រាជធានីភ្នំពេញ ៖ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានអះអាងថានៅឆ្នាំ២០១៧ ប្រជាជនកម្ពុជាជាង ៨៩ភាគរយ នៃចំនួនដែលបានចុះឈ្មោះបោះឆ្នោត បាននាំគ្នាទៅបោះឆ្នោតយ៉ាងសស្រាក់សស្រាំ ដើម្បីបំពេញកាតព្វកិច្ចរបស់ខ្លួន ជ្រើសរើសតំណាងរបស់ខ្លួនក្នុងការដឹកនាំ និងគ្រប់គ្រងមូលដ្ឋាន ឃុំ-សង្កាត់ របស់ខ្លួន ។
លោក សុខ ឥសាន បានឲ្យដឹងនៅថ្ងៃទី០៦ ខែមិថុនា ឆ្នាំ២០១៧ តាមលទ្ធផលនៃការសម្តែងមតិរបស់ប្រជាពលរដ្ឋ ឃើញលទ្ធផលបណ្តោះអាសនៈគណបក្សប្រជាជនកម្ពុជា បានទទួលសម្លេង ឆ្នោតគាំទ្រចំនួន ៣,៥២៩,៤០០ ស្មើនឹង ៥១.៣៩ភាគរយ ។ អាសនៈមេឃុំ សង្កាត់១,១៥៨ ស្មើនឹង ៧០.៣៥ភាគរយ ។ អាសនៈសរុប ៦,៥២១ ស្មើនឹង ៥៦.៣៥ភាគរយ ។
ចំណែក គណបក្សសាង្គ្រោះជាតិ បានទទួលបានសម្លេងឆ្នោតសរុបចំនួន៣,០៣៧,០៥៣ ស្មើនឹង ៤៤.២២ភាគរយ បានអាសនៈមេឃុំ ចៅសង្កាត់៤៨៧ ស្មើនឹង ២៩. ៥៩ភាគរយ ។ អាសនៈសរុបចំនួន ៤,៩៩៣ ស្មើនឹង ៤៣.១៥ភាគរយ ។
អ្នកនាំពាក្យបក្សកាន់អំណាចបានលើកឡើង និងគូសបញ្ជាក់ថា « តាមលទ្ធផលខាងលើ គណបក្សប្រជាជនកម្ពុជា ទោះបីមិនអាចផ្តួលគណបក្សសង្គ្រោះជាតិឲ្យសន្លប់ក្តី ក៏គណបក្សប្រជាជនកម្ពុជានៅតែឈ្នះដាច់ដដែល ហើយគណបក្សសង្គ្រោះជាតិនៅតែចាញ់ ទោះបីមិនសន្លប់ក្តី ក៏ចាត់ទុកថាចាញ់ពិន្ទុដែរ ។ ទោះឈ្នះដោយពិន្ទុក៏នៅតែឈ្នះ ហើយទោះបីចាញ់ដោយពិន្ទុក៏នៅតែចាញ់ដដែល ។ មិនបាច់ខិតខំនិយាយកែមុខមាត់អ្វីទេ បើចាញ់ហើយទទួលស្គាល់ចាញ់ទៅ ចាញ់ដោយអស់ចិត្តហើយ ។ ឈ្នះ ឬចាញ់ វាស្ថិតនៅលើលទ្ធផលនៃការបោះឆ្នោត មិនអាចប្រកែកបានឡើយ » ។
ជាមួយគ្នានោះដែរ លោក សុខ ឥសាន ថាគណបក្សប្រជាជនកម្ពុជា ទទួលបានសំឡេងឆ្នោតសរុប ៣,៥២៩,៤០០ ស្មើនឹង ៥១.៣៩ភាគរយ ។ មេឃុំមានចំនួន ១,១៥៨ ស្មើ ៧០.៣៥ភាគរយ ។ ជំទប់ទី១ មានចំនួន ១,១៤៣ ស្មើ ៦៩.៥៩ភាគរយ ។ ជំទប់ទី២ មានចំនួន ៥១១ ស្មើ ៣១.០៤ភាគរយ ។
គណបក្សសង្គ្រោះជាតិ ទទួលបានសំឡេងឆ្នោតសរុបចំនួន ៣,០៣៧,០៥៣ ស្មើ ៤៤.២២ភាគរយ បានអាសនៈសរុប ៤,៩៩៣អាសនៈ មេឃុំចៅសង្កាត់ ៤៨៧ ស្មើ ២៩.៥៩ ភាគរយ ។ ជំទប់ទី១ មានចំនួន ៤៩៩ ស្មើ ៣០.៣២ ភាគរយ ។ ជំទប់ទី២ មានចំនួន ១,០៨៧ ស្មើ ៦៦.០៤ភាគរយ ។
លោកថាបើគិតសំឡេងឆ្នោតឆ្នាំ២០១៣ គណបក្សសង្គ្រោះជាតិ ត្រូវបានមេឃុំ ៦១២មេឃុំ ឥឡូវបានមេឃុំតែ ៤៨៧ គណបក្សសង្គ្រោះជាតិត្រូវបាត់បង់មេឃុំអស់ ១២៥ ។ ផ្អែកលើតួលេខខាងលើនេះ គណបក្សទាំងពីរសុទ្ធតែឈ្នះដូចគ្នា គ្រាន់តែគណបក្សប្រជាជនកម្ពុជា ឈ្នះច្រើនជាងគណបក្សសាង្គ្រោះជាតិ ដែលអាចឲ្យគណបក្សប្រជាជនកម្ពុជា នៅតែជាគណបក្សកាន់អំណាចតទៅមុខទៀត ហើយគណបក្សសង្គ្រោះជាតិ នៅរក្សាតំណែងជាគណបក្សប្រឆាំងតទៅមុខយូរទៅទៀតដែរ ៕
ចែករំលែកព័តមាននេះ