ខេត្តស្វាយរៀង ៖ ខណ្ឌរដ្ឋបាលជលផលស្វាយរៀង ក្រោមកិច្ចគាំទ្ររបស់កម្មវិធីស្បៀងអាហារសហភាពអឺរ៉ុប អង្គការស្បៀង និងកសិកម្មនៃសហប្រជាជាតិ(FAO) បានរៀបចំទិវាប្រមូលផលត្រីនៅឃុំឈើទាលស្រុកស្វាយជ្រំ ថ្ងៃទី៣០ មីនា ឆ្នាំ២០១១ ។ លោកពេជ្រ រម្យនា តំណាងអង្គការស្បៀង និងកសិកម្មនៃសហប្រជាជាតិ និងលោកពង្ស ពុធសីហា នាយរងខណ្ឌរដ្ឋបាលជលផលខេត្តស្វាយរៀងឱ្យដឹងថា គម្រោងបង្កើនសន្តិសុខស្បៀងសម្រាប់គ្រួសារកសិករ ដែលរងឥទ្ធិពលដោយសារការឡើងថ្លៃអាហាររបស់កម្មវិធីស្បៀងសហភាពអឺរ៉ុប ដែលប្រតិបត្តិដោយអង្គការស្បៀង និងកសិកម្មនៃសហប្រជាជាតិ បានជួយដល់ប្រជាពលរដ្ឋខេត្តស្វាយរៀងចំនួន២៦០គ្រួសារ នៅក្នុងស្រុកស្វាយជ្រំ ស្រុកស្វាយទាប និងស្រុករមាសហែក ទទួលបានកូនត្រី និងកូនបង្កងសម្រាប់ចិញ្ចឹមត្រីក្នុងស្រះ និងក្នុងស្រែជាលក្ខណៈគ្រួសារ ។ បង្កើតលក្ខន្តិកៈ និងដាក់ឱ្យដំណើរការស្រះជម្រកត្រីសហហគមន៍ចំនួន៨កន្លែង ។ គាំទ្រក្នុងការបង្កើតនិងបណ្តុះបណ្តាលកសិករផលិតកូនត្រីពូជបានចំនួន៤កន្លែង ។
ដោយមានការសម្របសម្រួលដោយខណ្ឌរដ្ឋបាលជលផលនិងអង្គការ FAO កម្មវិធីបានលើកទឹកចិត្តដល់ប្រជាពលរដ្ឋដែលមកចូលរួមធ្វើការចែករំលែកបទពិសោធន៍ចិញ្ចឹមត្រីនិងបង្កងពីកសិករទទួលបានការបណ្តុះបណ្តាលពីគម្រោងគួបផ្សំជាមួយបទពិសោធន៍ជាក់ស្តែងដែលពួកគាត់ធ្លាប់បានអនុវត្តកន្លងមកដល់គ្រួសារកសិករក្នុងភូមិប្រមាណ៧០គ្រួសារ ។ កម្មវិធីនេះក៏បានផ្សារភ្ជាប់នឹងកម្មវិធីអាហារូបត្ថម្ភ ដោយផ្តោតសំខាន់លើតួនាទីត្រី ដែលរួួមចំណែកលើកកម្ពស់ស្ថានភាពអាហារូបត្ថម្ភដល់ក្រុមគោលដៅ ពិសេសស្ត្រីនិងកុមារអាយុក្រោម២៤ខែ ។ ជាការពិត៧៥%នៃប្រូតេអ៊ីនបានមកពីត្រី ។
កម្មវិធីស្បៀងអាហារសហភាពអឺរ៉ុប ដែលកំពុងអនុវត្តដោយអង្គការ FAO ដោយធ្វើការសហការជាមួយរាជរដ្ឋាភិបាល តាមរយៈក្រសួងកសិកម្ម រុក្ខាប្រមាញ់ និងនេសាទ ក្រសួងធនធានទឹក និងឧតុនិយម ក្រសួងកិច្ចការនារី បានផ្តល់ពូជស្រូវ និងពូជបន្លែមានគុណភាពល្អ ជីគីមី កូនត្រី កូនបង្កង ចង្ក្រានឡូវ ការស្តារឡើងវិញនូវប្រព័ន្ធធារាសាស្ត្រខ្នាតតូច ស្រះសហគមន៍ ស្រះជម្រកត្រីសហគមន៍ អណ្តូងទឹក ការបណ្តុះបណ្តាល និងសំភារកសិកម្មមួយចំនួនផ្សេងទៀតដូចជា តង់ហាលស្រូវ ធុងទុកដាក់គ្រាប់ពូជស្រូវ ផ្លែចបកាប់ ធុងស្រោចទឹកជាដើម ដល់កសិករក្នុងខេត្តគោលដៅចំនួន១០ ដូចជាខេត្តបាត់ដំបង បន្ទាយមានជ័យ កំពង់ស្ពឺ កំពង់ធំ ឧត្តរមានជ័យ ព្រះវិហារ ព្រៃវែង សៀមរាប ស្វាយរៀង និងខេត្តតាកែវ ៕
ចែករំលែកព័តមាននេះ