រាជធានីភ្នំពេញ ៖ កាលពីវេលាម៉ោង០៧និង៤០នាទី យប់ថ្ងៃទី០៥ ខែមិថុនា ឆ្នាំ២០១៧ មានយុវជនយុវនារីបួននាក់បើកបរម៉ូតូមួយគ្រឿង ទើបតែចេញពីធ្វើការត្រូវបានជនសង្ស័យជាច្រើននាក់ បើកម៉ូតូមកធ្វើសកម្មភាពឆក់កាបូបស្ពាយបានសម្រេច នៅត្រង់ចំណុចស្តុបកៅដាយ ស្ថិតក្នុងសង្កាត់ទំនប់ទឹក ហើយជនសង្ស័យមិនអស់ចិត្តបានដេញតាមកាប់ប្លន់យកម៉ូតូទៀតតែមិនបានសម្រេច នៅត្រង់ចំណុចកន្លែងទទួលបញ្ចាំកៅដាយ ស្ថិតក្នុងសង្កាត់ទួលស្វាយព្រៃទី២ ខណ្ឌចំកាមន ។
ជនរគ្រោះទី១ដែលជាអ្នកបើកម៉ូតូមានឈ្មោះ គឹម វឌ្ឍនះ ភេទប្រុស អាយុ២០ឆ្នាំ មុខរបរជាងផ្សាដែក ជនរងគ្រោះទី២ដែលជាម្ចាស់កាបូបមានឈ្មោះ នី ស្រីកា ភេទស្រី អាយុ១៨ឆ្នាំ ជាបុគ្គលិកហាងស្ទីម និងម៉ាស្សាយីហោ អូគីដេ និងជនរងគ្រោះស្រីៗពីរនាក់ទៀតដែលជាអ្នករួមដំណើរពីក្រោយ ហើយនាក់ទាំងបួនស្នាក់នៅផ្ទះជួលសង្កាត់ស្ទឹងមានជ័យ ខណ្ឌមានជ័យ និងបើកបរម៉ូតូមួយគ្រឿងម៉ាក សុយសាគីនិច ពណ៌ស ពាក់ស្លាកលេខភ្នំពេញ ១CP-៧៦៣០ ។ បើតាមសម្តីពីជនរងគ្រោះបានរៀបរាប់ឲ្យដឹងថា នៅមុនពេលកើតហេតុពួកគេជិះម៉ូតូចេញពីកន្លែងធ្វើការនៅហាងស្ទីម និងម៉ាស្សាយីហោ អូគីដេ ហើយបំណងជិះទៅចាក់សាំងនៅម្តុំកន្លែងកើតហេតុ ដោយធ្វើដំណើរតាមបណ្តោយផ្លូវ២០៥ ក្នុងទិសដៅពីលិចទៅកើត លុះមកដល់ចំណុចកើតហេតុ ស្រាប់តែលេចមុខជនសង្ស័យជាង១០នាក់ជិះម៉ូតូ៧ទៅ៨គ្រឿងមិនចាំម៉ាក បើកបញ្ច្រាសទិសគ្នា ជនសង្ស័យក៏ស្រែកថា អានឹងហើយៗ អានឹងហើយៗ រួចក៏បត់ត្រលប់ក្រោយជិះដេញតាមពួកគេ ហើយមានជនសង្ស័យ២នាក់ជិះម៉ូតូមួយគ្រឿងមិនចាំម៉ាកបានធ្វើសកម្មភាពឆក់កាបូបស្ពាយរបស់ជនរងគ្រោះបានសម្រេច ហើយពួកគេមានបំណងជិះទៅឲ្យគេជួយ ក៏ត្រូវបក្សពួករបស់ជនសង្ស័យជិះដេញតាមពីក្រោយរហតូទៅដល់កន្លែងកើតហេតុជនសង្ស័យក៏បានដកដាវមួយដើមបំណងកាប់ទើបពួកគេផ្តួលម៉ូតូ ខណៈពេលនោះមានជនសង្ស័យម្នាក់បំរុងលើកម៉ូតូជិះក៏ត្រូវពួកគេស្រែកឆោឡោ បណ្តាលឲ្យជនសង្ស័យភ័យនាំគ្នាជិះម៉ូតូរត់គេចខ្លួនបាត់ស្រមោលដោយសុវត្តិភាព ។ នៅក្នុងកាបូបដែលជនសង្ស័យឆក់យកទៅនោះមានលុយចំនួន២០ដុល្លា និងគ្រឿងសំអាងមួយចំនួន ។
ក្រោយពេលកើតហេតុជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលទួលស្វាយព្រៃទី២ បែរជាមេប៉ុស្តិ៍ដេញឲ្យទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលទំនប់ទឹក ខណៈពេលដែលទៅដល់ប៉ុស្តិ៍ទំនប់ទឹកបែរជាមេប៉ុស្តិ៍ដេញឲ្យទៅដាក់ពាក្យបណ្តឹងនៅប៉ុស្តិ៍ទួលស្វាយទី២វិញ ធ្វើឲ្យជនរងគ្រោះជិះទៅវិញទៅមកពីរបីត្រលប់ ទើបខាងប៉ុស្តិ៍នគរបាលរដ្ឋបាលទំនប់ទឹកព្រមទទួលពាក្យបណ្តឹងរបស់ជនរងគ្រោះ ៕
ចែករំលែកព័តមាននេះ