ្គជម្រុះជុំទី៣ពូលC នៃពានរង្វាន់ជើងឯកប្រចាំទ្វីបអាស៊ី ACQ (Asian Cup Qualification) 2019 ។ សង្ឃឹមថា ការប្រកួតលើកក្រោយនេះក្រុមគោព្រៃកម្ពុជានឹងធ្វើបានល្អជាងនេះដើម្បីបំពេញចិត្តអ្នកគាំទ្រមិនខាន ៕
ចែករំលែកព័តមាននេះ