រាជធានីភ្នំពេញ ៖ លោកសុវណ្ណ មករា បានឆ្លើយតបអ្នកនាងឈិន សុធារី ដែលបានវាយប្រហារនារីមា្នក់ និងចោទថា ជាអ្នកបំបែកបំបាក់ជីវិតប្តីប្រពន្ធរបស់នាង ។ លោកស្នើកុំឱ្យសុធារីអូសអ្នកដទៃពាក់ព័ន្ធទៅលើបញ្ហាបែកបាក់ ក្នុងពេលការបែកបាក់ចំណងអាពាហ៍ពិពាហ៍នេះមិនអាចត្រឡប់ក្រោយបានវិញទេ ។
លោកសុវណ្ណ មករា ចាត់ទុកការសរសេរបង្ហោះលើហ្វេសប៊ុកបរិហារទៅលើនារីម្នាក់ពីអ្នកនាងឈិន សុធារី គឺធ្វើឱ្យប៉ះពាល់ដល់កិត្តិយសរបស់អ្នកដទៃ ខណៈពេលការលែងលះជាផ្លូវការគឺរង់ចាំការសម្រេចពីអាជ្ញាធរ ។
តាមសំណេរដែលលោកសុវណ្ណ មករា សរសេរបង្ហោះតាមហ្វេសប៊ុកកាលពីពេលថ្មីៗកន្លងមកថា «សុំទោសផងប្អូនស្រីរាជិនីធ្វើឱ្យប៉ះពាល់ដល់កិតិ្តយសប្អូនស្រីហើយ ! ហើយខ្ញុំក៏សូមប្រាប់ទៅអតីតឧត្តមភរិយាខ្ញុំផងថា ផ្លូវជីវិតរបស់យើងទាំងពីរនាក់ បើទោះជារង្គោះរង្គើយ៉ាងណា ក៏សូមកុំអូសទាញអ្នកដទៃឱ្យចូលមកពាក់ព័ន្ធ មួយលើកជាពីរលើកដូច្នេះឱ្យសោះ វាមិនមានផលល្អសម្រាប់គេទេ ។ រឿងយើងទាំងពីរនាក់ បើធ្ងន់យ៉ាងណាក៏ពួកយើងអាចប្រឈមមុខនឹងគ្នាបានដែរ ហើយរវាងយើងទាំងពីរនាក់ត្រូវបញ្ចប់ទៅហើយ ពួកយើងរង់ចាំតែការសម្រេចរបស់សាលាសង្កាត់បញ្ចប់គ្នាប៉ុណ្ណោះ អីុចឹងសូមអូនកុំលាបពណ៌គ្នាអី ! ការបរាជ័យ កើតចេញពីខ្លួនយើងណាអូន» ។
ការឆ្លើយតបពីលោកសុវណ្ណ មករា នេះបន្ទាប់ពីអ្នកនាងឈិន សុធារី ទម្លាយមុខមាត់ស្រីស្នេហ៍របស់លោក និងបានវាយប្រហារដោយពាក្យសម្តីទៅលើនារីម្នាក់នោះ ។
ឈិន សុធារី បានទម្លាយឈ្មោះនារីម្នាក់នោះថា ឈ្មោះ Ya baby (ឈ្មោះហ្វេសប៊ុក) ខណៈពេលដែលនាងហៅនារីម្នាក់នោះថា ជារាជិនីតារាម៉ូដែល ហៅរាជិនីផ្នែកពូកែយកឫកពា យកប្តីគេ ឱ្យភ្នែក ភ្នែកមាន់ព្រៃ ឃើញប្រុសមិនបាន ឱ្យតែទាក់បានគេស្រលាញ់ខ្លួន គឺសប្បាយចិត្តហើយ ។
សាររបស់លោកសុវណ្ណ មករា ត្រូវមហាជនជាច្រើនសរសេរស្តីបន្ទោសដោយចាត់ទុកជាសម្តីបង្ហាញពីមនុស្សមិនទទួលខុសត្រូវ និងបានទម្លាក់កំហុសឱ្យគេ មើលងាយភរិយារបស់ខ្លួនទៅវិញ ៕
ចែករំលែកព័តមាននេះ