ខេត្ដកំពង់ចាម ៖ ជំងឺរាករូសស្រួចស្រាវបានផ្ទុះឡើងនៅភូមិអូរបេង ឃុំមេ.ស ជ្រៃស្រុកស្ទឹងត្រង់ ដែលក្នុងរយៈពេលតែ ២ថ្ងៃ គឺថ្ងៃទី១១និងទី១២ ឧសភា មនុស្ស២នាក់បានស្លាប់ និងជាង៩០នាក់ ត្រូវបានបញ្ជូនមកធ្វើការសង្គ្រោះនៅមណ្ឌលសុខភាពឃុំមេ.សជ្រៃជាង២០នាក់ និងជាង៧០នាក់ ទៀតបាននាំមកសង្គ្រោះនៅមន្ទីរពេទ្យបង្អែកស្រុកចំការលើ ដោយមានការធ្វើអន្ដរាគមន៍ពីលោកវេជ្ជបណ្ឌិតគឹម សួរភិរុណ ប្រធានមន្ទីរសុខាភិបាលខេត្ដ។ នៅថ្ងៃទី២ បន្ទាប់ពីមានការផ្ទុះឡើងនូវជំងឺនេះលោករដ្ឋមន្ដ្រីក្រសួងសុខាភិបាលម៉ម ប៊ុនហេង ក៏បានអញ្ជើញទៅធ្វើការត្រួតពិនិត្យដោយផ្ទាល់ផងដែរ នៅមន្ទីរពេទ្យបង្អែក ស្រុកចំការលើ និង នៅមណ្ឌលសុខភាពឃុំមេ.សជ្រៃ។
អាស្រ័យដោយស្ថានភាពមន្ទីរពេទ្យបង្អែកស្រុកមិនអាចធានាចំនួនអ្នកជំងឺនៅ តាមបន្ទប់សំរាកព្យាបាលបាន លោករដ្ឋមន្ដ្រី ក៏បានណែនាំជាបន្ទាន់ឱ្យមានការធ្វើរោងនៅក្រៅអគារបន្ថែមទៀត សំរាប់ឱ្យអ្នកជំងឺបានសំរាកព្យាបាលបានសមរម្យ ។
លោកវេជ្ជបណ្ឌិតគឹម សូរភិរុណ ប្រធានមន្ទីរសុខាភិបាលខេត្ដមានប្រសាសន៍ឱ្យដឹងថាកាលពីល្ងាចថ្ងៃទី១១ ឧសភា រូបលោកបានទទួលព័ត៌មានពីជំងឺរាករូសចំនួន១៦ករណី បានកើតឡើងហើយលោកបានចាត់កំលាំងជំនាញក្រោមឱវាទឱ្យចុះទៅកាន់ភូមិអូរបេងនិងភូមិត្រញំងឈូកជាបន្ទាន់ដើម្បីរកមូលហេតុដែលបង្កឱ្យផ្ទុះជំងឺនេះ។
លោកប្រធានមន្ទីរសុខាភិបាលបានបន្ដថាស្ថានភាពជំងឺ រាករូសធ្ងន់ធ្ងរ ជាហេតុបណ្ដាលឱ្យប្រជាពលរដ្ឋចំនួន២នាក់ស្លាប់បន្ដបន្ទាប់គ្នា ក្នុងនោះម្នាក់អាយុ៧០ឆ្នាំ និងម្នាក់ទៀតអាយុ១៣ឆ្នាំ។ រីឯអ្នកជំងឺដែលមានសភាពធ្ងន់ធ្ងរដែរត្រូវបានដឹកជញ្ជូនមកសង្គ្រោះនៅមន្ទីរពេទ្យបង្អែកស្រុកចំការលើតាមរយៈរថយន្ដសាមុយចំនួន២គ្រឿង។ ឯអ្នកជំងឺស្រាលប្រមាណជាង៣០នាក់ត្រូវបានទទួលការព្យាបាលនៅមណ្ឌលសុខភាពឃុំមេ.សជ្រៃ។ លោកកត់សំគាល់ថាគ្រាន់តែរយៈពេល២ ថ្ងៃមានប្រជាពល
