រាជធានីភ្នំពេញ ៖ ប្រជាពលរដ្ឋដែលធ្វើដំណើរឆ្លងស្ពានអាកាសថ្មើរជើងជម្ពូវ័ន បានសម្ដែងនូវការភ័យខ្លាចក្រុមយុវជនហិតកាវដែលនាំគ្នាឡើងទៅអង្គុយហិតកាវនៅស្ពាននោះ ជាពិសេសពេលយប់ ហើយពួកគាត់ធ្លាប់ជួបប្រទះពួកគេច្រើនដងមកហើយ ទើបមានការព្រួយបារម្ភ ។
គួរបញ្ជាក់ថា ស្ពានអាកាសថ្មើរជើងជម្ពូវ័ន មាន២ខ្សែដែល១ខ្សែខាងលិច ស្ថិតនៅត្រង់ចំណុចមុខសាលាបឋមសិក្សាជម្ពូវ័ន និងមុខផ្សារជម្ពូវ័នតែម្ដង ចំណែក១ខ្សែខាងកើត ស្ថិតនៅត្រង់ ចំណុចមុខវិទ្យាល័យ ហ៊ុន សែនជម្ពូវ័ន ហើយមានទីតាំងស្ថិតនៅកាត់ទទឹង ផ្លូវជាតិលេខ៤ ក្នុងភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ ។ ស្ពានទាំងពីរខ្សែនេះ ទើបត្រូវសាលារាជធានីភ្នំពេញ សាងសង់រួចរាល់ និងសម្ពោធដាក់ឲ្យប្រើប្រាស់ជាផ្លូវការរយៈពេលប្រហែលជិត១ខែមុនប៉ុណ្ណោះ។
ប្រជាពលរដ្ឋនិយាយថា ស្ពានអាកាសថ្មើរជើងនេះ មានសារសំខាន់ខ្លាំងណាស់ដែលសម្រួលដល់ការធ្វើដំណើរ ព្រោះពួកគាត់អស់ការព្រួយបារម្ភរឿងគ្រោះថ្នាក់ចរាចរណ៍ទៀតហើយ ខុសពីពេលមុនដែលដើរឆ្លងផ្លូវម្ដងៗមានការភ័យខ្លាចត្រូវរថយន្ត ឬម៉ូតូបុក ។ ប៉ុន្តែទន្ទឹមនឹងនេះ ក្ដីកង្វល់ជាថ្មីនោះ គឺពួកគាត់មានការភ័យខ្លាចក្រុមអ្នកហិតកាវធ្វើបាប ព្រោះតែងតែឃើញជនញៀនកាវទាំងនោះ ស្ថិតនៅលើស្ពានអាកាសនោះក្នុងស្ថានភាពរញ៉េរញ៉ៃ គួរឲ្យខ្លាច ថ្វីដ្បិតតែពេលនេះមិនទាន់មានបញ្ហា ប៉ុន្តែគង់តែនៅថ្ងៃណាមួយមានបញ្ហាមិនខានទេ ។ ដូច្នេះពួកគាត់សូមឲ្យអាជ្ញាធរ និងកម្លាំងនគរបាលជួយសម្រួលបញ្ហានេះផង ដើម្បីកុំឲ្យមានបទល្មើសកើតឡើងដល់អ្នកដើរឆ្លងស្ពានខាងលើនេះ និងសំណូមពរមួយទៀតពួកគាត់ចង់ឲ្យសាលារាជធានីភ្នំពេញ ជួយសាងសង់ដំបូលស្ពានទាំងពីរនោះផង។
ទាក់ទិនទៅនឹងការលើកឡើងរបស់ប្រជាពលរដ្ឋខាងលើ ត្រូវនគរបាលប៉ុស្ដិ៍ចោមចៅប្រាប់ឲ្យដឹងថា កន្លងមកធ្លាប់ឮនិយាយតៗគ្នាថា មានក្រុមក្មេងហិតកាវនៅលើស្ពាននោះដែរ ប៉ុន្តែកម្លាំងចុះទៅមើលអត់មានឃើញទេ សូម្បីម្នាក់ក៏គ្មានផង ហើយរាល់ពេលល្បាតពេលយប់ កម្លាំងតែងត្រួតពិនិត្យនៅទីនោះជាប្រចាំ ប៉ុន្តែមិនដែលបានឃើញនោះដែរ ។ ទើបសង្ស័យថា ក្មេងហិតកាវទាំងនោះដើរឆ្លងកាត់ទីនោះតែប៉ុណ្ណោះ តែទោះជាបែបណាកម្លាំងនិងពិនិត្យមើលបន្តទៀត ដូច្នេះសូមបងប្អូនកុំភ័យខ្លាចអី បើមានមែនកម្លាំងនឹងចាប់ភ្លាម ហើយសុំឲ្យបងប្អូនជួយផ្ដល់ដំណឹង ប្រសិនបើឃើញក្មេងហិតកាវទាំងនោះមែន៕
ចែករំលែកព័តមាននេះ