រាជធានីភ្នំពេញ ៖ រយៈពេលជិត៤០ឆ្នាំហើយ ដែលប្រជាពលរដ្ឋខ្មែរ នៅតែចងចាំមិនអាចបំភ្លេចបាននោះ គឺរបប៣ឆ្នាំ៨ខែ និង២០ថ្ងៃ (ប៉ុលពត) ដែលបានបង្កវិនាសកម្មយ៉ាងសាហាវ ឃោរឃៅ ព្រៃផ្សៃ ធ្វើឲ្យប្រជាពលរដ្ឋខ្មែរនិរាសព្រាត់ប្រាស់ បែកបាក់ក្រុមគ្រួសារ ឪពុក ម្តាយ ព្រាត់កូន ប្រពន្ធព្រាត់ប្តី បងព្រាត់ប្អូនរហូតមកដល់សពថ្ងៃនេះ ។ទោះជាមានរយៈពេលយូរយ៉ាងនេះក្តី តែបើយើងនឹកគិតហើយ គ្រាន់តែបិទភ្នែកស្រមៃបន្តិចនោះ យើងនឹកឃើញភ្លាម ហាក់នៅនឹងភ្នែកស្រស់ៗនូវភាពឈឺចាប់ទាំងនោះ គឺនៅតែដិតជាប់ក្នុងបេះដូងខ្មែរតែម្តង ដែលមិនអាចបំភ្លេចបានឡើយ ។
ជាក់ស្តែង នៅព្រឹកថ្ងៃទី១៨ ឧសភា នេះ ប្រជាពលរដ្ឋរាជធានីភ្នំពេញ ដោយមានការរៀបចំពីគណបក្សប្រជាជនរាជធានីភ្នំពេញ និងសាលារាជធានីភ្នំពេញ បានធ្វើពិធីរំលឹកវិញ្ញាណក្ខន្ធដល់អ្នកដែលបានបាត់បង់ជីវិត នៅក្នុងរបបប្រល័យពូជសាសន៍ នៅមជ្ឈមណ្ឌលប្រល័យពូជសាសន៍ជើងឯក ស្ថិតក្នុងសង្កាត់ ជើងឯក ខណ្ឌដង្កោ រាជធានីភ្នំពេញ ។
នៅក្នុងពិធីនេះ ធ្វើឡើងដោយមានការចូលរួមពីតំណាងរាស្ត្រមណ្ឌលភ្នំពេញ លោកម៉ប់ សារិន ប្រធានក្រុមប្រឹក្សារាជធានីភ្នំពេញ និងលោកប៉ា សុជាតិវង្សអភិបាលរាជធានីភ្នំពេញ និងមានមហាជនចូលរួមរាប់ពាន់នាក់ ដោយមានការអានវិយោគកថា ព្រមទាំងសំដែងឈុតឆាក សង្ខេបខ្លីៗ ពីប្រវត្ត ខ្លះៗ នៅក្នុងរបបប្រល័យពូជសាសន៏ ដោយក្រុមសិល្បះនៃសាកលវិទ្យាល័យវិចិត្រសិល្បះ និងរាប់បាតព្រះសង្ឃចំនួន២០៧អង្គផងដែរ ។ ដើម្បីឧទ្ទិសកុសលផលបុណ្យដល់វិញ្ញាណក្ខន្ធជនស្លូតត្រង់ចំនួន៨៩៨៥នាក់ ដែលត្រូវបានពួកប្រល័យពូជសាសន៍ប៉ុល ពត យកមកសំលាប់នៅជើងឯកនេះ ។
ចែករំលែកព័តមាននេះ