រាជធានីភ្នំពេញ ៖ បុរសម្នាក់ចេញពីផឹកស៊ីស្រវឹងចូលម៉ាស្សាកោសជប់ រួចឲ្យលុយដុល្លារក្រដាស៥០ដុល្លារយកទៅដូរទើបដឹងថាជាលុយដុល្លារសែនបង្កឲ្យមានការភ្ញាក់ផ្អើលកាលពីវេលាម៉ោង១២និង១៥នាទីរំលងអធ្រាត្រឈានចូលថ្ងៃទី២៣ ខែឧសភា ឆ្នាំ២០១៧ នៅហាងម៉ាស្សាកោសជប់យីហោ រិទ្ធីសែនហេង ស្ថិតនៅជាប់ផ្លូវបេតុងការ៉ាស់សាំង សម ប្រាថ្នា ភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ ។
បុរសដែលចូលទៅកោសជប់មិនបានប្រាប់ឈ្មោះទេ បានជិះម៉ូតូម៉ាកហុងដាឌ្រីម ស៊េរី២០០៨ ពណ៌ខ្មៅ ពាក់ស្លាកលេខ ភ្នំពេញ ២Z-៨៦៧២ ចូលទៅម៉ាស្សាបាននិយាយថា មុនពេលកើតហេតុរូបគាត់ទើបមកពីផឹកស៊ីស្រវឹងស្រា បានចូលម៉ាស្សានៅហាងខាងលើ បន្ទាប់មករូបគាត់បានយកលុយឲ្យស្ត្រីជាអ្នកម៉ាស្សាចំនួន៥០ដុល្លារ លុះមួយសន្ទុះមកទើបស្ត្រីខាងលើប្រាប់ថាលុយរបស់គាត់ជាលុយក្លែងក្លាយ ។ ចំណែកស្ត្រីម៉ាស្សាខាងលើបាននិយាយថា មុនពេលកើតហេតុនៅក្នុងហាងម៉ាស្សាមានស្រីៗចំនួន៣នាក់ជានាក់ម៉ាស្សា ហើយគាត់មិនបានចាប់អារម្មណ៍ថាជាលុយក្លែងក្លាយទេ ពេលបានយកលុយក្រដាស៥០ដុល្លារ អត់មានលុយអាប់ក៏ដើរទៅដូរនៅខារ៉ាអូខេមួយកន្លែងនៅជិតកើតហេតុ ស្រាប់តែគេប្រាប់ថាជាលុយក្លែងក្លាយ រូបគាត់ក៏យកលុយមកឲ្យបុរសខាងលើវិញ បន្ទាប់មកបុរសរូបនោះបាននិយាយថា លុយរបស់គាត់ជាលុយពិត ម្ដេចបានយកលុយសែនឲ្យគាត់វិញ ហើយនាងបាននិយាយថា ទេលុយ នឹងជាលុយគាត់ទេ ។ ភ្លាមៗនោះបុរសជាម្ចាស់លុយបានរករឿងស្រីៗខាងលើហើយបានទូរស័ព្ទហៅមិត្តភក្តិ២នាក់មកទៀត ទើបស្រីម៉ាស្សាបានទាក់ទងហៅបងប្អូនមកដែរ តែការជជែកវែកញែកមិនត្រូវគ្នា បាននាំគ្នាទៅប៉ុសិ៍ឲ្យសមត្ថកិច្ចជួយដោះស្រាយ ។
ក្រោយពេលកើតហេតុសមត្ថកិច្ចបានសួរនាំទៅភាគីទាំង២ម្នាក់ម្តងៗហើយ ខាងបុរសខាងលើសុំតែលុយអាប់អោយគាត់មក ចំណែកស្ត្រីម៉ាស្សាវិញបាននិយាយថាបានលុយពីណាអាប់ឲ្យគាត់ បើលុយគាត់ជាលុយសែន ។ ទោះបីជាយ៉ាងណាភាគីទាំងពីរបានសុំសម្រួលបញ្ចប់រឿងដោយមិនទាមទារអ្វីទាំងអស់ តែបុរសដែលចូលទៅម៉ាស្សាបានអះអាងថាលុយរបស់គាត់គឺជាលុយពិតប្រាកដមិនមែនលុយសែនទេ ៕
ចែករំលែកព័តមាននេះ