ខេត្តស្ទឹងត្រែង ៖ លោក ម៉ុម សារឿន អភិបាលខេត្ត បានដាក់ផែនការឲ្យប្រធានមន្ទីរសាធារណការ និងដឹកជញ្ជូន សាងសង់ស្ពានជូនប្រជាពលរដ្ឋជាបន្ទាន់ បន្ទាប់ពីស្ពានឈើ១កន្លែងឆ្លងអូរ ស្ថិតនៅ ភូមិបានប៊ុង ឃុំភ្លុក ស្រុកសេសាន ត្រូវបានបាក់រលំ ដោយសារជំនន់ទឹកភ្លៀងកាលពីយប់ថ្ងៃទី២៤ ខែ ឧសភា ឆ្នាំ២០១៧ កន្លងទៅនេះ ។
លោក សរ គឹមណាត ប្រធានមន្ទីរសាធារណៈការ និងជញ្ជូនខេត្តបានឱ្យដឹងនៅព្រឹកថ្ងៃទី២៦ ខែឧសភា ឆ្នាំ២០១៧ ថា លោកបានទទួលការចង្អុលបង្ហាញពី លោកអភិបាលខេត្តហើយ តែខណៈ នេះ ទឹកកំពុងហូរជន់ជោ ដែលមិនអាចធ្វើអ្វីបានក្រៅពីធ្វើផែ បណ្តោះអាសន្នឲ្យប្រជាពលរដ្ឋឆ្លងសិន រហូតលុះណាតែពេលទឹកស្រក់ ទើបកម្លាំងសាធារណការធ្វើការសាងសង់ស្ពាននោះឡើងវិញបាន ។ គួររំលឹកថា ស្ពានឈើតភ្ជាប់ផ្លូវក្រួសក្រហមពីទីរួមខេត្តស្ទឹងត្រែង ទៅកាន់ស្រុកសេសាន ត្រូវបានបាក់ដាច់ស្ទើរទាំងស្រុង ដោយសារសម្ពាធទឹកហូរកាត់ខ្លាំងពេក កាលពីយប់ថ្ងៃទី២៤ ខែឧសភា ឆ្នាំ២០១៧ នោះ ខណៈមេឃធ្លាក់ភ្លៀងលាយឡំ និងខ្យល់កន្ត្រាក់ផងដែរ ។ ស្ពាននេះមានប្រវែង៤០ម៉ែត្រ និងទទឹង៣,៧០ម៉ែត្រ ធ្វើពីឈើតភ្ជាប់ផ្លូវក្រួសក្រហម តាមបណ្តោយមាត់ទន្លេ ក្នុងឃុំភ្លុក ស្រុកសេសាន ។ ប្រភពឱ្យដឹងថា នៅទូទាំងខេត្តស្ទឹងត្រែង បានគ្របដណ្តប់ដោយភ្លៀង និងខ្យល់កន្ត្រាក់ ធ្វើឲ្យរងការខូចខាត ក្នុងនោះមានស្ពានមួយខ្សែ ។
មន្ត្រីនគរបាលប៉ុស្តិ៍រដ្ឋបាលឃុំភ្លុក ស្រុកសេសាន ខេត្តស្ទឹងត្រែង ឱ្យដឹងថា ការបាក់ស្រុតស្ពានឈើខាងលើនោះ គឺកើតឡើងដោយសារភ្លៀងធ្លាក់ខ្លាំង ទឹកហូរបុកសសរស្ពានបណ្តាលឱ្យរលើងប៉ើង និងបាក់កណ្តាលទ្រូងស្ពានធ្លាក់ទាំងផ្ទាំងចូលអូរតែម្តង ៕
ចែករំលែកព័តមាននេះ