ប៉ូលិសរាយការណ៍ថា ប៉ូលិស៣នាក់បានត្រូវស្លាប់ក្នុងការវាយប្រហារអត្តឃាតមួយកាលពីថ្ងៃទី២៤ ឧសភា នៅចំណតរថយន្តបឺសមួយនៃទីក្រុងហ្សាការតា រដ្ឋធានីឥណ្ឌូណេស៊ី ។ នេះជាការវាយប្រហារភេរវកម្មថ្មីក្នុងប្រទេស ដែលប្រជាជនភាគច្រើនកាន់សាសនាអ៊ិស្លាម ហើយខិតខំតស៊ូប្រឆាំងការកើនឡើងនៃលទ្ធិជីហាដនិយម ។
ប្រមុខប៉ូលិសនៃភាគខាងកើតក្រុងហ្សាការតា លោក ANDRY WIBOWO ថ្លែងទៅកាន់សារព័ត៌មានថា ក្រៅពីអ្នកស្លាប់ ប៉ូលិស៥នាក់ និងជនស៊ីវិល៥នាក់ក៏រងរបួស ខណៈជនអត្តឃាត២នាក់សុទ្ធតែជាបុរសត្រូវស្លាប់ដែរ ពេលធ្វើឱ្យគ្រឿងផ្ទុះដាក់ជាប់ខ្លួនគេផ្ទុះនៅចំណតរថយន្តក្រុង KAMPUNG MELAYU ពេលម៉ោងមានមនុស្សច្រើនកុះករ ។ លោកបន្តថា ខ្ញុំសូមសម្តែងការចូលរួមមរណទុក្ខ ព្រោះប៉ូលិសយើង៣នាក់បានត្រូវស្លាប់ ។ មុននេះលោកនិយាយពីជនអត្តឃាតតែម្នាក់ឯងទេ ។ ការផ្ទុះទាំង២កើតមាននាវេលាម៉ោង២១ម៉ោងក្នុងស្រុក ក្នុងវិថីមួយក្បែរចំណតរថយន្តបឺសពេលមានមនុស្សច្រើនកុះករញ៉ាំងឱ្យមានការជ្រួលច្របល់ ។
បណ្តារូបភាពផ្សាយតាមទូរទស្សន៍បង្ហាញផ្សែងហុយចេញពីចំណតរថយន្ត ដែលប៉ូលិសឡោមព័ទ្ធ ហើយសមាជិកកងកម្លាំងប៉ូលិសបានជួយជម្លៀសបណ្តាជនរងគ្រោះ ។
ការវាយប្រហារនេះក្នុងពេលភ្លាមៗពុំទាន់មានក្រុមណាប្រកាសទទួលខុសត្រូវនៅឡើយ ក៏ប៉ុន្តែគម្រោងការវាយប្រហារជាច្រើនទាក់ទិនក្រុមជីហាដ រដ្ឋអ៊ិស្លាម បើតាមអាជ្ញាធរថា ត្រូវបានកម្ទេច។
ឥណ្ឌូណេស៊ីបានប្រឡូកផ្ទាល់ក្នុងសង្គ្រាមប្រឆាំងភេរវកម្មក្រោយការវាយប្រហារភេរវកម្មនៅកោះបាលីកាលពីឆ្នាំ២០០២មក បណ្តាលឱ្យមនុស្សស្លាប់ដល់២០២នាក់ភាគច្រើនជាជនបរទេស ។ បន្ទាប់ពីនោះមក អាជ្ញាធរបានធ្វើការវាយលុកចម្បងមួយប្រឆាំងពួកអ៊ិស្លាមជ្រុលនិយម ហើយធ្វើឱ្យចុះខ្សោយដល់បណ្តាបណ្តាញដែលគ្រោះថ្នាក់បំផុត ។
ទោះបីយ៉ាងនេះក្តី ក្រុមរដ្ឋអ៊ិស្លាមរយៈពេលចុងក្រោយនេះអាចប្រមូលឡើងវិញពួកជ្រុលនិយមឥណ្ឌូណេស៊ី ។ កាលពីខែមករា ឆ្នាំ២០១៦ ការវាយប្រហារអត្តឃាត និងការវាយប្រហារដោយអាវុធនានានៅក្រុងហ្សាការតា បណ្តាលឱ្យស្លាប់ជនស៊ីវិល៤នាក់ ហើយអ្នកវាយប្រហារ៤នាក់បានត្រូវសម្លាប់ក្នុងការវាយប្រហារទាំងនេះ ប្រកាសទទួលខុសត្រូវដោយក្រុមរដ្ឋអ៊ិស្លាម ៕
ចែករំលែកព័តមាននេះ