រដ្ឋទាំងក្មេងទាំងចាស់ ប្រុស ស្រីចំនួនជាង៧០នាក់ ត្រូវបាននាំមកសង្គ្រោះនៅមន្ទីរពេទ្យបង្អែកស្រុកចំការលើ ដែលប្រជាពលរដ្ឋទាំងអស់នេះរស់នៅឃុំ មេ.សជ្រៃ ។ ទោះបីជាបែបណារហូតមក ដល់ម៉ោង១១ព្រឹកថ្ងៃទី១២ ឧសភា ជំងឺ បាននៅទ្រឹងមិនឃើញកើតមានករណីថ្មីបន្ថែមទៀតទេ ព្រោះមន្ដ្រីសុខាភិបាលបានជួយជ្រោមជ្រែងយ៉ាងសស្រាក់សស្រាំបំផុតដើម្បីសង្គ្រោះអាយុជីវិតឱ្យរួចផុតពីគ្រោះថ្នាក់នៃជំងឺឆ្លងនេះ ។
ស្ដ្រីអ្នកភូមិឈ្មោះហុន ឈុនហេង អាយុ ២៤ឆ្នាំ រស់នៅភូមិអូរបេងបានប្រាប់ថាកូនប្រុសរបស់នាងអាយុជាង៩ខែបានក្ដៅខ្លួន ខុសពីធម្មតាព្រមទាំងរាករូសជាញឹកញាប់នាល្ងាចថ្ងៃទី១១ ឧសភា ។ ដោយឃើញស្ថានភាពចេះតែធ្ងន់ធ្ងរនោះ នៅព្រឹកថ្ងៃទី ១២ ឧសភា បានឱ្យប្ដីឌុបតាមម៉ូតូនាំមកសង្គ្រោះនៅមណ្ឌលសុខភាពមេ.សជ្រៃ។ ក្នុងពេលនោះគ្រូពេទ្យពិនិត្យឃើញមានសភាពធ្ងន់ធ្ងរក៏បានដឹកតាមរថយន្ដសាមុយមកសង្គ្រោះនៅមន្ទីរពេទ្យបង្អែកស្រុកចំការលើបន្ដទៀត ។ ក្រោយពីបន្ដោងសេរ៉ូមនិង លេបថ្នាំ បានធ្វើឱ្យជំងឺកូនប្រុសធូរស្បើយមួយកំរិត ។
បុរសអ្នកភូមិឈ្មោះផន សាវុន អាយុ ៤២ឆ្នាំ រស់នៅភូមិអូរបេងដែរបានប្រាប់ថានា ល្ងាចថ្ងៃទី១១ ឧសភា គាត់បានទៅ ទិញស៊ុបពីផ្សារស្រែវាលយកមកហូបជុំគ្នាជាមួយប្រពន្ធកូនៗ២នាក់ ដោយរូបគាត់ហូបច្រើនជាងគេ និងបានដងទឹកអណ្ដូងមកផឹកតាមទំលាប់ធម្មតាមិនបានដាំឱ្យពុះទេ។ លុះមកដល់ម៉ោងជាង៣ទៀបភ្លឺ ឈានចូលព្រឹកថ្ងៃទី១២ ឧសភា ស្រាប់តែឈឺពោះរាករូស៥ ទៅ៦ដង បណ្ដាលឱ្យហេវហត់អស់កំលាំងជាខ្លាំងក៏ប្រញាប់ប្រញាល់មកកាន់មណ្ឌលសុខភាពមេ.សជ្រៃ ហើយត្រូវបានក្រុមគ្រូពេទ្យពិនិត្យឃើញមានសភាពធ្ងន់ធ្ងរក៏ធ្វើការសង្គ្រោះបន្ទាន់ដឹកតាមរថយន្ដមកកាន់មន្ទីរពេទ្យស្រុកចំការលើ ។
