អតីតនាយករដ្ឋមន្ត្រីក្រិក លោក LOUKAS PAPADIMOS រងរបួសកាលពីថ្ងៃទី២៥ ឧសភា ដោយសារការផ្ទុះស្រោមសំបុត្រដាក់ជាតិផ្ទុះក្នុងរថយន្តរបស់លោកនាភាគកណ្តាលក្រុងអាថែន ។
លោក LUCAS PAPADEMOS ជាប្រមុខរដ្ឋាភិបាលក្រិករវាងខែវិច្ឆិកា ឆ្នាំ២០១១ និងខែឧសភា ឆ្នាំ២០១២ ខណៈប្រទេសលោកប្រឈមមុខនឹងវិបត្តិសេដ្ឋកិច្ចធ្ងន់ធ្ងរ ហើយឱ្យមានការអនុម័តបណ្តាវិធានការរឹតត្បិតថវិកា ។
យោងតាមទីភ្នាក់ងារជាតិក្រិក ANA ថា លោក LUCAS PAPADEMOS អាយុ៦៩ឆ្នាំ ទទួលការវះកាត់ព្យាបាលរបួសត្រង់ពោះ និងជើង ។ ចំណែកទូរទស្សន៍រដ្ឋ ERT មុននេះបន្តិចរាយការណ៍ថា លោកក៏មានបញ្ហាខាងការដកដង្ហើមផងដែរ ។
តាមទូរទស្សន៍រដ្ឋថា រថយន្តមែរសឺដែសរបស់លោក LUCAS PAPADEMOS ជារថយន្តពាសដែកទើបអាចឱ្យលោករបួសធ្ងន់គួរសម ពេលមានការផ្ទុះនៅខាងក្នុងបែបនេះ ។ អង្គរក្សរបស់លោក២នាក់រងរបួសស្រាល ។
ទូរទស្សន៍ ERT ពន្យល់ថា អតីតនាយករដ្ឋមន្ត្រីរូបនេះកំពុងអានសារពេលសំបុត្រមានគ្រឿងផ្ទុះស្រាប់តែផ្ទុះឡើង ។ ទោះបីជាពុំទាន់មានការប្រកាសទទួលខុសត្រូវលើការវាយប្រហារនេះត្រូវបានធ្វើរហូតដល់យប់ថ្ងៃទី២៥ ឧសភា ក្តី តែក្រុមអនាធិបតេយ្យមួយគឺក្រុម CONSPIRATION DES CELLULES DEFEU ធ្លាប់ប្រកាសកាលពីខែមីនា ថា ក្រុមគេជាប្រភពនៃការបញ្ជូនពីប្រទេសក្រិកទៅកាន់រដ្ឋមន្ត្រីហិរញ្ញវត្ថុអាល្លឺម៉ង់ លោក WOLFGANG SCHAUBLE នូវសំបុត្រមានគ្រឿងផ្ទុះមួយដែលគេប្រទះឃើញទាន់ពេល ។ ប៉ូលិសក៏វាយតម្លៃផងដែរថា ក្រុមនេះក៏ជាអ្នកទទួលខុសត្រូវលើការបញ្ជូនកញ្ចប់មួយមកកាន់ទីស្នាក់ការ IMF នៅក្រុងប៉ារីស ដែលផ្ទុះបណ្តាលឱ្យនារីម្នាក់របួសផងដែរ ៕
ចែករំលែកព័តមាននេះ