សហរដ្ឋអាមេរិក ៖ លោកប្រធានាធិបតី ដូណាល់ ត្រាំ អាចនឹងចាប់ផ្តើមសង្គ្រាមពាណិជ្ជកម្ម ព្រោះតែការសម្រេចចិត្តថា ដកសហរដ្ឋអាមេរិកចេញពីកិច្ចព្រមព្រៀងបរិយាកាសទីក្រុងប៉ារីស ។
នេះគឺជាការវាយតម្លៃរបស់អ្នកជំនាញផ្នែកពាណិជ្ជកម្មដែលអះអាងថា ប្រទេសដទៃអាចនឹងឆ្លើយតបមកវិញ តាមរយៈការដាក់ពន្ធនាំចូលលើផលិតផលអាមេរិក ដែលមានតម្លៃទាបក្នុងការផលិតដោយខ្លួនឯង ។
ការដកខ្លួនចេញពីកិច្ចព្រមព្រៀងទីក្រុងប៉ារីសនេះ អាចនឹងជួយឲ្យក្រុមហ៊ុនអាមេរិកផលិតផលិតផលមួយចំនួនដូចជា ដែកថែបតម្លៃទាបជាងដៃគូប្រកួតប្រជែងក្នុងពិភពលោក ប៉ុន្តែវិធានការពាណិជ្ជកម្មសងសឹកអាចនឹងកើតមានឡើងសម្រាប់ដៃគូពាណិជ្ជកម្មរបស់សហរដ្ឋអាមេរិកផងដែរ ។
ឧបករណ៍ដែលពួកគេអាចប្រើប្រាស់បានមានដូចជា ការដាក់ពន្ធលើឧស្ម័នកាបូនិក ដូចនឹងពន្ធលើផលិតផលអាមេរិកដែលឆ្លងកាត់ព្រំប្រទល់ ។ ប្រសិនបើផលិតផលនោះផលិតបង្កជាធាតុបំពុលច្រើន ពន្ធលើផលិតផលក៏ខ្ពស់តាមនោះដែរ ។
លោក Jeff Schott អ្នកជំនាញផ្នែកពាណិជ្ជកម្ម និយាយថា ប្រទេសទាំងនោះនឹងមិនដាក់ពន្ធនេះភ្លាមៗទេ ប៉ុន្តែខណៈពួកគេបន្តអនុម័តគោលនយោបាយបរិស្ថានស្អាត ការអាក់អន់ចិត្តលើសហរដ្ឋអាមេរិក គឺមានកាន់តែខ្លាំងឡើង ។ លោកថា ៖ « វាអាចជាការគំរាមកំហែងសម្រាប់ក្រុមហ៊ុនអាមេរិក » ។
កាលពីថ្ងៃព្រហស្បតិ៍ ក្រុមហ៊ុនអាមេរិកធំៗចំនួន២៥ បានព្រមានលោក ត្រាំ ក្នុងសំបុត្រមួយថា ៖ « ការដកខ្លួនចេញពីកិច្ចព្រមព្រៀងអាចនឹងបង្កឲ្យមានវិធានការសងសឹកពីប្រទេសដទៃ» ។
សំបុត្រនេះត្រូវបានចុះហត្ថលេខាពីក្រុមហ៊ុន Apple, Facebook, Google, Morgan Stanley, Microsoft, Salesforce, Unilever និង Gap ផងដែរ ៕
ចែករំលែកព័តមាននេះ