រាជធានីភ្នំពេញ ៖ បន្ទាប់ពីលោកគ្រូតាក្រមាមាស លោក សាន គឹមស៊ាន ប្រធានបណ្ឌិត្យសភាល្បុក្កតោកម្ពុជា និងជាស្ថាបនិកចងក្រងឯកសារល្បុក្កតោប្រកាសលាឈប់ និងបានទម្លាយនូវរឿងរ៉ាវជាច្រើនពាក់ព័ន្ធនឹងមូលហេតុដែលនាំឱ្យលោកឈប់សហការជាមួយម្ចាស់ហាង«ល្បុក្កតោក្លិប»នៅខេត្តសៀមរាប ម្ចាស់ហាងមួយនេះបានចេញមុខបកអាក្រាតវិញថា បញ្ហាកើតឡើងគឺបណ្ដាលមកពីលោក សាន គឹមស៊ាន ធ្វើរឿងមិនស្មើភាព ។ អ្នកនាងថាហាងរបស់ខ្លួននៅតែបន្តដំណើរការរៀបចំការប្រកួត និងសម្ដែងល្បុក្កតោជាធម្មតា ដោយសូម្បីតែឈ្មោះហាងដែលលោក សាន គឹមស៊ាន ទាមទារឱ្យប្ដូរចេញ ក៏ខ្លួនមិនប្ដូរដែរ ។
អ្នកនាង ពេជ្រ ខេនឌី ជាម្ចាស់ហាងបានអះអាងថា អ្នកនាងមិនបានយកល្បុក្កតោទៅប្រកួតក្នុងហាងដើម្បីឱ្យភ្ញៀវចាក់ភ្នាល់នោះទេ ផ្ទុយទៅវិញគឺមានតែជំរុញឱ្យកីឡាករកីឡាការិនីសម្ដែង និងប្រកួតគ្នាយកប្រាក់រង្វាន់ ដើម្បីឱ្យភ្ញៀវបានឃើញពីល្បុក្កតោខ្មែរ ។ អ្នកនាងថា ហេតុផលដែលនាំឱ្យនាងសម្រេចចិត្តបោះទុនបើកហាង ហើយធ្វើជាសង្វៀនអស់រាប់ពាន់រាប់ម៉ឺនដុល្លារដើម្បីបើកឱ្យកីឡាករកីឡាការិនីសម្ដែងក្បាច់ល្បុក្កតោ និងឱ្យប្រកួតគ្នាផង គឺដើម្បីឱ្យលោកសាន គឹមស៊ាន ដែលអ្នកនាងគោរពស្រឡាញ់ដូចជីតាមានមុខក្នុងការលើកកម្ពស់ដល់កីឡាមួយនេះប៉ុណ្ណោះ ។ប៉ុន្តែចុងក្រោយលោកបែរជាធ្វើឱ្យមានរឿងចម្រូងចម្រាសជាមួយអ្នកនាងដោយសារតែលោកមានបញ្ហាពាក់ព័ន្ធរឿងលុយកាក់និងរឿងផ្គូផ្គងកីឡាករក្នុងក្លិបតែមួយឱ្យឡើងប្រកួតគ្នា ធ្វើឱ្យអ្នកនាងទទួលយកមិនបាន ទើបមានបញ្ហា។
អ្នកនាងថា បញ្ហាដែលកើតមានឡើងគឺដោយសារតែអ្នកនាងស្នើឱ្យកីឡាករ-កីឡាការិនីដែលមានឈ្មោះសម្ដែងជាប្រចាំ៤នាក់ និងអ្នកឡើងប្រកួតក្រោមការផ្គូផ្គងឱ្យមកបើកលុយជាមួយហាងនាងដោយផ្ទាល់ តែលោក សាន គឹមស៊ាន មិនព្រមទើបក្លាយជាបញ្ហា ។ អ្នកនាងថា រឿងរ៉ាវដែលកើតមានឡើង គឺដោយសារតែលោក សាន គឹមស៊ាន កិបកេងប្រាក់កម្រៃកីឡាករធ្វើឱ្យពួកគេតវ៉ា និងស្នើឱ្យអ្នកនាងជួយអន្តរាគមន៍ ទើបអ្នកនាងសុំឱ្យលោកបញ្ជូនឈ្មោះកីឡាករឱ្យមកបើកប្រាក់កម្រៃពីអ្នកនាងផ្ទាល់ តែលោកនៅតែចង់ក្ដោបក្ដាប់លុយកាក់កីឡាករទើបអ្នកនាងទទួលយកមិនបាន ។ អ្នកនាងថា កីឡាករ និងគណៈកម្មការផ្ដល់ពិន្ទុនាងបានទទួលដំណឹងថា ទទួលបានប្រាក់កម្រៃមិនសមនឹងការប្រឹងប្រែងនោះទេ ទើបបណ្ដាលឱ្យកីឡាករខ្លះ និងគ្រូជាគណៈកម្មការខ្លះសុំឈប់ដោយសារតែស្មានថាអ្នកនាងជាអ្នកឱ្យកម្រៃតិច ។ អ្នកនាងថាលោក សាន គឹមស៊ាន រមែងទាមទារចំណុចនេះចំណុចនោះធ្វើឱ្យអ្នកនាងឈឺក្បាល ដោយអ្នកនាងថា កីឡាករដែលមានបទពិសោធន៍ គឺឈ្នះ៨០ដុល្លារ និងចាញ់៦០ដុល្លារ និងសម្រាប់កីឡាករថ្មីដែលហាងយកមកលើកស្ទួយគឺឈ្នះ៦០ដុល្លារ និងចាញ់៤០ដុល្លារ បូករួមនឹងថ្លៃធ្វើដំណើរ២៥ដុល្លារ និងថ្លៃហូបចុកទៀត ។
ប៉ុន្តែជាក់ស្ដែងលោក សាន គឹមស៊ាន មិនឱ្យកីឡាករឈ្នះចាញ់តាមតម្លៃដែលហាងផ្ដល់ឱ្យនោះទេ ទើបធ្វើឱ្យអ្នកនាងទទួលយកមិនបាន ដោយសារតែមានកីឡាករ-កីឡាការិនីលើកឡើងថា មកប្រកួតក្នុងហាងរបស់អ្នកនាងចង់ងាប់ចង់រស់បានតែ២០ទៅ៣០ដុល្លារសម្រាប់មួយប្រកួត ។ អ្នកនាងថា ការប្រកួតក្នុងមួយសប្ដាហ៍ៗ គឺអ្នកនាងចំណាយដល់ពាន់ដុល្លារ ហើយការពិតបើអ្នកនាងមិនចង់លើកស្ទួយកីឡាល្បុក្កតោ គឺអ្នកនាងយកសង្វៀនដែលបានសាងសង់នៅកណ្ដាលភោជនីយដ្ឋាននោះច្នៃជាសង្វៀនប្រដាល់សេរីវិញក៏បានដែរ តែបណ្ដាលមកពីអ្នកនាងយល់ថា ប្រដាល់សេរីមានទីផ្សារហើយ ហើយល្បុក្កតោមិនមានការប្រកួតណាមួយក្រៅពីការសម្ដែងទើបអ្នកនាងប្រកាន់ជំហរនៅតែចង់ឱ្យសង្វៀនក្នុងហាងរបស់អ្នកនាងបន្តការប្រកួតល្បុក្កតោ ។ អ្នកនាងថា លោកសាន គឹមស៊ាន បានបង្កផលរមាស់ចាប់តាំងពីអ្នកនាងប្រគល់សិទ្ធិឱ្យចាត់ចែងរៀបចំការប្រកួតក្នុងភោជនីយដ្ឋានរបស់អ្នកនាងនៅខេត្តសៀមរាប ។ ក្នុងនោះសូម្បីតែលុយស្នើឱ្យទិញសម្ភារសម្រាប់ប្រើប្រាស់ក្នុងហាងក៏លោកកិបកេងធ្វើឱ្យមានបញ្ហាផងដែរ ។ អ្នកនាងថា បញ្ហាដែលបានកើតឡើង គឺលោក សាន គឹមស៊ាន មានបញ្ហារឿងលុយកាក់ជាមួយកីឡាករ ពេទ្យកីឡាករ និងអ្នកឱ្យពិន្ទុ ដោយកញ្ចប់ប្រាក់សម្រាប់ជួលគ្រូពេទ្យក្នុងពេលប្រកួត គឺលោកបែរជាដាក់ភរិយារបស់ខ្លួនដែលគ្មានជំនាញពេទ្យឱ្យមកធ្វើពេទ្យ និងកិបកេងលុយកាក់កីឡាករច្រើនទៀត ទើបមានបញ្ហា ។