លោកវេជ្ជបណ្ឌិតស៊ុយ បូរិន ប្រធានមន្ទីរពេទ្យបង្អែកស្រុកចំការលើបានឱ្យដឹងថាករណីជំងឺរាករូសរយៈពេល២ថ្ងៃនេះអ្នក ជំងឺចំនួន៧២នាក់ ត្រូវបាននាំមកសង្គ្រោះចំណែកចំនួន៤៦នាក់ទៀតព្យាបាលនៅមណ្ឌលសុខភាពមេ.សជ្រៃ ។ អ្នកជំងឺដែលរាករូសខ្លាំងជាងគេនោះ គឺអ្នកភូមិអូរបេង ប្រមាណជា៩០% ។ អ្នកជំងឺដែលស្លាប់២ នាក់ម្នាក់ឈ្មោះវេត អាយុ៧០ឆ្នាំ រស់នៅ ភូមិត្រញំងឈូក២ ឈ្មោះសាន ស៊ុយ ភេទ ប្រុស អាយុ១៣ឆ្នាំ រស់នៅភូមិអូរបេង ។ ការរាករូសនេះត្រូវបានសន្និដ្ឋានថាបណ្ដាលមកពីការទទួលទានទឹកអណ្ដូង និងទឹកអូរដោយមិនបានដាំឱ្យពុះ ។
លោកម៉ម ប៊ុនហេង រដ្ឋមន្ដ្រីក្រសួងសុខាភិបាលដែលបានចុះសួរសុខទុក្ខអ្នកជំងឺមានប្រសាសន៍ណែនាំដល់ប្រជាពលរដ្ឋថាការសំខាន់បងប្អូនត្រូវចេះអនាម័យគឺត្រូវបន្ទោរបង់តែក្នុងបង្គន់ ហើយលាងដៃដោយសាប៊ូឱ្យស្អាតមុនទទួលទានអាហារ។ ចំណែកទឹកត្រូវដាំឱ្យពុះជានិច្ចមុនទទួលទានបើ គ្មានបង្គន់ត្រូវជីកដីកប់ដើម្បីចៀសវាងការឆ្លងជំងឺរាករូសបែបនេះ ។ករណីនេះមិនមែនជាការផ្ទុះជំងឺរាករូសស្រួចស្រាវទី១នោះទេ ព្រោះកាលពីពេលថ្មីៗនេះនៅខេត្ដក្រចេះ ក៏បានកើតមានជំងឺ បែបនេះដែរ ដែលបានបណ្ដាលឱ្យមនុស្ស៧នាក់ស្លាប់ និងមានអ្នកជំងឺត្រូវបានដឹកមកសង្គ្រោះនៅមន្ទីរពេទ្យបង្អែកខេត្ដរាប់សិបនាក់ទៀត។ នៅខេត្ដកំពតក៏មានជំងឺរាករូសដែរ ដែលគេបានឱ្យដឹងថាមានស្លាប់ម្នាក់ ធ្វើឱ្យអ្នកភូមិភ័យខ្លាចនាំគ្នាធ្វើទីងមោងដាក់មុខផ្ទះរៀងៗខ្លួនផងដែរ។
មន្ដ្រីសុខាភិបាលបាននិយាយថាការងាយនឹងកើតមានជំងឺនេះ គឺកាបរិភោគទឹកមិនស្អាត ហើយស្របពេលដែលមានអាកាសធាតុក្ដៅហួតហែងមិនធ្លាប់មានផងនោះក៏អាចបង្កឱ្យមានបញ្ហា ហើយការបរិភោគចំណីអាហារផ្ដេសផ្ដាស ក៏ត្រូវប្រុងប្រយ័ត្នផងដែរ៕
ចែករំលែកព័តមាននេះ