រាជធានីភ្នំពេញ ៖ ក្រុមហ៊ុនយក្សមួយរបស់ប្រទេសចិនឈ្មោះ ShenZhen Win Win Decoration & Designing គ្រោងនឹងបោះទុនសាងសង់សណ្ឋាគារឲ្យបាន១០០កន្លែងនៅកម្ពុជា ក្នុងរយៈពេល៥ឆ្នាំខាងមុខនេះ ។
នៅក្នុងជំនួបពិភាក្សាជាមួយលោក ថោង ខុន រដ្ឋមន្ត្រីក្រសួងទេសចរណ៍ នាថ្ងៃទី៨ មិថុនា នៅទីស្តីការក្រសួង លោកស្រី Tao Jia ប្រធានក្រុមហ៊ុន ShenZhen Win Win Decoration & Designing ថ្លែងថា ក្នុងចំណោមសណ្ឋាគារចំនួន១០០កន្លែង គឺភាគច្រើនក្រុមហ៊ុនគ្រោងនឹងសាងសង់នៅប៉ែកខាងតំបន់ឆ្នេរសមុទ្រ ច្រើនជាងប៉ែកខាងខេត្តសៀមរាប ។
ទោះជាយ៉ាងណា លោកស្រីមិនទាន់បញ្ជាក់ឲ្យដឹងថា ការសាងសង់នឹងចាប់ផ្តើមនៅពេលណា និងគ្រោងបោះទុនប៉ុន្មានលានដុល្លារនៅឡើយទេ ។
លោក ថោង ខុន មានប្រសាសន៍ថា ការស្វែងរកឱកាសវិនិយោគទុនរបស់វិនិយោគិនចិននៅកម្ពុជានេះ គឺបានធ្វើឡើងបន្ទាប់ពីគេសម្លឹងមើលថា បច្ចុប្បន្នក៏ដូចជាទៅថ្ងៃអនាគត នឹងមានភ្ញៀវទេសចរចិនជាច្រើនមកទស្សនានៅកម្ពុជា ជាពិសេស នៅតំបន់ឆ្នេរសមុទ្រនារដូវត្រជាក់ ។ បច្ចុប្បន្ន រាជរដ្ឋាភិបាលដែលមានក្រសួងទេសចរណ៍ជាសេនាធិការ បាននិងកំពុងទាក់ទាញភ្ញៀវទេសចរចិនមកទស្សនានៅកម្ពុជា ឲ្យបាន២លាននាក់នៅឆ្នាំ២០២០ ។
នៅកម្ពុជាមានសណ្ឋាគារ និងផ្ទះសំណាក់ជាច្រើនបានកំពុងដំណើរការ ប៉ុន្តែរាល់ផ្ទះសំណាក់ និងសណ្ឋាគារស្នាក់នៅទាំងនោះ គឺមិនទាន់បំពេញតាមតម្រូវការនៃកំណើនភ្ញៀវទេសចរជាតិ អន្តរជាតិនៅឡើយទេ ។
របាយការណ៍ក្រសួងទេសចរណ៍ថា នៅក្នុងឆ្នាំ២០១៦ កម្ពុជាទទួលបានភ្ញៀវទេសចរប្រមាណជាង៥លាននាក់ និងរកចំណូលដាក់ចូលក្នុងថវិកាជាតិ ប្រមាណ៣.៤០០លានដុល្លារអាមេរិក ហើយតាមទិសដៅបន្តរបស់ក្រសួងទេសចរណ៍នៅឆ្នាំ២០២០ នឹងទាក់ទាញកំណើនភ្ញៀវទេសចរបាន៧លាននាក់ និងអាចរកចំណូលដាក់បញ្ចូលក្នុងថវិកាជាតិ ប្រមាណ៥ពាន់លានដុល្លារអាមេរិក ។
ប្រធានសមាគមទេសចរណ៍កម្ពុជា លោក ឌិន សុមេធារិទ្ធ បានថ្លែងថា ការប្រកួតប្រជែងក្នុងវិស័យនេះពិតជាខ្លាំង ដោយសារចំនួនមកដល់របស់ភ្ញៀវទេសចររំពឹងកើនឡើងក្នុងរង្វង់៥ទៅ៧%ប្រចាំឆ្នាំប៉ុណ្ណោះ ប៉ុន្តែចំនួនសណ្ឋាគារថ្មីៗបានកើនឡើងច្រើន ដោយម្ចាស់សណ្ឋាគារនីមួយៗនៅខេត្តសៀមរាបបញ្ចុះតម្លៃច្រើន ធ្វើឲ្យសណ្ឋាគារតូចៗប្រឈមមុខនឹងបញ្ហា ។
លោកបន្តថា ៖ « នៅរាជធានីភ្នំពេញមិនសូវមានការបញ្ចុះតម្លៃនោះទេ ប៉ុន្តែខេត្តសៀមរាប ការកក់បន្ទប់សណ្ឋាគារបានបញ្ចុះតម្លៃខ្លាំងដើម្បីទាក់ទាញភ្ញៀវស្នាក់នៅ » ។
យោងតាមការសិក្សារបស់ក្រុមហ៊ុនប៊ុណ្ណារៀលធីគ្រុប ដែលបានបញ្ចប់កាលពីពេលថ្មីៗនេះរកឃើញថា នៅខេត្តសៀមរាបជាទីក្រុងមានចំនួនសណ្ឋាគារ និងការវិនិយោគសណ្ឋាគារថ្មីៗច្រើនជាងគេ ។ ជាក់ស្តែង ទីក្រុងនេះមានសណ្ឋាគារចំនួន៥៦៨ និងបន្ទប់សរុប២៣.០៤១បន្ទប់, រាជធានីភ្នំពេញមានសណ្ឋាគារចំនួន៣៤៨ និងបន្ទប់សរុប១៦.៣៧០បន្ទប់, ខេត្តព្រះសីហនុមានសណ្ឋាគារចំនួន១៦០ និងបន្ទប់សរុប៥.៤៦២បន្ទប់ និងខេត្តបាត់ដំបងមានសណ្ឋាគារចំនួន៤៩ និងបន្ទប់សរុប១.៧៦០ ៕
ចែករំលែកព័តមាននេះ