រាជធានីភ្នំពេញ ៖ កញ្ញាពេជ្រ អាវីហ្សារំពឹងថា នាងនឹងទទួលបានលាភសំណាងវិញក្រោយពេលមួយរយៈចុងក្រោយនេះជួបតែរឿងមិនល្អដូចជារងអំពើហិង្សា និងគ្រោះថ្នាក់ ចរាចរណ៍ជាដើម ។ ការរំពឹងនេះព្រោះនាងបានធ្វើខួបកំណើតតាមសំដីគ្រូចិនសែ ព្រមទាំងបានធ្វើចង្ហាន់ប្រគេនដល់ព្រះសង្ឃនៅវត្តទៀតផង ។
កញ្ញាពេជ្រ អាវីហ្សា បានធ្វើពិធីខួបកំណើតមានការចូលរួមពីតារា ល្បីៗ កាលពីរាត្រីថ្ងៃទី១៨ ខែឧសភា ២០១៧ នៅភោជនីយដ្ឋានមួយខាងក្រោយផ្សារសុវណ្ណា ។ ភ្ញៀវដែលចូលរួមមានចំនួនច្រើនលើសការរំពឹងទុក ។
កញ្ញាពេជ្រ អាវីហ្សា គ្មានគម្រោងរៀបចំពិធីខួបកំណើតទេ ព្រោះមិនចង់រំខានអ្នកសិល្បៈ ប៉ុន្តែដោយសារយោបល់ម្តាយធម៌ជាគ្រូចិនសែរបស់នាងឲ្យរៀបចំ ទើបនាងសម្រេចធ្វើមុនថ្ងៃខួប៣ទៅ៤ថ្ងៃ ។ ពិសេសនាងខ្ញុំរៀបចំធ្វើតាមសំដីគ្រូចិនសែ ។
ពិធីខួបកំណើតគម្រប់វ័យ២៧ឆ្នាំនេះអញ្ជើតែអ្នកជិតដិតប្រមាណ៥០នាក់ប៉ុណ្ណោះ ដោយភាគច្រើនជាអ្នកសិល្បៈ ហើយស្ទើរតែទាំងអស់គឺអញ្ជើញតាមទូរស័ព្ទ និងហ្វេសប៊ុក ។ ភ្ញៀវចូលរួមលើសចំនួនកំណត់ ព្រោះតែភាគច្រើនភ្ញៀវមកជាក្រុម និងជាគូ ។
គម្រោងសម្រាប់ការចំណាយប្រមាណ២ពាន់ដុល្លារអាមេរិក ប៉ុន្តែអាចនឹងលើសនេះបន្តិចព្រោះតែភ្ញៀវច្រើនកុះករធ្វើឲ្យអាវីហ្សារំភើបចិត្តចំពោះការស្រលាញ់រាប់អានពីភ្ញៀវកិក្តិយស ។
កញ្ញាពេជ្រ អាវីហ្សា និយាយថា «មុនថ្ងៃខួបកំណើតពីរថ្ងៃមុននេះ នាងខ្ញុំបានរៀបចំឲ្យមានកម្មវិធីមនុស្សធម៌ គឺការចុះទៅចែកអំណោយដល់កុមារកំព្រានៅមជ្ឈមណ្ឌលកុមារកំព្រាភ្នំពេញថ្មី ។ សម្រាប់ការងារសិល្បៈមួយរយៈពេលនេះ នាងខ្ញុំមិនជាមមាញឹកច្រើនទេ ព្រោះតែផលិតករយល់ថា នាងខ្ញុំទើបនឹងជួបរឿងចម្រូងចម្រាសជាមួយអតីតសង្សារ ។
អ្វីដែលនាងខ្ញុំបួងសួងសុំសម្រាប់ពិធីខួបកំណើតនេះ គឺនាងខ្ញុំចង់បានសេចក្តីសុខ សុភមង្គលក្នុងក្រុមគ្រួសារប៉ុណ្ណោះ មិនប្រាថ្នារឿងរ៉ាវស្នេហានោះទេ ។ នាងខ្ញុំរំពឹងដែរថាចូលវ័យ២៥ឆ្នាំនេះនឹងជួបតែរឿងរ៉ាវដែល ល្អៗក្នុងជីវិត» ៕
ចែករំលែកព័តមាននេះ