ចិន ៖ តាមព័ត៌មាន Viral4real បានឱ្យដឹងថា ក្រុមហ៊ុនមួយនៅក្នុងខេត្តស៊ីអាន ប្រទេសចិន បានផ្តល់ប្រាក់លើកទឹកចិត្តចំនួន១០០យន់ (ស្មើ២០,៤០ដុល្លា) ទៅបុគ្គលិកណា ដែលស្រកទម្ងន់អស់មួយគីឡូក្រាម ។ បុគ្គលិកទាំងអស់ ក្នុងក្រុមហ៊ុននោះ អាចទទួលបានផលប្រយោជន៍ជាច្រើនក្នុងពេលតែមួយ ។ ពោលគឺពួកគេអាចមានសុខភាពល្អ ដោយការសម្រកគីឡូ និងទទួលបានលុយពីថៅកែថែមទៀតផង។ តែលក្ខខណ្ឌក្នុងការចូលរួម គឺត្រូវស្រក៣គីឡូក្រាមជាមុនសិន មុនពេលមានសិទ្ធិទទួលប្រាក់លើកទឹកចិត្តពិសេសនេះ ។
បុគ្គលិកម្នាក់បាននិយាយថា «ខ្ញុំធ្លាប់តែទទួលទានសាច់គ្រប់ពេលនៃអាហារ ។ តែពេលនេះ ខ្ញុំទទួលទានតែផ្សិត និងស៊ុតតែប៉ុណ្ណោះ សម្រាប់អាហារថ្ងៃត្រង់» ។ នាងបានទទួលប្រាក់២០០០យន់ (ស្មើ៤០៧ដុល្លារ) បន្ទាប់ពីសម្រកទម្ងន់បាន២០គីឡូក្រាម ក្នុងរយៈពេលត្រឹមតែ២ខែប៉ុណ្ណោះ ។
បុគ្គលិកទាំងអស់មានសិទ្ធិទទួលបានប្រាក់លើកទឹកចិត្តនេះ តែមានមនុស្សម្នាក់ដែលមិនបាន ។ ម្នាក់នោះ គឺជាថៅកែក្រុមហ៊ុនផ្ទាល់តែម្តង ។ លោកថៅកែក្រុមហ៊ុនបានមានប្រសាសន៍ថា «លទ្ធផលនៃកម្មវិធីពិសេសនេះ ពិតជាលើសពីអ្វីដែលរំពឹងទុក ។ តែអ្វីដែលសំខាន់គឺខ្ញុំមិនអាចទទួលបានប្រាក់នេះទេ» ។
ចែករំលែកព័តមាននេះ