ពិធីបិទការប្រកួតកីឡាសិស្សមធ្យម ជ្រើសរើសជើងឯកថ្នាក់ខេត្ត
ខេត្តស្វាយរៀង ៖ លោក ស៊ុំ សុជាតិ អភិបាលរង នៃគណៈអភិបាលខេត្ត អញ្ជើញជាគណៈអធិបតីក្នុងពិធីបិទ និងប្រគល់ជយ័លាភីដល់កីឡាករ កីឡាការី
ខេត្តស្វាយរៀង ៖ លោក ស៊ុំ សុជាតិ អភិបាលរង នៃគណៈអភិបាលខេត្ត អញ្ជើញជាគណៈអធិបតីក្នុងពិធីបិទ និងប្រគល់ជយ័លាភីដល់កីឡាករ កីឡាការី សិស្សមធ្យមជ្រើសរើសជើងឯកថ្នាក់ខេត្តប្រចាំឆ្នាំសិក្សា២០១៦-២០១៧ នារសៀលថ្ងៃទី១៨ ឧសភា ២០១៧ នៅកីឡាដ្ឋានស្វាយរៀង ក្រុងស្វាយរៀង ដែលមានកីឡាករ កីឡាការនី មកពីស្រុកក្រុងទាំង៨សរុបជាង៤០០នាក់។ លោកប្រធានមន្ទីរអប់រំយុវជន និងកីឡាខេត្តបានអានរបាយការណ៍ថា ការប្រកួតកីឡាសិស្សមធ្យម ជ្រើសរើសជើងឯកថ្នាក់ខេត្តនេះមានប្រភេទកីឡា បាល់ទាត់ បាល់ទះ បាល់បោះ ប៊ូល និងប្រភេទកីឡា អត្តពលកម្ម(យុវជននារី) ដែលបានចាប់ផ្តើមកាប្រកួតពីថ្ងៃទី១២ ឧសភា ដល់ថ្ងៃទី១៨ ឧសភា ២០១៧ នៅទីលានកីឡាដ្ឋានក្រុងស្វាយរៀង។
លោកប្រធានមន្ទីរបន្តទៀតថា ឆ្លងការប្រកួតយ៉ាងស្វិតស្វាញរយៈពេល៥ថ្ងៃ លទ្ធផលប្រភេទបាល់ទាត់នារី ចំណាត់ថ្នាក់លេខ១ បានទៅលើស្រុករមាសហែក ,ចំណាត់ថ្នាក់លេខ២ បានទៅលើក្រុងស្វាយរៀង,ចំណាត់ថ្នាក់លេខ៣ ក្រុងបាវិត។ បាល់ទាត់ផ្នែកយុវជន ចំណាត់ថ្នាក់លេខ១ បានទៅលើសិស្សក្រុងបាវិត ,ចំណាត់ថ្នាក់លេខ២ ក្រុងស្វាយរៀង ចំណាត់លេខ៣ ស្រុកកំពង់រោទ៍។ ប្រភេទបាល់ទះ ផ្នែកនារី ចំណាត់លេខ១ ស្រុកស្វាយទាប លេខ២ស្រុកស្វាយជ្រំ លេខ៣ស្រុករមាសហែក ផ្នែកបុរស ចំណាត់ថ្នាក់លេខ១ ក្រុងស្វាយរៀង លេខ២ ស្រុករមាសហែក លេខ៣ស្រុករំដួល។ ប្រភេទបាល់បោះ ផ្នែកនារី ចំណាត់ថ្នាក់លេខ១ វិទ្យាល័យស្វាយរៀង លេខ២វិទ្យាល័យហ៊ុនសែនប្រសូតិ លេខ៣ វិទ្យាល័យ ព្រះពន្លា ។
ផ្នែកបុរស ចំណាត់ថ្នាក់លេខ១ វិទ្យាល័យស្វាយរៀង លេខ២ វិទ្យាល័យហ៊ុនសែនប្រសូតិ លេខ៣ វិទ្យាល័យហ៊ុនសែនជ្រៃធំ។ លោក ស៊ុំ សុជាតិ អភិបាលរងនៃគណៈអភិបាលខេត្ត បានមានមតិសំណេះសំណាលថា កីឡាគឺនាំមកនូវសុខភាព មិត្តភាព សាមគ្គីភាព ប្រាជ្ញាឈ្លៀសវៃ យើងលេងកីឡាចៀសឆ្ងាយពីគ្រឿងញៀន បើយើងសេពគ្រឿងញៀនហើយយើងបាត់បង់ឱកាសសិក្សា មនុស្សក្នុងសង្គម គេស្អប់ខ្ពើម បាត់បង់កិត្តិយសគ្រួសារឪពុកម្តាយ វិនាសទាំងខ្លួនឈានទៅមានទោសជាប់ពន្ធនាគារ។ លោកស៊ុមសុជាតិក៏បានមានប្រសាសន៍ទៀតថា ការប្រកួតកីឡា គឺតែងតែមានអ្នកឈ្នះ និងមានអ្នកចាញ់ជាធម្មតា អ្នកហ្វឹកហាត់បានល្អ និងវៃឆ្លាត អ្នកនោះគឺជាអ្នកឈ្នះ ដូចពាក្យស្លោកមួយឃ្លា ពោលថា ស៊ូបង្ហូរញើស លើទីលានហ្វឹកហាត់ ជាជាងបង្ហូរទឹកភ្នែក នៅលើទីលានប្រកួត។
បើពេលនេះយើងចាញ់ ត្រូវតែយកបទពិសោធន៍នេះ ទៅហ្វឹកហាត់ដកស្រង់បច្ចេកទេស សម្រាប់ប្រកួតលើកក្រោយៗទៀត។បន្ទាប់មកពិធីប្រគល់រង្វាន់ជ័យលាភី ចំណាត់ថ្នាក់លេខ១ ទទួលបានពានរង្វាន់មួយ ទង់ជ័យលាភីមួយ និងថវិកា៤លានរៀល ចំណាត់ថ្នាក់លេខ២ ទទួលបានទង់ជ័យលាភីមួយ ថវិកា២លានរៀល ចំណាត់ថ្នាក់លេខ៣ ទទួលបានទង់ជ័យលាភីមួយ ថវិកា១លានរៀល។ ចំពោះកីឡាករផ្នែកអត្តពលកម្ម រត់ល្បឿន លោតកម្ពស់ លោតចម្ងាយ ចោលដុំដែក ចោលថាស ចោលស្ន ដើរចម្ងាយ បុរស នារី ចំណាត់ថ្នាក់លេខ១ ទទួលបានទង់ជយ័លាភីមួយ ថវិកា៤០ម៉ឺនរៀល ចំណាត់ថ្នាក់លេខ២ ទទួលបានទង់ជ័យលាភីមួយ ថវិកា២០ម៉ឺនរៀល ចំណាត់ថ្នាក់លេខ៣ ទទួលបានទង់ជ័យលាភីមួយ ថវិកា១០ម៉ឺនរៀល៕
ចែករំលែកព័តមាននេះ