ថៃ ៖ តាមប្រភពព័ត៌មាន Metro បានឲ្យដឹងថា កាលពីល្ងាចថ្ងៃទី១៩ ខែឧសភា ឆ្នាំ២០១៧ កន្លងមកថ្មីៗនេះ មានករណីផ្ទុះកាំជ្រួចមុនពេលហោះទៅដល់លើមេឃ ដែលបង្កឲ្យមានមនុស្សរបួសជាច្រើននាក់ ។ នៅថ្ងៃកើតហេតុ មានមនុស្សរាប់រយនាក់បានចូលរួមទស្សនាការបង្ហោះកាំជ្រួចក្នុងកម្មវិធី “Legend of the 12th zodiac” ដែលស្ថិតនៅក្នុងរមណីយដ្ឋាន Krabi ប្រទេសថៃ ។
ការបង្ហោះកាំជ្រួចបានចាប់ផ្តើមដោយមានការរាំពីសំណាក់ក្រុមរាំថៃ តែភ្លាមៗនោះកាំជ្រួចមួយដើមក៏បានផ្ទុះមុនពេលកំណត់ ។ ដោយសារតែហេតុនេះ ទើបមានកាំជ្រួចជាច្រើនទៀតបានចាប់ផ្តើមផ្ទុះនៅលើដី ដែលធ្វើឲ្យមនុស្សជាច្រើន និងអ្នករាំរងរបួសដោយសារផ្កាភ្លើងដ៏ក្តៅ ។ ក្រុមគ្រូពេទ្យបានបញ្ជូនមនុស្ស២៣នាក់ ទៅមន្ទីរពេទ្យជាបន្ទាន់ ។ គួរបញ្ជាក់ថា កម្មវិធីខាងលើត្រូវបានរៀបចំឡើងដោយក្រសួងទេសចរណ៍ និងកីឡា ។ អ្នករៀបចំកម្មវិធី លោក Pongpan Kaewjompang អាយុ៣២ឆ្នាំ បានសុំទោសជាសាធារណៈ ហើយប្រាប់ថា នេះមកពីសំណើម ដែលធ្វើឲ្យកាំជ្រួចផ្ទុះមុនពេលកំណត់បែបនេះ ។ លោកព្រមទទួលសងការខូចខាតទាំងឡាយដែលបានកើតឡើង ។
លោកស្នងការ Sawai Chukaew បាននិយាយថា លោក Pongpan ត្រូវបានគេចោទប្រកាន់ពីបទគ្មានការប្រុងប្រយ័ត្ន ដែលបង្កឲ្យមានរបួសស្នាម ។ លោកបន្ថែមថា “លោក Pongpan ជឿថានេះមកពីសំណើម ដែលធ្វើឲ្យកាំជ្រួចផ្ទុះមុនពេលកំណត់ តែពួកយើងនឹងធ្វើការស៊ើបអង្កេតបន្ថែម ៕”
ចែករំលែកព័តមាននេះ