ជនរងគ្រោះច្រើននាក់ត្រូវបានរាយការណ៍ក្រោយការផ្ទុះយ៉ាងខ្លាំងកាលពីយប់ថ្ងៃទី២២ ឧសភា នៅ MANCHESTER ARENA ជាកន្លែងដែលតារាចម្រៀងអាមេរិក នាង ARIANA GRANDE ចូលរួមក្នុងការប្រគំតន្ត្រីធំមួយនៅ
ជនរងគ្រោះច្រើននាក់ត្រូវបានរាយការណ៍ក្រោយការផ្ទុះយ៉ាងខ្លាំងកាលពីយប់ថ្ងៃទី២២ ឧសភា នៅ MANCHESTER ARENA ជាកន្លែងដែលតារាចម្រៀងអាមេរិក នាង ARIANA GRANDE ចូលរួមក្នុងការប្រគំតន្ត្រីធំមួយនៅទីនោះ ។ ប៉ូលិសគិតថា ការផ្ទុះនេះជាឧប្បត្តិហេតុភេរវកម្មមួយ ។
យោងតាមប៉ូលិសថា ការផ្ទុះកើតមាននាយប់ថ្ងៃទី២២ ឧសភា ក្នុងសាលប្រគំតន្ត្រីនៅ MANCHESTER ជាកន្លែងដែលតារាចម្រៀងអាមេរិក នាង ARIANA GRANDE ចូលរួមក្នុងការប្រគំតន្ត្រីនេះ ។
ប៉ូលិសនិយាយថា វាជាអំពើភេរវកម្មបណ្តាលឱ្យមនុស្សស្លាប់យ៉ាងតិច២២នាក់ ហើយប្រមាណជា៥៩នាក់ទៀតរងរបួស ។
មុននេះក្នុងសេចក្តីប្រកាសមួយ ប៉ូលិសគូសបញ្ជាក់ថា បណ្តាភ្នាក់ងារជួយសង្គ្រោះបានឆ្លើយតបចំពោះព័ត៌មាននានាដែលថាមានការផ្ទុះមួយ ហើយលើកគ្នាទៅ ។ ប៉ូលិសតាម TWITTER អំពាវនាវដល់ប្រជាជនឱ្យចៀសវាងកុំទៅកាន់តំបន់នេះ ។
ប៉ូលិសក្រុង MANCHESTER បន្ទាប់មកប្រកាសថា ខ្លួនបានបំផ្ទុះចោលគ្រាប់បែកមួយគ្រាប់នៅកន្លែងមួយស្ថិតនៅចម្ងាយប៉ុន្មានសិបម៉ែត្រពីសាលប្រគំតន្ត្រី ។ តាម TWITTER ប៉ូលិសនិយាយថា មានការបំផ្ទុះចោលដោយមានការត្រួតពិនិត្យគ្រឿងផ្ទុះមួយនៅឯសួនច្បារនៃកាតេដ្រាល ។ បើឮសំឡេងផ្ទុះចូរលោកអ្នកកុំភ័យខ្លាចអី ។
យុវជនម្នាក់ឈ្មោះ MAJA KHAN អាយុ២២ឆ្នាំរៀបរាប់ប្រាប់ទីភ្នាក់ងារព័ត៌មាន AP ថា ពួកយើងកំពុងចាកចេញពីសាលប្រគំតន្ត្រីរបស់តារាចម្រៀងនាង ARIANA GRANDE នាវេលាម៉ោង២២និង៣០នាទី ម៉ោងក្នុងស្រុក ក៏ស្រាប់តែឮស្នូរផ្ទុះដែលធ្វើឱ្យមនុស្សម្នាភ័យជ្រួលច្របល់រត់ចេញពីសាលតន្ត្រី ។ ចំណែកពួកអ្នកពុំទាន់ចេញពីសាលនាំគ្នារត់ចេញប្រសាច ។
បណ្តារូបភាពផ្សាយតាមបណ្តាញសង្គមបង្ហាញពីឆាកជ្រួលច្របល់នៅខាងក្នុងសាលប្រគំតន្ត្រី ។ ក្រុមរបស់តារាចម្រៀងអាមេរិកអះអាងថា ពុំមាននរណាម្នាក់រងគ្រោះទេ ។
សង្កាត់នាភាគកណ្តាលក្រុង MANCHESTER ត្រូវឡោមព័ទ្ធទាំងស្រុង ។ ប៉ូលិសប្រដាប់អាវុធដាក់ពង្រាយនៅជុំវិញសាលប្រគំតន្ត្រី ។ សាលប្រគំតន្ត្រី MANCHESTER ARENA ស្ថិតនៅលើស្ថានីយរថភ្លើង MANCHESTER VICTORIA ។ ការធ្វើចរាចរណ៍របស់រថភ្លើងទាំងអស់ត្រូវផ្អាក ។ រថយន្តសង្គ្រោះជាច្រើនគ្រឿងត្រូវបានបញ្ជូនទៅកន្លែងផ្ទុះ ។
សាលប្រគំតន្ត្រី MANCHESTER ARENA ជាសាលប្រគំតន្ត្រីបិទជិតធំជាងគេបំផុតនៅអឺរ៉ុបមានកៅអីអង្គុយដល់ទៅ២១០០០។ ក្មេងជំទង់ជាច្រើននាក់ទៅមើលការប្រគំតន្ត្រីនេះ ហើយពួកគេប្រមាណជា៥០នាក់រត់ចូលក្នុងសណ្ឋាគារ HOLIDAY INN មួយដែលនៅក្បែរ ៕
ចែករំលែកព័តមាននេះ