រាជធានីភ្នំពេញ ៖ លោកជួន អម្រិត មួយរយៈពេលចុងក្រោយនេះបានចេញបទចម្រៀង សម្តែងភាពយន្ត និងធ្វើពិធីករនៅស្ថានីយទូរទស្សន៍ ។
ម្ចាស់ពានរង្វាន់ផ្នែកសុច្ឆន្ទៈក្នុងកម្មវិធីប្រឡងយុវតារាឆ្នាំ២០០៩ លោកជួន អម្រិត បានបង្កើតស្នាដៃសិល្បៈជាច្រើនទាំងការច្រៀង និងសម្តែង ។ ភាពយន្តដែលធ្វើឱ្យទស្សនិកជនស្គាល់លោកមានដូចជារឿង «កូនឥតខាន់ស្លា» «ម្ចាស់គំនុំម្ចាស់ស្នេហ៍»និងរឿង «អច្ឆរិយស្នេហ៍» ជាដើម ។ នាពេល ថ្មីៗកន្លងលោកអម្រិតបានការងារច្រើនបន្តបន្ទាប់គ្នា ក្រោយពេលលោកសម្រេចចិត្តទទួលយកការងារសិល្បៈជាប់លាប់ជាងមុន ។ នាពេលកន្លងទៅមមាញឹកនឹងការងារខាងក្រៅ ទើបលោកអម្រិតមិនសូវជាទទួលការងារសិល្បៈ។ ពេលនេះលោកសម្រេចចិត្តចាប់ការងារសិល្បៈដោយមិនចង់ឱ្យរបូតចេញពីដៃទេ ។ ចំពោះការសម្តែងលោកអម្រិតទទួលតំណែងតួឯកក្នុងភាពយន្តភាគថ្មីរបស់ទូរទស្សន៍ CTN រឿង «បន្តោងខ្សែ.កពេជ្រ» សម្តែងរួមជាមួយកញ្ញាប៉ែន ស្រីពេជ្រ ។
ក្រៅពីការសម្តែងនោះលោកជួន អម្រិត ទើបនឹងទទួលបានតំណែងជាពិធីករក្នុងកម្មវិធីដំណើរផ្សងព្រេងបែបទេសចរណ៍របស់ស្ថានីយទូរទស្សន៍My TV គឺកម្មវិធី «ទិដ្ឋភាពថ្មីលើទឹកដីសុវណ្ណភូមិ»។ លើសពីនោះទៀតលោកបញ្ចេញបទចម្រៀងថ្មី ដែលលោកនិពន្ធទំនុកច្រៀងដោយខ្លួនឯង គឺបទ«លះបង់» ។
តារាប្រុសវ័យ២៧ឆ្នាំលោកជួន អម្រិត បញ្ជាក់ថា «ការសម្រុកបញ្ចេញស្នាដៃជាច្រើនផ្នែកព្រមគ្នានេះ គឺដើម្បីបំពេញការសំណូមពររបស់អ្នកគាំទ្រ ហើយវាមិនមែនជាឧបសគ្គសម្រាប់ខ្ញុំទេព្រោះកន្លងមកខ្ញុំធ្លាប់ចូលរួមប្រឡង និងធ្វើការហ្វឹកហាត់ការងារសិល្បៈគ្រប់ផ្នែករួចរាល់មកហើយដែរ ។ ស្នាដៃ ថ្មីៗទាំងបទចម្រៀង ការសម្តែង និងជាពិធីករនេះនឹងអាចបម្រើអារម្មណ៍ទស្សនិកជនបានច្រើន ។ ទោះជាយ៉ាងណាក្តីខ្ញុំក៏ពិតជាមានការព្រួយបារម្ភខ្លះដែរជុំវិញការសាងស្នាដៃជាច្រើនព្រមគ្នា ទើបពេលខ្លះខ្ញុំមិនចង់ទទួលយកការសម្តែង ជាច្រើនរឿង ព្រមៗគ្នានោះ » ៕
ចែករំលែកព័តមាននេះ