ប្រទេសចិន ៖ សត្វដង្កូវសរាប់ម៉ឺនក្បាលវារចុះឡើងយ៉ាងលឿនទៅសម្អាតសាច់ និងផ្លែឈើ ដែលនៅសល់ក្នុងកសិដ្ឋានចម្លែកមួយនៅប៉ែកនិរតីប្រទេសចិន ។ វាប្រហែលជាមិនល្អមើលទេ ប៉ុន្តែវាអាចនឹងជួយដល់ប្រទេសចិន ក្នុងការដោះស្រាយបញ្ហាកាកសំណល់អាហារដែលគរដូចភ្នំ ។
បើយោងតាមអ្នកជំនាញឲ្យដឹងថា ដង្កូវមួយក្បាលអាចស៊ីកាកសំណល់ច្រើនជាងទំហំខ្លួនរបស់វាពីរដងក្នុងមួយថ្ងៃ ។ កសិដ្ឋានក្នុងខេត្ត Sichuan នេះ នឹងធ្វើឲ្យដង្កូវទាំងនោះក្លាយជាចំណីសត្វដែលមានប្រូតេអុីនខ្ពស់ ហើយប្រើប្រាស់លាមករបស់ដង្កូវសម្រាប់ធ្វើជាជីធម្មជាតិវិញផងដែរ ។
លោក Hu Rong អ្នកគ្រប់គ្រងកសិដ្ឋានមួយនៅជិតទីក្រុង Pengshan និយាយថា ៖ « ដង្កូវទាំងនោះមិនគួរឲ្យខ្ពើមទេ ។ វាកំពុងតែគ្រប់គ្រងកាកសំណល់អាហារ ។ អ្នកត្រូវតែមើលមកវាពីជ្រុងមួយទៀត » ។
គួរបញ្ជាក់ថា ដង្កូវទាំងនោះមិនមានកង្វះខាតអាហារទេ ដោយប្រជាជនម្នាក់ៗបោះចោលអាហារប្រមាណយ៉ាងតិច៣០គីឡូក្រាមក្នុងមួយឆ្នាំ ខណៈចិនមានប្រជាជនសរុបស្មើ១,៤ប៊ីលាននាក់ ។
លោក Hu និយាយថា ៖ « ជាមធ្យម ដង្កូវ១គីឡូក្រាមអាចស៊ីកាកសំណល់បាន២គីឡូក្រាមក្នុងរយៈពេល៤ម៉ោង » ។
លោក Hu បានទិញអាហារដែលគេបោះចោលពី Chengwei Environment ជាក្រុមហ៊ុនប្រមូលកាកសំណល់ពីភោជនីយដ្ឋានចំនួន២ពាន់កន្លែងក្នុងទីក្រុង Chengdu ។
បើតាមអង្គការអាហារ និងកសិកម្មរបស់អង្គការសហប្រជាជាតិ (FAO) ឲ្យដឹងថា ១ភាគ៣នៃអាហារដែលត្រូវបានផលិតសម្រាប់ការទទួលទានរបស់មនុស្សជារៀងរាល់ឆ្នាំ ឬស្មើនឹង១,៣ប៊ីលានតោនត្រូវបានបោះចោល ខណៈមានប្រជាជនប្រមាណ៨៧០លាននាក់កំពុងជួបប្រទះកង្វះអាហារ ។ ជារៀងរាល់ឆ្នាំ ប្រទេសចិនមានកាកសំណាល់អាហារប្រមាណ៤០លានតោន ។
លោក Wang Jinhua នាយកក្រុមហ៊ុន Chengwei Environment និយាយថា ៖ «ពេលអ្នកអញ្ជើញនរណាម្នាក់ទៅបរិភោគក្នុងភោជនីយដ្ឋាន តាមទំនៀមទម្លាប់ គឺអ្នកត្រូវតែកុម្មង់អាហារច្រើនជាងតម្រូវការ ដើម្បីបង្ហាញពីចិត្តស្មោះ ។ ជាលទ្ធផល អាហារនៅសល់ត្រូវបានបោះចោល » ។
យ៉ាងណាក្តី ដង្កូវទាំងនោះអាចធ្វើអ្វីបានច្រើនទៀត ក្រៅពីសម្អាតកាកសំណល់ ។ ពេលវាធំធាត់ ដង្កូវមួយចំនួនត្រូវបានលក់ទាំងរស់ ឬបន្ទាប់ពីហាលវាឲ្យស្ងួត ដើម្បីធ្វើជាចំណីសត្វដូចជា មាន់ ត្រី និងអណ្តើកជាដើម ។ លាមកដង្កូវ ក៏អាចយកមកប្រើធ្វើជីធម្មជាតិសម្រាប់ធ្វើកសិកម្មផងដែរ ។
ចិន កាណាដា អូស្ត្រាលី និងអាហ្វ្រិកខាងត្បូង ស្ថិតក្នុងចំណោមប្រទេសដែលអាចឲ្យចំណីសត្វបក្សី និងត្រី ដោយប្រើប្រាស់សត្វល្អិតបានដោយស្របច្បាប់ ៕
ចែករំលែកព័តមាននេះ