អ្នកនាងថា ហាងដែលលោក សាន គឹមស៊ាន ទាមទារឱ្យដូរឈ្មោះ គឺអ្នកនាងយល់ថាជារឿងហួសហេតុ ដោយសារតែឈ្មោះ «ល្បុក្កតោក្លិប»នេះ គឺអ្នកនាងបានសុំច្បាប់ពីខាងសហព័ន្ធ និងថាឈ្មោះល្បុក្កតោនេះ មិនមែនបង្កើតឡើងដោយលោកសាន គឹមស៊ាននោះទេ ។
អ្នកនាងថា ដរាបណាសហព័ន្ធមិនចេញបញ្ជាឱ្យផ្លាស់ប្ដូរទេ ហើយបើមានបញ្ហាដល់ថ្នាក់ត្រូវដូរឈ្មោះមែន ក៏នាងនៅតែប្រកាន់ជំហរបើកការប្រដាល់ឱ្យភ្ញៀវមើលនៅក្នុងហាងដដែល ដោយគ្រាន់តែប្ដូរពីល្បុក្កតោទៅជាការប្រដាល់សេរីជាដើម ដើម្បីលើកមុខលើកមាត់វិស័យកីឡា ។ អ្នកនាងថា លោក សាន គឹមស៊ាន ចោទថា អ្នកនាងយកល្បុក្កតោធ្វើអាជីវកម្ម ប៉ុន្តែធាតុពិតបើហាងរបស់អ្នកនាងមិនមានល្បុក្កតោសម្ដែង ឬប្រកួតគ្នាក៏ដំណើរការបានដោយមិនពិបាកនោះដែរ ជាពិសេសនៅពេលសង្វៀនរបស់ហាងប្ដូរជាទម្រង់ប្រកួតប្រដាល់សេរីអីវិញ។ អ្នកនាងថា បើលោក សាន គឹមស៊ាន មិនមានបញ្ហាពុករលួយក្នុងការចាត់ចែងការងារ បញ្ហាដើរចេញរបស់លោកក៏មិនកើតឡើងនោះដែរជាពិសេសបន្ទាប់ពីនាងទាមទារឱ្យកីឡាករ អាជ្ញាកណ្ដាល និងអ្នកដឹកនាំកីឡាករមកប្រកួតជាដើមមកបើកលុយដោយផ្ទាល់ជាមួយហាង ដោយសារតែអ្នកនាងដឹងថា កម្រៃដែលពួកគេត្រូវទទួលបានគឺមិនបានគ្រប់នៅពេលប្រគល់លុយឱ្យបើកតាមលោក សាន គឹមស៊ាន ។
អ្នកនាងថា ខ្លួនមានភស្ដុតាងទាំងឯកសារ និងឯកសាររស់ ទើបអ្នកនាងប្រកាសមិនខ្លាចនោះទេ ដោយអ្នកនាងបានចាត់ទុកថា លោក សាន គឹមស៊ាន មានបំណងធ្វើឱ្យប៉ះពាល់ដល់ការលើកស្ទួយល្បុក្កតោដែលនាងប្រឹងវិនិយោគនោះផង ។
លោក សាន គឹមស៊ាន មិនទាន់អាចទាក់ទងសុំការបំភ្លឺបានទេ ប៉ុន្តែយោងតាមអ្វីដែលលោកអះអាងគឺលោកសម្រេចចិត្តដើរចេញដោយសារតែអ្នកនាងពេជ្រ ខេនឌី មិនគោរពតាមអ្វីដែលបានព្រមព្រៀង និងថាអ្វីដែលលោកទទួលយកមិនបានគឺអ្នកនាងបានយកល្បុក្កតោធ្វើជាល្បែងភ្នាល់ និងចោទថា អ្នកនាងយកកីឡានេះធ្វើជាអាជីវកម្មបណ្ដាលឱ្យមានការប៉ះពាល់ ។ លោកថា នឹងស្នើថ្នាក់ដឹកនាំសហព័ន្ធឱ្យអ្នកនាងដូរឈ្មោះហាងដើម្បីកុំឱ្យយកល្បុក្កតោធ្វើអាជីវកម្មបណ្ដាលឱ្យមានការប៉ះពាល់បន្តទៀត ៕
ចែករំលែកព័តមាននេះ